نڤیسكار: بووبێ ئه‌سه‌ر
ئەم ئەو کوردێن نە پەکەکەیی نە، بوونە وەکە تو مارێ چۆ ل سەری بخە. مە ئێدی ئەو پێڤاژۆیا ئەم تێ رە دەرباس بوونە، داخواز و ھەلوەستێن خوەیێن بەرێ ژ بیر کرنە.
سەدەما ژ بیر کرنا مە ئەو کو ژ سالا ١٩٨٤ان و ڤردە مە بێتر کارێ خوە کرییە پەکەکە ئەم ھەر بەحسا وێ، کریار و بوویەرن وێ، نەباشی و خەرابیێن وێ دکن. مە کوردستان و جیھان ل خوە تەنگ کرییە و تەنێ ب پەکەکێ ڤە مژوولین. ژ خوە ئەڤ ژی داخوازەکە وان بوو.
ھەلبەت حەقێ مەیە کو ئەم ل دژی شاشی و نەباشیێن پەکەکێ دەرکەڤن. لێ ھنگێ ئەم کەتن ناڤا ڤێ، ئێدی مە کارێ خو، ھەلوەست و بریارێن خوەیێن ژ بۆنا کوردستانەکە ئازاد و سەربخوە ژ بیر کر.
مە وەکە تەڤگەرا کوردێن وەلاتپارێز کو ژ وەلاتێ خوە، ژ خەلکێ خوە حەز دکن، ئەم نە فکرین کو ژ بۆنا ئازادیا گەل و سەرخوەبوونا کوردستانێ مە خوە ب رێخستنیەکە نەتەوەیی و ھەڤکاریا ھەڤ نەکر.
ھەر ئەم تەنگ مان، زەئیف کەتن، بێ ھێز و قاوەت مان لۆما ژی ب زانەتی ئان ب نەزانی مە رۆژەڤ ب دەستێ پەکەکێ دە بەردا. ب ڤێ ژی ئەم کەتن بن باندۆرا پەکەکێ کو ئێدی ھێ ژی مە خوە ژێ ئازاد نەکرییە.
ل باکورێ کوردستانێ وەھا ھاتیە کو ئێدی ب ڤی حالی ب ڤان رێخستنێن ھەنە، ئەم نکارن خوە ژ بن باندۆرا پەکەکێ ئازاد بکن و نکارن وەکە تێ خوەستن کو ئەم ل سەر خەتا نەتەوەیی پارتیێن خوە، تەڤگەرێن خوە و دەزگەھێن خوە دامەزرینن.
لۆما دبێژم مە ھەمی تشتێن خوە، ھێژاییێن وەلاتێ خوە، ب دەستێ پەکەکێ بەردایە و ئەم ھا ھا تەنێ وێ رەخنە دکن. ب ڤان رەخنەیان ژی ئەم ھەر پەکەکێ ب ھێزتر و خوە ژی کێمتر ئانگۆ قەلستر دکن.
پەکەکە ژی کەتیە ناڤا پارتی و تەڤگەرێن کوردان ھا ھا وان ژ ھەڤ پەرچە دکن، دەم و دەزگەھێن ھەنە ھەمی خستنە بن کۆنترۆلا خوە. وەھا بوویە کو ئێدی تو ل باکورێ کوردستاکێ بێ پەکەکە نکاری گاڤەکێ باڤێژی. لێ کەس ڤێ نابێژە.
وەشانخانەیێن ل باکورێ کوردستانێ ھن ئیستیسنا نە تێ دە، یێن دن ھەمی ب بن کۆنترۆلا پەکەکە دەیە. ئەو چاوا دخوازن وەھا دکن. وەشانخانە ب سەرێ خوە نکارن تەڤبگەرن ئان بەرھەمێن ل گۆر دلێ خوە بوەشینن. ژ بەر کو پەکەکەیا ب پەرانیا ژی ب زۆرێ ھەمی کرنە بن ئەمرێ خوە کو بێ وێ نکارن تشتەکی بکن.
ھن بەرھەمێن تێنە وەشاندن ژی ھەگەر تو ل سەر نڤیساکار و وەشانخانەیا کو ئەو وەشاندیە لێکۆلینەکێ بکی تالیا وی/ێ دھەرە خەتا پەکەکێ ئانگۆ ب ناڤێ ژ وان قەتیایە کارێ خوە و وان دکن.
جار جارنا ژی یێن ھن نڤیسکارێن پەرچێن دن کو زەرارا پەکەکێ تێ دە تونە بە ددن وەشاندن دا کو روویێن خوەیێن پەکەکەیی ڤەشێرن.
