ب سه‌ده‌ما په‌كه‌كێ ئیرۆ 8 گوندێن باشوور هاتنه‌ بۆمبه‌ كرن

ئێریشا ده‌وله‌تا ترك ئا ل سه‌ر باشوورێ كوردستانێ دژوار بوویه‌ و ته‌نێ د ئیرۆ ده‌، 8 گوند ب رێیێن هه‌وایی و به‌ژاهی هاتنه‌ بۆمبه‌ كرن، 5 ژێ ب سه‌ده‌ما ئێریشان هاتنه‌ چۆل كرن.

ل گۆر ئاگاهیێن چاڤكانیێن پێگه‌ها داركا مازی ل باشوورێ كوردستانێ، ئیرۆ رۆژا شه‌می 8/8/2020ان، باله‌فرێن جه‌نگ ئێن ده‌وله‌تا تركیێ د ته‌عقیبا حه‌ره‌كه‌تێن په‌كه‌كێ ده‌، هه‌ژماره‌كه‌ گوندێن باشوورێ ولات ل سینۆرێ پارێزگه‌هییا دهۆكێ خستنه‌ به‌ر بۆردۆمانان.

ئێریش ژ سه‌رێ سبێ بێ ناڤبر ل گوندێن دۆربه‌را باژارێ زاخۆ وه‌كه‌ گوندێن منینێ، بانكێ، پیربلا و چه‌مكوركێ و دو گوندێن دن ده‌ست پێ كربوو، ئاگاهی ددن خوه‌یا كرن كو باله‌فران و تۆپهاڤێژێن ده‌وله‌تا تركیێ ب ده‌هان مۆشه‌ك ل وان گوندان خستنه‌ و زرارێن مه‌زن ب باخ و بیستانێن وان گوندان كه‌تنه‌.

ب سه‌ده‌ما ئێریشێن ئیرۆ شێنیێن 5 گوندان، گوندێن خوه‌ چۆل كرن و ته‌نێ گوندێ بانكێ مایه‌ هێژان شێنی تێده‌ جی دگرن.

هه‌ر نیڤرۆژا ئیرۆ، باله‌فران بلنداهیێن چیایێ لینكی كو دبه‌ ئاقارێ گوندێ هێتیتا كه‌ڤن ل سینۆرێ باژارێ دیره‌لۆكێ هه‌ده‌ف كر، هه‌موه‌خت ئاقارێ گوندێ سیته‌ ل سینۆرێ شێلادزێ كه‌ت به‌ر مۆشه‌كان.

ده‌وله‌تا تركیێ ل 15 مه‌ها خزیرانا رابووری ئێریشا سه‌ر باشوورێ كوردستانێ ده‌ست پێ كر، هه‌ركو دچه‌ په‌كه‌كه‌ مه‌یدانا شه‌رێ خوه‌ و تركیێ نێزی گوند و باژارۆكان دكه‌ و ب وێ سه‌ده‌مێ، ل دوو مه‌هێن رابووری نێزی 50 گوندێن باشوورێ كوردستانێ هاتنه‌ ڤالا كرن.