ئیرۆ پێش نیڤ رۆژێ پەڤچوون دناڤبەرا پەکەکێ و ھێزێن پاسەوانێن سینۆرییێن عیراقی دروست بوون، ژ بەر ڤێ یەکێ ھەژمارەک ژ فەرماندارێن پاسەوانێن سینۆری یێن عیراقێ ل ناڤچەیا برادۆست ژ بۆ هوشداری دان ب پەکەکێ چوونە جەم پەکەکێ و جڤینەک لدارخستیە.
ھات ھین بوون د دەما جڤینا پەکەکێ دگەل فەرماندارێن پاسەوانێن سینۆری یێن عیراقێ دە، بالەفرەک بێ پیلۆت ئەو جی بۆردۆمان کریە، لێ ھەیا نھا نایێ زانین ھەژمارا قوربانیان چەندن.
ئەڤ جڤین ل کیستانێن بێرمێ دینداران ل سینۆرێ باژارۆکێ سیدەکان ل قەزا سۆران ھاتبوو لدارخستن، پشتی کو پەڤچوون دناڤبەرا ھەر دو ئالیان دە روودای.
ھات ھینبوون پشتی کو پەڤچوونێن دناڤبەرا پەکەکێ و ھێزێن پاسەوانێن سینۆرییێن ئیراقێ ل دەڤەرا سیدەکانیا باژارێ سۆران دروست بووی، شڤانەکی کورد ژ ئالیێ چەکارێن پەکەکێ ڤە ھات بریندارکرن.
د ڤێ دەربارێ دە بەرپرسێ نەخوەشخانەیا ناحیا سیدەکان یا باژارێ سۆران، در. کاروان فەیسەل راگھاند، ئیرۆ دانێ سبێ وەلاتییەک ب ناڤێ مەناف عەبدوڵاھ خدر (٥١ سالی)، کو شڤانتیێ دکە و خەلکێ گوندەکی ناحیا حەریرە، ئانین نەخوەشخانێ کو گوڵە ل پیێ وی کەتبوو گران بریندار ببوو.
در. کاروان فەیسەل ھەر وھا گۆت، ئەو وەلاتیێ کورد ل زۆزانێن سیدەکان و ل بەر پەز ھاتبوو بریندارکرن. برینا وی گران بوو ژ بەر وێ ژی مە ئەو شاند باژارێ سۆران.
قایمەقامێ سۆران، کرمانج عزەت ژی ل سەر ڤێ مژارێ داخوەیانی دا راگھاندنێ و گۆت، ئەو شڤان ل زۆزانا بەربزنێ و ژ ئالیێ چەکدارێن پککێ ڤە ھاتیە بریندارکرن. نھا ل نەخوەشخانێ ھاتیە رازاندن.
