٣٢ سال ل سەر ئەنفالا بادینان دەرباس دبیت و سەرۆکوەزیرێ ھەرێما کوردستانێ ب ڤێ هەلکەفتێ دبێژیت: : باندۆرێن ئەنفالێ حەتا ب دەھان سالێن دی ژی دێ مینن.
ئەنفالکرنا بادینان کو دوماهیک پێلا ئەنفالێ بوو، ژ ٢٥ێ تەباخێ و حەتا ٦ێ ئیلۆنا ١٩٨٨ێ، ھەموو ناڤچەیێن بادینان ب خۆ ڤە گرتن و تێ دا کیمیاباران، گرتن، کوشتن، وێرانکرنا مزگەفت و دێران و ناڤچەیێن بادینان ژ لایێ رەژیما بەعسا ئیراقێ ڤە ھاتنە ئەنجامدان.
سەرۆکوەزیرێ ھەرێما کوردستانێ ئەڤرۆ ب وێ هەلکەفتێ پەیامەک بەلاڤ کر و راگەھاند، ژ بۆ گەلێ کوردستانێ، ئەنفال نە ب تنێ بوویەر و ھەژمارە، بەلکوو جینۆسایدکرن و ھەولا نەهێلانا ملەتەکێ ب دیرۆک، جیۆگرافیا، شوونوار و ژینگەھە.
دەقا پەیاما سەرۆکوەزیرێ ھەرێما کوردستانێ ب هەلکەفتا سالڤەگەرا ئەنفالکرنا بادینان:
بەری ٣٢ سالان رەژیما بەعسا ئیراقێ د چارچۆڤەیا پرۆسەیا ئەنفالان دا، دوماهی قۆناغا ئەنفالێ ل بادینان ئەنجام دا و د وێ پێلێ دا ب ھەزاران کەس ھاتن شەھید و وندا کرن و ب سەدان گوند ژی وێران کرن.
ژ بۆ گەلێ کوردستانێ، ئەنفال نە تەنێ بوویەر و ھەژمارە، بەلکوو جینۆسایدکرن و ھەولا نەھێلانا ملەتەکێ ب دیرۆک، جیۆگرافا، شوونوارێ ژینگەھە کو باندۆرێن وێ حەتا دەھان سالێن دی ژی دێ مینیت.
ئەڤ بیرئانینا خەمگین، پێویستە ھەر دەم مە زێدەتر پال بدەت ژ بۆ بەرەڤانیکرنا ل مافێن ملەتی یێن رەوا و بیرئانینا قوربانیێن وان تاوانێن ل ھەمبەر گەلێ کوردستانێ ھاتنە کرن. یەک ژ وان مافێن مەیێن یاسایی و دەستووری ژی، قەرەبووکرنا کەسووکارێن ئەنفالکریان ل گۆر بریارا دادگەھا تاوانان یا ئیراقێ یە.
د داویێ دا، سەرێ خۆ ب رێز بۆ شەھیدێن ئەنفالێ و تەڤاھیا شەھیدێن رێیا رزگاریخوازا کوردستانێ دتەوینم.
