سیاسه‌تمه‌دار و ولاتپارێزێ كوردێ رۆژهلاتا كوردستانێ، جه‌لیل گادانی ئیرۆ رۆژا پێنجشه‌می ل یه‌ك ژ نه‌خوه‌شخانه‌یێن هه‌رێما باشوورێ كوردستانێ، كۆچا داویێ كر.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كرن، سه‌ركرده‌یێ پارتییا ده‌مۆكرات ئا كوردستانێ (حدك) جه‌لیل گادانی ئیرۆ رۆژا پێنجشه‌می 6/8/2020ان ب سه‌ده‌ما كه‌تنا وی ب ڤیرۆسا كۆرۆنایێ ل یه‌ك ژ نه‌خوه‌شخانه‌یێن باشوور جانێ خوه ژ ده‌ست دا.
ل ڤێ ده‌ربارێ ده، پارتییا ده‌مۆكرات ئا كوردستانێ (حدك) داخوه‌یانییه‌ك پارڤه كرییه و تێدا كۆچا داویێ یا گادانی ئیلان كر.
د داخوه‌یانییا (حدك) ده وها هاتییه نڤیساندن: ب داخ و كه‌سه‌ره‌كه پر مه‌زن ڤه، ئیرۆ كاك جه‌لیل گادانی سیاسه‌تمه‌دار و كه‌ساتیێ دیارێ كورد و ته‌كوشه‌رێ دێرینێ حزبا دیمۆكراتا كوردستانێ و ته‌ڤگه‌را سیاسی یا كورد، پاش ب ده‌هان سالێن خه‌باتا ل پێناڤێ رزگارییا نه‌ته‌وه‌یا خوه، كۆچا داویێ كر.
جه‌لیل گادانی ل سالا 1934ان ل باژارێ مه‌هابادێ ئێ رۆژهلاتا ولات ژ دایكبوویه، ل سالا 1948ان بوویه ئه‌ندامێ (حدك) و پشتره ل سه‌رده‌مێ ره‌زا شاهی ل سه‌ر چالاكیێن سیاسی، 13 سالان تێ زیندان كرن.
جه‌لیل گادانی ل گه‌ل هه‌ژماره‌كه كادرۆیێن دن ل سالا 1988ان ژ حدكێ جودا دبن و ب ناڤێ پارتییا دیمۆكراتا كوردستانێ ئیرانێ خه‌باتا خوه د دۆمینن، جه‌لیل گادانی پشتره دبه سه‌كره‌ته‌رێ پارتیێ.
ل سالا 1996ان جاره‌كه دن ل گه‌ل (حدك) یه‌ك دگرن و پشتره گادانی وه‌كه ئه‌ندامێ سه‌ركردانیێ تێ هلبژارتن، گادانی به‌را كو كۆچا داویێ بكه، به‌رپرسیارێ كۆمسیۆنا چاڤدێرییا (حدك) بوو.
