ل سەر نووچەیێن ئاژانسێن راگھاندنا ترکیێ کو باس ل “دالیا مەحموود موسلم” دکرن کو خوە ل مێرسینێ رادەستی ھێزێن ئەولەکاری کریە و ئەڤ دو رۆژە د ناڤا سۆسیال مەدیایێ دە بوویە رۆژەڤ، گەلۆ کێ دالیا تەسلیم کر؟
راگھاندنا ب سەر پەکەکێ و یێن نێزی وێ ئیدیعا دکرن کو PDK دالیا موسلم رادەستی ترکیێ کریە، د ڤێ ئیدیعایا خوە دە ئەوقاس پێشدە چوون کو کانالێ پەکەکێ یێ تەلەفزیۆنی”ئاریا تیڤی” کو ژ بۆ رۆژھلاتێ کوردستانێ وەشانێ دکە نووچەیەک ب ناڤێ سالح موسلم بەلاڤ کر و تێدە وەها خوەیا کر کو ھەر وەک سالح موسلم، بەشداری بەرناما تەلەفزیۆنێ بوویە و گۆتییە” خارزییا من گران بریندار بوو، ژ بۆ وەرگرتنا چارەسەریێن پزیشکی چوو بوو ھەولێرێ لێ پەدەکێ ئەو تەسلیم کر، لێ بەلێ ل سەر ڤێ نووچەیێ نە دەنگێ سالح موسلم نە ژی رەنگێ وی ھەبوو”. نڤیسکارەکە ناڤدار “ئامبەرین زەمان” ل سەر حەسابا خوەیا تویتەرێ گۆت من دگەل سالح موسلم ب تەلەفۆنێ ئاخڤییە، موسلم گۆتییە ئەڤ ئاخافتن نەیا منە. گەلۆ رێخستنەک ل سەر ناڤێ رێڤەبەرەکی خوە نووچەیەکی درەو چێبکە ئەو دەزگەھێ راگھاندنێ وێ چەند جھێ باوەریێ بە و خوەدی ئەخلاقێ راگھاندنی بە؟!
گەلۆ پەکەکە دخوازە ل سەر ئۆپەراسیۆنا حەفتەنینێ و تەجاوزا پارلامەنتەرێ ھەدەپێ توما چەلیک دە بگرە؟
نڤیسکارێن پەکەکێ یێن پۆر سپی یێن کو خوە ددانن رێزا مەزنان، ب تو ئاوا ئەڤ قاس ب بێشەرمی ڤێ بوویەرێ باس دکن و ب شێوازەکی دراماتیک دخوازن ب ھەستێن گەلێ کورد بلەیزن، دگۆتن دالیا مەحموود موسلم ب گرانی بریندار بوویە و ژ بۆ وەرگرتنا چارەسەریێن پزیشکی چوویە ھەولێرێ، لێ پەدەکێ ئەو تەسلیمی میت و دەولەتا ترکیێ کریە، ئەم ڤێ پرسێ ژ راگھاندنا پەکەکێ دکین، دەما کو ھەڤالبەندێن وە یێن ستراتەژیک “یەنەکێ”، مستەفا سەلیمی، تەسلیمی ئیرانێ کرین و ئەو ئەندامێن داعشێ یێن کو ھێژان نەھاتبوون دادگەھ کرن بێی بریارا حکوومەتا ھەرێما کوردستانێ رادەستی پارێزگەرێ کەرکووکێ کرین و ھەمان دەم باژارێ کەرکووکێ یێ مەزن و قەدیم دەما تەسلیمی حەشدا شەعبی کری چ دەنگ و گۆتن ژ وان دەرنەکەت ژ بۆ ڤێ مەسەلا کو سەری ھەیا بنی درەو، خوە کرن شێرێن ماف پاراستنێ.
ل سەر فایلا پەکەکێ د ناڤا لیستا ئنتەرپۆلێ دە یێن ناڤێن وان ھەیی و ترکیێ دیاری ل سەر سەرێ وان دانایی ب دەھان ولاتپارێزێن کورد ل ھەولێرێ دەست و ملێن خوە دھەژینن و دگەرن، پەدەکێ و حکوومەتا ھەرێما کوردستانێ تو کەس ژ ڤانە رادەستی دەولەتا ترکیێ نەکرنە، دەستپێکێ ژی رێڤەبەریا پەکەکێ و رێڤەبەریا رۆژئاڤا و ب تایبەتی ژی “سالح موسلم” دزانە کو حکوومەتا ھەرێمێ ھەیا نھا تو کەس رادەستی دەولەتا ترکیێ نەکرینە، پەدەکێ کەسێ کو دپلۆماتێ ترک کوشتی ب ناڤێ “مەزلووم داغ” و ھەڤالێن وی ل سەر ھەموو داخواز و زەختا دەولەتا ترک تەسلیمی ترکا نەکری چەوا دبە کەچەک بچووک ئا ٢١ سالی رادەستی دەولەتا ترک بکە؟! ئەڤ کێشە ب ئەخلاقێ راگھاندنا پەکەکێ ڤە گرێدایی یە، ئەم دکارین ژ بۆ وان دەزگەھێن راگھاندنێ ببێژین ل گەل وان ل جییێ ئەخلاقی بێ ئەخلاقی ھەیە.
PKK د مژارا ئەخلاقێ پرۆپاگندەیێ دە بوویە AKP، خەتا راگھاندنا پەکەکێ و AKPێ نەفسی یەکن، مژارێن پسپۆریا پەکەکێ و ئاکەپێ د وارێ راگھاندنێ دە ل سەر رۆژەڤ و نووچەیێن درەو دروست بوویە، پێویستی ئەو بوو کو ڤان رۆژانە ئەم ل سەر مژارا حەفتەنینێ بسەکنیبان، بێی کو بەرخوەدانەکە مجت وەرە ئەنجامدان ھەفتەنین ب ھەموو گر و لۆتکە و نەوال و زنارێن خوە ڤە چەوا رادەستی ترکیێ هات کرن، مژارا نیقاشا کوردان پێویستە ئەڤ بیت، لێ مخابن ل سەر درەوەکی ئەڤ سێ رۆژە نیقاش دھێتە کرن.
رۆژێن دەرباس بوویی ل سەر پارلەمەنتەرێ کورد “توما چەلیک” کو تەجاوزی ژنەکێ کربوو و ئەڤ سێ سالە ل سەر ڤێ مژارێ تێ گرتن، نووچەیەک وھا بەلاڤ بوو، ترۆلەرێن پەکەکێ یێن سۆسیال مەدیایێ دیسان خوەستن ل سەر ڤێ نووچەیێ دە بگرن، ل سەر چیرۆکا عەشقا دو جوانان دخوازن بەرژەوەندیەک حیزبی ئاڤا بکن و رەنگەکی سیاسی بدەنێ و بازارەک سیاسی بکەن.
