باشوور نه‌بێده‌نگه، بیردانه‌كا سه‌بری ئۆك وه‌ك یا ماسیێ لێ هاتییه
سه‌بری ئۆك ئه‌ندامێ كونسه‌یا برێڤه‌بر ئا كۆما جڤاكێن كوردستانێ كه‌جه‌كێ، داخویانی ژ بۆ كه‌نالێ «ستێرك» دا و گۆت: «په‌ده‌كێ تو داخویانی ل ده‌ربارا ئێریشێن تركیێ نه‌دانه، ئه‌ڤ ژ بۆ مه جیێ گۆمانێ یه».
دژاتیکرنا په‌كه‌كێ ژ بۆ باشوورێ كوردستانێ ب تا‌یبه‌ت حكوومه‌ت، پارلمه‌ن و هێزێن سیاسی ئێن باشوور ده‌وام دكه، د داوی توهمەت و دژاتیکرن ده، په‌كه‌كێ ل سه‌ر زارێ ئه‌ندامه‌كێ خوه ئێ رێڤه‌بر جاره‌كه دن هه‌ولێن به‌ره‌ڤاژی كرنا راستییان دان و خواست گومانێ بخه سه‌ر هه‌لوه‌ستێن حكوومه‌تا باشوور و په‌ده‌كێ ل ده‌ربارا ئێریشێن تركیێ و دبێژه كو وان تو هه‌لوه‌ست ل ده‌ربارا ڤێ داگیركه‌ریێ نیشان نه‌دانه، ئه‌ڤ ژی ژ بۆی مه جیێ گۆمانێ یه.
سه‌بری ئۆك، ئه‌ندامێ كۆنسه‌یا برێڤه‌بر ئا په‌كه‌كێ، دوهـ رۆژا سێشه‌می 21/7/2020ان بەشداری به‌رنامه‌یه‌كه «ستێرك» تی ڤی ئا په‌كه‌كێ ب ناڤێ رۆژه‌ڤا ولات بوو و تێده هنه‌ك شیرۆڤه و ئاگاهی دان.
سه‌بری ئۆك وه‌كه چاوا هه‌رتم په‌كه‌كه ئێریشێ باشوورێ كوردستانێ دكه، ئاخفتنا خوه ب ئێریشا سه‌ر په‌ده‌كێ ده‌ست پێ کر و گۆت: «ل ده‌ربارا داوی ئێریشێن ده‌وله‌تا تركیێ، په‌ده‌كێ تو داخویانی نه‌دانه، ئه‌ڤ ژ بۆی مه جیێ گۆمانێ یه».
ئەڤ جارا دویەمینە د دەما هەفتەیەکێ دە ب ئاوایەک فەرمی و ژ زاردەڤێ دو ژ مەزنترین رایەدارێن پەکەکێ، دژاتیکرنا پەکەکێ و رایەدارێن وێ ژ بۆ باشوورێ وەلات دیار دبە، پێش نها دوران کالکان ژی ژ بۆ مەدیایا پەکەکێ داخویانی دابوو و تێدە ب ئەشکەرە ئێریشی هەرێما کوردستانێ کربوو و راگهاندبوو «هەرێما کوردستانێ ل سالا 1992ان ژ بۆ دژاتیکرنا پەکەکێ هاتییە دامەزراندن»، ب تەنێ ئەڤ ئاخافتنا کالکان بەسە کو مرۆڤ بزانە نەرینا پەکەکێ ب گشتی ل سەر حکوومەت و پارلەمان و ستاتۆیا باشوورێ وەلات چیە، کالکان ژبیرکربوو کو دەما ل باشوور شۆرەش و خەبات ژ بۆ ئازادیێ دهاتن کرن تو دەنگوباسەک نە ل وی و نە ل رێبەر و نە ل پارتییا وی نەبوو، کالکان ژ بیر کرییە ئەڤ دەما 100 سالانە ل پەی هەڤ باشوورێ کوردستانێ د شۆرەش و بەرخوەدانێ دە یە هەیا کاری ستاتۆیا باشوورێ کوردستانێ ئاڤا بکە، ئه‌و ب هەموو روو قاییمی ئەو تێ و دبێژە باشوور ژ بۆ دژاتیکرنا پەکەکێ هاتییە ئاڤاکرن! گەلۆ دبە ئینسان چ قاس روو قاییم بە هەیا بکارە ئاخافتنەک ب ڤی ئاوایی و دۆر ژ کورداتی و لۆژیکێ ببێژە؟
گه‌لو ما قه‌ی پر ده‌م ل سه‌ر 20ی مه‌ها رابووری ده‌رباس بوویه كو ل بیرا مرۆڤ نه‌مینه؟
لێ به‌لێ یا راست، ئه‌ڤ ئاخافتنا سه‌بری ئۆك پر ژ راستی و حه‌قیقه‌تێ دووره، ژ به‌ر كو پارتییا ده‌مۆكرات ئا كورستانێ پاش ده‌ست پێ كرنا ئێریشا تركیێ هه‌ر راست داخو‌یانییه‌كه فه‌رمی پارڤه كر و تێده ئه‌ڤ ئێریش پرۆته‌ستۆ كربوو.
