نڤیسكار: بووبێ ئه‌سه‌ر

داکو ئەم رەوشا باکورێ کوردستانێ باش ناس بکەین و دیرۆکا وێ فێم بکەین، دڤێ ئەم ھنەکی ل دەمێن ژ سالێن ١٩٢٠ و ھەتا ٢٠٢٠ان بنێرن ئان بخوینن. بزانبن ژ وێ دەمێ ھەتا نھا چ بوویە و چ قەومییە…

دەما مە خوەند ئەمێ چ فێر ببن؟

بەری ھەر تشتێ ئەمێ فێر ببن کو سەدەما تێکچوونا ھەمی سەرھلدانان ل باکورێ کوردستانێ ژ بۆنا چ بوو؟ دەما ئەم فێری سەدەمێن وەنداکرنێ بوون، وێ گاڤێ ئەمێ ژ نوودە ژ بۆنا کو ئەم وەکە کوردێن باکورێ کوردستانێ ب سەر بکەڤن،  دەستوور و بەرنامەیێن خوە، ھەلوەست و بریارێن خوە راگھینن و ل گۆر وێ تەڤگەرێن نوو بخولقینن ئان یێن ھەیی خورت بکن.

ل باکورێ کوردستانێ چ دەما ژ بۆنا ئازادی و سەرخوەبوونا وێ سەرھلدان، بەرخوەدان و شۆرەشا ژ بۆنا ئازادیێ پێک ھاتبە، ھن سەرۆک عەشیر و دەولەمەندێن کوردان  تم جھێن خوە ل با داگیرکەران گرتبوون و ئالکاریا وان کربوو دا کو بەرخوەدانا ژ بۆنا کوردستانەکە ئازاد و سەربخوە تێک ھەرە.

ژ بۆنا ڤێ یە کو ھەبوونا ھن عەشیرێن کوردێن کو ل با دژمن جھێ خوە گرتبوون و بوو بوون سەدەما تێکبرنا شۆرەشێن کو دەستپێکربوون. یا راستی ژ کوردان پێڤە تو کەس نکارن ب کوردان. لۆما پێشیێن مە گۆتنە؛ ”کرمێ دارێ نە ژ دارێ بە، نکارە ب دارێ”.

ڤێ رەوشێ ھەتا تێکچوونا شۆرەشێ ل دێرسیمێ دۆماند. ژێ و پێڤە داگیرکەرێن ترک ب سایا ھن عەشیرێن خوەفرۆش ب سەر کەتن. لێ پشتی ترکان ئەڤ سەرکەتن ب دەست خستن، ڤێ جارێ ژی دەست ئاڤێتن ئێشیرێن کو ئالیکاریا وان کربوون و دەستێن وان ژی کەتبوون خوینا برایێ وان.

داگرکەرێن ترک پشتی ب سەرکەتن، ئێدی دۆر دھات عێشیرێن ئالیکاریا وان کربوون. ھن کۆچبەری ناڤا ترکان کرن و گەلەک ژ وان دانە کوشتن. کوشتن و گۆتن؛ ”کەسێن ژ خوە رە نەبن تو جاران نکارن ژ مە رە ببن:”

پشتی تێکچوونا شۆرەشا دێرسیمێ، باکورێ کوردستانێ ب تەمامی کەتە، بێدەنگیەکە کوور. ژ بەر کو کورد ئێدی ژ کوشتن، وێرانکرن و کۆچبەرکرنێ ترسیان، لۆما ژی خوە بێ دەنگ کرن.

پشتی سالێن ١٩٦٠ ب خوەندنا ھن کوردێن جوان کو ل باژارێن ترکان یێن مەزن خوەندن، ل دۆزا خوە ویا گەلێ خوە هین بوون، ڤێ هین بوونێ ھێدی ھێدی کورد ژ وێ خەوا بێدەنگیێ شیار کر.

ھەلبەت شیاربوونا وان، نە تەنێ ئەڤ بوو. ژ بەر کو ل باشوورێ کوردستانێ ب دەستپێکا شۆرەشا ئیلۆنێ کو ب سەرۆکاتیا بارزانیێ نەمر، دەستپێ کربوو، تەسیر و شیاربوونەکە نوو دا ھەمی کوردان.

ھێدی ھێدی تەڤگەر د ناڤا جوان و خوەندەکارێن کورد، ل باکورێ کوردستانێ دەستپێ کر. پشتی سالا ١٩٧٠ ئێدی ژ تەرەف ئاقلمەندێن ترکان ڤە پر ب زەلالی ھات دیتن و زانین کو وێ کورد ژ نوو دە دۆزا گەلێ خوە یا ئازادی و سەرخوەبوونێ بکە.

