ل قامشلۆیێ PKK ئێریشی نڤیسینگەها PDK-S کر
شەڤا بووری ل باژارێ قامشلۆ نڤیسگەھا پارتیا دەمۆکراتا کوردستانێ – سووریێ (PDK-S)یا ل رۆژھلاتێ قامشلۆ راستی ئێریشێ ھاتبوو، ئالا کوردستانێ ھاتبوو بۆیاخکرن و ھن سلۆگانێن پەکەکێ ل سەر دەریێ نڤیسگەھێ ھاتبوو نڤیساندن. بەرپرسێن پەدەکە-سێ ژی گرووپا تەڤگەرا جوانێن شۆرەشگەر ب وێ ئێریشێ تۆمەتبار کربوو.
شەڤا بووری جڤاتا لۆکالی یا رۆژهلاتێ قامشلۆیێ ئا سەر ب جڤاتا نەتەوی یا کوردی د رووپەلا خوە یا فەیسبووکێ دە راگهاند کو کۆمەکە ب ناڤێ جوانێن شۆرەشگێر ئاگر ل بەر دەرییێ نڤیسینگەها پارتییا دەمۆکرات ئا کوردستانێ- پەدەکەسێ ل قامشلۆیێ هلکرییە، ئالا کوردستانێ بۆیاخکرییە و سلۆگانێن حزبا خوە “پەکەکێ” ل سەر دەریێ نڤیسینگەهێ نڤیساندینە.
ژ ئالیێ خوە ڤە تەڤگەرا جوانێن شۆرەشگەر رەد دکە کو تێکلیا وان ب ئێریشا ل سەر نڤیسگەھا پارتیا دەمۆکراتا کوردستانێ – سووریێ (PDK-S) رە ھەبە و وێ ئێریشێ ل دژی یەکیتیا گەلێ کورد ب ناڤ دکە.
ئیرۆ د داخوەیانیەکێ دە گرووپا ب ناڤێ تەڤگەرا جوانێن شۆرەشگەر دەربارێ ئێریشا شەڤا بووری ل سەر نڤیسگەھا PDK-S داخویانی دا و رەد کر کو ت پەیوەندیەک وان ب وێ ئێرشێ ھەبە و راگھاند، د دەما راگھاندنە پێنگاڤەکە وان دە ل قامشلۆ، ھن کەسێن نەناس کو خوەستن پێنگاڤا وان د بن سیێ دە بھێلن، ل سەر دەریێ نڤیسگەھا پەدەکە-سێ ھن پەیڤ نڤیساندنە.
تێ زانین کو ئەڤ جارا یەکەمین نینە ل رۆژئاڤا کوردستانێ ئێریشی نڤیسینگەهێن PDK-S تێ کرن، پێش نها ژی چەندین جاران ئەڤ یەک هاتیە ئەنجامدان لێ ت جاران تو کەسەک ژ ئالی دەزگەهێن ئەولەهیێ یێن رۆژئاڤا کو سەر ب پەکەکێ ڤە نە، نەهاتینە دەستەسەرکرن و ت جاران ئەڤ کارە ژ هێلا پەکەکێ ڤە نەهاتینە پرۆتەستۆکرن.
