ل دیاربەکرێ تفاقەک ب ناڤێ “ھەڤبەندیا نەتەوەیی کوردستانێ” ھات ئاڤاکرن و ب داخویانیەکە چاپەمەنیێ ژی ژ رایا گشتی رە ھات پارڤەکرن، دامەزرێنەرێن ھەڤبەندیێ ئاماژە کرن کو ئەو سیاسەتا ئەنتەگراسیۆنێ و سیاسەتا دەولەتا ترکیێ یا ب سالانە دژی کوردان تێ مەشاندن رەد دکن و وێ ل باکورێ کوردستانێ خەتەکە نەتەوەیی ئاڤا بکن و بۆ ڤێ ئارمانجێ ژی وان رێبازەکە نوو جودا دانە پێشیا خوە.
د 7ێ مژدارێ دە ل دیاربەکرێ بۆ پێکانینا تفاقەکە نەتەوەیی ژ ئالیێ پارتی و رێخستنێن کوردستانی ڤە کۆنفەرانسەک ھاتبوو ل دارخستن.
د ئەنجاما وێ کۆنفەرانسێ دە بریار ھات دایین کو ھەڤبەندیا نەتەوەیی یا کوردستانێ وەرە ئاڤاکرن. دامەزراندنا ھەڤبەندیا نەتەوەیی یا کوردستانێ ژی ب بەدشاریا پارتیا وەلاتپارێزێن کوردستانێ، پارتیا سۆسیالیستا کوردستان، پێلکورد، په‌ده‌كه باکور، تەڤگەرا ڤەژین یا کوردستانێ و ئینسییاتیفا یەکیتیا نەتەوەیی ب جڤینەکە چاپەمەنیێ ھات راگھاندن و ھات ئاماژەکرن کو دێ ب رێبازەکە نوو ل باکورێ کوردستانێ نونەرتیا سیاسەتا نەتەوەیی وەرە کرن.
سەرۆکێ پارتیا وەلاتپارێزێن کوردستانێ موستافا ئۆزچەلیک گۆت: “ئەڤ برینەکە کوورە، ل باکورێ کوردستانێ ھەولێن پێکانینا یەکیتیا نەتەوەیی ھاتنە دایین و ب سەر نەکەتنە، ئەمێ رێبازەکە نو و جودا بدن بەر خوە، مە بەرنامەیەک دایە پێشیا و ئەم ھێڤیدارن کو ڤێ جارێ وێ ب سەر بکەڤە”.
ھەڤبەندیا نەتەوەیییا کوردستانێ مەجلیسا خوەیا کو ژ 51 کەسان پێک تێ ژی ساز کر و ھات ئاماژەکرن کو دێ ل باکورێ کوردستانێ ب ئاوایەکە بەرفرەھ دەست ب خەباتێن خوە بکە و بۆ بدەستخستنا مافێن کۆڵەکتیفێن کوردان سیاسەتەکە نەتەوەیی ب بباندۆر بمەشینە و ھەر وھا بال ھاتە کێشان کو رەوشا باکورێ کوردستانێ بۆ سیاسەتکە شوونگرا نەتەوەیی گونجاڤە .
ئاکتیڤیست نەجمەدین روھایی دبێژە: “ل باکورێ کوردستانێ د وارێ نونەرتیا سیاسەتا نەتەوەیی دە ڤالاھیەک ھەیە، جڤاک ژی ڤێ ڤالاھیێ دبینە و داخوازا سیاسەتەک نەتەوەیی دکە، ژ بەر وێ ئەم دبێژن بنگەھ ژی گونجاڤە بۆ سیاسەتەکە نەتەوەیی”.