پشتی کو تەڤگەرا جوان و خوەندەکاران خورت بوو، داگیرکەران رەوش فێم کرن. فێمکرن کو ئێدی ئەوێ نکاربن پێشیێ ل سەرھلدان و بەرخوەدانا کوردان بگرن  ترکان ئێدی فێم کربوون کو وێ ڤێ جارێ نکاربن پێشیێ ل تەڤگەرا گەلێ کورد یا ب سالان بێدەنگ مای، بگرن.

چ کرن؟

ئاھا یا گرینگ کو دڤێ ئەم ھەمی کوردێن ژ خوە رە دبێژن ”ئەم کورد و کوردستانی نە” ل سەر ڤێ و د وارەکی پر ئالی بفکرن کو ئەم بکاربن ڤێ فێم بکن.

ترکان ئێدی ل باکورێ کوردستانێ نەما دکاریبوون، ھن عەشیران بکشینن ئالیێ خوە دا کو وەکە زەمانێ بەرێ ب سایا وان دیسا تەڤگەر و سەرھلدانێن کوردان ب دەستێ ھن کوردان بتەمرینن.

دەما  رۆژ ب رۆژ تەڤگەرێن کوردی یێن وەلاتپارێز گەش و خورت دبوون، ئێدی خوە دکرن پارتی و پارتیێن خوە دامەزراندن دا کو ب رێڤەبریا وان تەکۆشینەکە نوو بێ دایین. ژ بۆنا کوردان خوە گهاندبا قۆناغا سەرھلدانێ، دڤێ بەرێ بخوەندبا و زانا ببان. شەرت و مەرجێن شۆرەشەکە نوو دانین، دا کو ڤێ جارێ تێک نەچوونا.

ئاھا تام د ڤێ حازریێ دە،ترک گھشتن وێ باوەری کو وێ ڤێ جارێ نکاربن ب سایا ھن عەشیران پێشی ل ڤێ تەڤگەرا جوانان بگرن، لۆما دەست ب ئاڤاکرنا پارتیەکە ب ناڤێ خوە کورد و کوردستانێ کرن دا کو ب سایا ڤێ کوردان بکشینن ناڤا خوە و وێ داخوازا خوەیا تێکبرنا تەڤگەرا کورد پێک بینن. لۆما ب ناڤێ پارتیا کارکەرێن کوردستانێ. یانی پەکەکە دامەزراندن. سەرۆکاتیا وێ ژی کرن زلامێن خوە.

ژ وان رە دەستوور و بەرنامەیەکە ل گۆر دل و داخوازێن کوردان ئامادە کرن. ب سروود و داخوازن مەزن پەکەکە ژی خستن ناڤا تەڤگەرا کوردێن باکورێ کوردستانێ. بێ کو شەرت و مەرجێن شۆرەشێ بکەملا وان ب پەکەکێ قاشۆ شۆرەشەک دا دەستپێکرن.

ئارمانج و ھەدەفا داگیرکەران ئەو بوو کو ڤێ جارێ ژی ب سایا پارتیەکە ل سەر ناڤێ کوردان، لێ ژ بۆنا تێکبرنا تەڤگەرا کورد و ھەمی ھێژایی یێن وێ تێک ببن، دامەزراندن. ھەر ئەڤ کرن و د گەلەک واران دە ب سەر ژی کەتن.

ژ رۆژا پەکەکە دەرکەت و حەتا ئیرۆ، کارێ خوە ل گۆر وێ دەستوور و بەرنامەیا ترکان ژ وان رە حازر کربوو، پێک ئانین و تینن.

ژ بۆنا نڤیس درێژ نەبە، ناخوازم بەحسا کریار و بوویەرێن پەکەکێ یا ژ بۆنا تونەبوونا کوردان، بکن. دڤێ ھەر کورد ژ نوودە ل سەر دیرۆکا پەکەکێ راوەستن. ئەڤ پارتی چاوا و ل سەر چ ئەساسی ھاتبوو دامەزراندنێ، ببینن.

ببینن و بزانبن کو پەکەکە ھێژی کارێ خوەێ ژ بۆنا تونەکرنا کوردان، وێرانیا وەلاتێ کوردان و گوھەراندنا مەژیێ کوردان، بەردەوام دکە.

ژ بەر ڤێ ژی ھێدی ھێدی کەمالیزم ب کوردێن خوە رە شێرین کرن و دا قەبوولکرنێ. ل گۆر وێ ئیدەۆلۆژیا کەمالیزمێ ھن ژ کوردێن خوە کرن کادرۆیێن ئەساسی و خستن ناڤا کوردان دا کو تەڤگەرەکە کورد و کوردستانێ چێ نەبە، ئان دەرنەکەڤە…

ھێڤیدارم کو ب ڤێ نڤیسێ من دابە زانین کو چما تەڤگەرێن کوردێن باکورێ کوردستانێ  ب سەرنەکەتنە. دێ کا ھوون ژی بفکرن و رەوشێ ژ نوو ڤە ل بەر چاڤان بگرن.