په‌ده‌كێ د داخوه‌یانییا خوه دا كو ل 20 مه‌ها رابووری پارڤه كر بوو دبێژه:
«ئه‌م پر ژ ئالۆزی و ئۆپه‌راسیۆنین له‌شكری، تۆپباران و بۆردۆمانێن تركیێ و ئیرانێ ل سه‌ر خاكا باشوورێ كوردستانێ دلگرانین كو بوونه سه‌ده‌ما ترسێ ل جه‌م گه‌لێ باشوور و نه‌ئارامییا ناڤچه‌یێن سینۆری، ئه‌ڤ نه مژارەک تازه‌یه، به‌لكو پر جاران دووباره دبه».
په‌ده‌كێ د داخوه‌یانییا خوه دا راگهاندبوو: «نها په‌كه‌كێ نێزی 500 گوندێن باشوور خستنه ژێر كۆنترۆللا خوه و مه خوه ل سه‌ر ڤێ مه‌سه‌لێ بێده‌نگ كرییه، لێ به‌لێ ئه‌گه‌ر ئه‌ڤ ره‌وش وها ده‌وام بكه، ئێریش وێ زرارێن مه‌زنتر ب هه‌رێما باشوور بگهینه و هه‌رێم وێ بكه‌ڤه خه‌ته‌ریێ».
په‌ده‌كێ د داخوه‌یانییا خوه دا جاره‌كه دن هه‌لوه‌ستا خوه ئا نه‌گۆر ته‌كه‌ز دكه و دبێژه: «پێویسته په‌كه‌كه و ئالیێن دن قادا شه‌ر و چالاكیێن خوه ببن جیێ وێ ئێ دروست و زێده‌تر نه‌بن سه‌ده‌ما مالوێرانییا گه‌لێ باشوور».
ب رۆژه‌كێ به‌را داخو‌یانییا په‌ده‌كێ، سه‌رۆكتییا پارلمه‌نا كوردستانێ و حكوومه‌تا باشوور داخویانی ل ده‌ربارا ئێریشان وه‌شاندن و تێده ب زه‌لالی ئه‌ڤ ئێریش پرۆته‌ستۆ كرن و خوه‌ستن كو په‌كه‌كه مه‌یدانا جه‌نگا خوه ڤه‌گوهێزه باكورێ كوردستانێ و ژ تركیێ خوه‌ست بوو رێزێ ل سه‌روه‌رییا كوردستانێ بگره.
بیردانكا ماسیێ
لێ به‌لێ په‌كه‌كه دخوازه باشوورێ كوردستانێ، رێڤه‌به‌ری و پارتیێن وێ وها بده نیشان دان كو ئه‌و ل سه‌ر ئێریشا تركیێ بێده‌نگ مانه، یان ئه‌ڤ داخویانیێن باشوور ل به‌ر چاڤێ په‌كه‌كێ نه‌كه‌تنە، یان ژی سه‌بری ئۆك كال بوویه و بیردانكا وی وه‌كه ماسیێ لێ هاتییه و وەکە ماسیێ زوو ب زوو بوویەران ژبیر دکە، ب گۆتنه‌كه دن، گه‌لو ما قه‌ی پر ده‌م ل سه‌ر 20 مه‌ها رابووری ده‌رباس بوویه كو ل بیرا سەبری نه‌مینه؟.
یا راست سه‌بری و رێڤه‌برییا قه‌ندیلێ خالا هه‌ری گرینگ ژبیر كرنه، وان ژبیر كرنه كو ئه‌ڤ نێزی 30 سالانه باشوورێ كوردستانێ ژ قۆناغا گه‌ریلاتیێ ده‌رباس بوویه، نها هه‌رێم خوه‌ده‌ی حكوومه‌ت، پارلمه‌ن و سازیێن فه‌رمی نه، په‌ده‌كه ژی هێزا هه‌ره سه‌ره‌كه‌یه د وان سازییان ده، واته هه‌ر تشتا كو ئه‌ڤ سازی دبێژه ته‌مسیلا نه‌رین و هه‌وله‌ستا په‌ده‌كێ دكه.
تشتا عه‌جێب كو د به‌رنامه‌یا «ستێرك» تی ڤی ده مه‌دیاكارێ په‌كه‌كێ ئێ ب ناڤێ محه‌مه‌د ئه‌مین، ته‌نێ پرسان دكه و ژ بۆ وه‌خته‌كا درێژ گوهدارییا سه‌بری ئۆك دكه، بێ كو تو دانوسته‌ندنه‌ك ل نێڤبه‌را وان ده چێببه، هه‌ر تشتا كو سه‌بری ئۆك دبێژه مه‌دیا كار د په‌ژرینه، لێ یا راست مه‌دیاكار ب خوه ژی ئاگاهی ل سه‌ر كارێ خوه ئێ رۆژنامه‌ڤانی نینن و وی ژبیر کرییە كو ئه‌و دكاره ب لێگه‌رینه‌ك کورت ل سه‌ر ئێنته‌رنێتێ و دو كلیكان ته‌ڤ گۆتنێن سه‌بری ئۆك ب دره‌وینیت، چونكه ئه‌ڤ داخویانیێن په‌ده‌كێ، حكوومه‌ت و پارلمه‌نێن باشوور د پێگه‌هێن وان ئێن فه‌رمی ده و د ته‌ڤ كه‌نالێن باشوور و ئیراقی ژی ده هاتبوون وه‌شاندن.
