ئارته‌شا ده‌وله‌تا سووریێ، ئیرۆ جاره‌كه دن ب دژواری بنارا چیایێ كورمێنج ئێ رۆژئاڤا ولات هه‌ده‌ف كر.
نه‌رینگه‌ها سووری ئا مافێن مرۆڤان ئه‌شكه‌ره كر، ئیرۆ رۆژا پێنجشه‌می 6/8/2020ان، تۆپهاڤێژێن ئارته‌شا ره‌ژیما سووریێ، ب دژواری ئێریشێ چیایێ كورمێنج ئێ رۆژئاڤا كوردستانێ كر، لێ به‌لێ تو ئاگاهی ل ده‌ربارا زرارێن جانی نه‌دانه.
ده‌ست نیشان كر، ئه‌نییا ب ناڤێ حه‌داده ئێ بنارا چیایێ كورمێنج كو دبه ئالیێ باكور ژ گونده‌وارێ لازقیێ كه‌تییه به‌ر ئێریشان، ل گۆر ره‌ژیما سووریێ تۆپبارانێ كۆمێن جیهادییان هه‌ده‌ف كرنه.
ل گۆر نه‌رینگه‌ها سووری، شه‌رێن دژوار ل ناڤبه‌را كۆمێن جیهادی و ئارته‌شا ره‌ژیما سووریێ ل ئه‌نییا حه‌داده هه‌نه، گرێدای ڤێ ئارته‌شا سووریێ ناڤچه‌یێن باكورێ رۆژئاڤا حه‌مایێ، رویحه و بینین و دۆربه‌را ناڤچه‌یێن باره و كه‌نسه‌فره ل گونده‌وارێ ئدلبێ ل كۆمێن چه‌كداران خستنه.
تێ زانین ل داوییا مه‌ها رابووری باله‌فرێن رووسیا فه‌ده‌رال چه‌ندین جاران بنارا چیایێ كورمێنج كو ل سه‌ر هه‌رێما عه‌فرینێ تێ حه‌ساب كرن هه‌ده‌ف كربوون، شێنیێن بنارا چیایێ كو پرانی ژێ كوردن، نه‌چار مانه جیێن خوه ڤالا بكن.
چیایێ كورمێنج، ناڤچه‌یه‌كه چیایێ یه پرانییا رووبه‌رێ هه‌رێما عه‌فرینێ ل خوه دگره، دارێن زه‌یتوونا هه‌ری زێده لێ هه‌نه.
