سه‌ردانا بیرمه‌ند و رۆژنامه‌نڤیسێ فره‌نسی «بێرنارد هێنری لیڤی» ژ بۆ لیبیایێ، كارڤه‌دانه‌كه هه‌ری دژوار ل ناڤا رێزێن حكوومه‌تا ویفاق و میلیشیایێن وێ و گه‌لێ لیبیایێ ب خوه دروست كرییه.
ل گۆر چاڤكانیێن خوه‌جهی، «هێنری لیڤی» دوهـ رۆژا شه‌می 25/7/2020ان ب باله‌فره‌كه تایبه‌ت گهایه باله‌فرخانه‌یا باژارێ مسراته كو 200 كیلۆمه‌ترویان دكه‌ڤه رۆژئاڤا ته‌رابلوسێ.
هه‌ر چه‌ند كو د 24 ساعه‌تێن رابووری ده ئاگاهیێن جودا ل ده‌ربارا ڤێ سه‌ردانێ دهاتن وه‌شاندن، لێ به‌لێ ئیرۆ رۆژا یه‌كشه‌می 26/7/2020ان، «هێنری لیڤی» سه‌ردانا خوه ئا ژ بۆ لیبیایێ پشت راست كر و وێنه‌یه‌كێ خوه ل تویته‌رێ دانایه و ل سه‌ر نڤیساندییه ڤێره باژارۆكێ «ترهۆنه» یه، د وێنه‌ی ده خوه‌یا دبه كو هه‌ژماره‌كه زۆر ئا چه‌كداران ل دۆربه‌را «لیڤی» هه‌نه و پارێزڤانییا وی دكن.
لیڤی د داخوه‌یانییه‌كێ ده ژ بۆ كه‌نالا ئه‌حرار ئا گرێدای حكوومه‌تا ویفاق گۆتییه: «ئه‌و وه‌كه رۆژنامه‌ڤان هاتییه لیبیایێ ژ بۆ كو راپۆره‌كێ ژ بۆ رۆژنامه‌یا وول ستریت جۆرنال ئا ئامه‌ریكی ئاماده بكه».
تێ زانین «هێنری لیڤی» داوی جار ل سالا 2011ان سه‌ردانا لیبیایێ كربوو و ئاگاهی خوه‌یا دكن كو وی رۆله‌كا هه‌ر به‌رز د رازی كرنا فره‌نسایێ ده دیتبوو كو ئه‌سكه‌ران بشینه لیبیایێ و ئه‌ركا خوه د قۆناغا پاش قه‌زافی ده ببینه.
ل وێ ده‌مێ و پاش كو «لیڤی» پشتگری ژ بۆ ئۆپۆزسیۆنا لیبیایێ دیار كری و داخوازا مایتێكرنا ولاتێن فره‌نسا، ئا‌مه‌ریكا و بریتانیایێ د وی ولاتی ده كری، ژ ئالیێ گه‌لێن لیبیایێ ڤه وه‌كه كه‌سه‌كێ نه‌خوه‌ستی هات مێزه كرن، نها ژی ترس ل ناڤا لیبیا هه‌یه كو ئه‌ڤ سه‌ردان ئامانجا وێ كێشانا نه‌خشێ قۆناغ نوو ئا لیبیایێ به.