جارەکێ بفکرن و ببینن کو بێ چما بەرھەمەکە ل سەر بارزانیا نایێ وەشاندن. (ژ بلی رۆمانا من بارزان دگری ئەو ژی ب وەشاندنا ڤێ قەدەخەیەکە توند ل سەر وەشانخانێ ھاتە دانین دا کو ئەو جارەکە دن کارەکی وەھا نەکە و نەما دکە ژی. ژ بەر کو ھەر تشت ئێدی بوویە ترس و بەرژەوەندیێن سەخسی) گەلۆ قەت ئەم وەکە کورد ل سەر ڤێ راوەستیانن. گەلۆ د ڤێ دەرحەقێ دە پارتی و رێخستنێن مە رۆژەکێ تشتەک گۆتنە ئان نڤیسینە.
نا نڤیسینن و نائاخفن ژ بەر کو ئەڤ ژ بۆنا پارتی و رێخستنێن ناڤێ وان مەزن، نکارن ب کارێن وەھا ب چووک رە مژوول ببن(!). لێ فێم ناکن کو مالوێرانیا مەزن ئەڤە، فێم ناکن، خەرابی ئان ب سەرکەتنا وان د رێیا کارێن ب چووک دە دەرباس دبە.
چارەسەری:
ھەتا رێخستن و پارتیێن مە، ھێزێن خوە نەکن یەک. دەست نەهاڤێژن وەشانخانا، رۆدیۆ و تەلەڤزیۆنێن نھا مرۆڤ دکارە ل سەر ئنتەرنەتێ ڤەکە، وێ ھەر د ڤی حالێ خوە یێ خەراب و کێم ھێز دە بژین. ژ بەر کو یێن من ب ناڤ کری نھا د دەستێ پەکەکێ دە نە. چاوا دخوازن وەھا ب کار تینن. ڤێ ژی ب سایا قاشۆ کەسێن ژ وان قەتیانن دکن.
ژ بۆنا پارتیەک ئان ھێزەک ببە، ئالتارناتیف دبێ بەری ھەر تشتی ژ کارێ ب چووک دە دەستپێ بکن. وەشانخانەیان ڤەکن دا کو بەرھەمێن باش کو کورد ژ دەرسەکێ بگرن بوەشینن. ب ڤێ نڤیسکاران ژی دکن ھەڤالبەندێن خوە. لێ ناکن، یێ ڤێ ژی دکن پەکەکەیە.
پارتی و دەزگەھێن مە، ب سایا مەدیایەک خورت دێ بکاربن د ھەر وار و قادی دە ببن خوەدی ماف، ھەق و ھوقووق. لێ ڤێ ژێ ناکن ئان نکارن بکن. تەنھا ب رەخنەکرنا پەکەکێ ئەم نکارن فکرێن وێ یێن شاش تێر ببن، ئەکسێ وێ ب ڤان رەخنەیێن بێ ئالتارناتفی ئەم پەکەکێ خورتر دکن.
پەکەکێ باکورێ کورستانێ حال کرییە، پرانیا پارتی و کەسایەتیێن وەلاتپارێز، کورد و کوردستانی، یان وێ یان ژی ب رێیا دەولەتێ بێدەنگ کرییە. لۆما دبێژم؛ ھەتا ھێزەکە، تەڤگەرەکە خورت دەرنەکەڤە، کەس نکارە و نەوێرر د دەرحەقێ پەکەکێ دە تو تشەکی بێژە. ب ڤێ ژی پرانیا کەسان خوە وەکە پەکەکە رێ ددن. سەدەم ژی بێ ئالتارناتیفی یە.
ل گۆر من سوچدارێ ڤێ ژی ئەو سەرۆک و رێڤەبرێن کو نھا خوە وەکە بەرپرسێن پارتیێن ل باکورێ کوردستانێ ھەنە و خوە وەکە پارتیێن کورد و کوردستانی دبین نە. گەلۆ ڤان پارتیێن، سەرۆک و رێڤەبرێن وانیێن بێ واتە نە کو ھەر یەک ب سەرێ خوە دکارن چ بکن؟ ئان چ دکن؟ ژ بلی خەباتێن ڤالا، مەسرەفێن زێدە و ھێزێن بێ ھێز تو فێدا وان تونەیە.
ژ بەر ڤێ پەکەکە ھەتا نھا چ خوەستبە ئەو کرییە و دکە. کوردستانەکە سەربخوە ناخوازە، پاراستن و مافێ کوردان ناخوازی. لێ مخابن پارتیێن مە ژی ھەر یەک ب دەھ کەسان ل کێفا خوە دنێرن و ئەندام ژی نکارن ڤێ ژ وان بپرسن. ئاھا مالوێرانی ئەڤە…
