سەرۆکێ ھەرێما کوردستانێ نێچیرڤان بارزانی د چارچۆڤەیا لووتکەیا کەشوھەوایێ یا ل ئانتالیایێ دە، لگەل سەرۆککۆمارێ سووریەیێ ئەحمەد شەرع جڤییا. د ھەڤدیتنا کو گرینگیەکا مەزن دابوو سەر پێشەرۆژا سووریەیێ دە، ھەر دو ئالیان پرسا ستاتویا کوردان و نەخشەیا سیاسی یا نوو نیقاش کرن.
جڤینا کو د ناڤا کەشوهەوایەک دیپلۆماتیک دە دەرباس بوو، گرانی دا سەر ئاڤاکرنا پرێن نوو یێن د ناڤبەرا شامێ، بەغدایێ و ھەولێرێ دە. نێچیرڤان بارزانی د ڤێ ھەڤدیتنێ دە ب ئاوایەکی زەلال بال کشاند سەر مافێن بنگەھین یێن گەلێ کورد ل سووریەیێ و دیار کر کو مسۆگەرکرنا ڤان مافان د دەستوورا نوو یا سووریێ دە ژ بۆ ئاشتی و ئارامیا دەمدرێژ مەرجەکێ سەرەکی یە.
د جڤینێ دە ل سەر گەشەدانێن داوی یێن ل رۆژھلاتا ناڤین ژی سەکنین. ھەر دو سەرۆکان ل سەر پێویستیا چارەسەرکرنا ئالۆزیێن ھەرێمی ب رێیێن دیالۆگ و دپلۆیاسیێ ھەڤفکر بوون و بال کشاندن سەر وێ یەکێ کو دڤێت ئیستقرارا ھەرێمێ نەیێ تێکبرن.
د داویا ھەڤدیتنێ دە، نێچیرڤان بارزانی بانگ ل ئەحمەد شەرع کر کو د دەمەکێ نێزیک دە سەردانا ئیراق و ھەرێما کوردستانێ بکە. ئەڤ سەردان وەکی پێنگاڤەکا گرینگ یا ژ بۆ خورتکرنا تێکلیێن ھەرێمی تێ نرخاندن.
