باله‌فرێن جه‌نگ یێن ده‌وله‌تا تركیێ ئیرۆ ل ده‌ڤه‌را زاپێ یا ل باشوورێ كوردستانێ دایه، 2 گه‌ریلایێن په‌كه‌كێ جانێ خوه ژ ده‌ست دا.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا سێشه‌می 25/8/2020ێ باله‌فرێن ده‌وله‌تا تركیێ ئێریشێ ده‌ڤه‌را زاپێ كرییه و ل خالێن په‌كه‌كێ خستییه، 2 گه‌ریلایێن په‌كه‌كێ جانێ خوه ژ ده‌ست دا.
ل ڤێ ده‌ربارێ دا، وه‌زاره‌تا پاراستنا نه‌ته‌وه‌یی یا تركیێ ل حه‌سابا خوه یا تویته‌رێ ئه‌ڤ ئاگاهی به‌لاڤ كرنه و دیار كر كو د ئێریشا سه‌ر زاپێ دا زرارێن جانی ب په‌كه‌كێ كه‌تنه.
ده‌وله‌تا تركیێ ل 15 مه‌ها خزیرانا ئیسال 2020ێ، ئێریشه‌كا مه‌زن ب سه‌ده‌ما په‌كه‌كێ ل سه‌ر باشوورێ كوردستانێ ده‌ست پێ كرییه، ژ وێ ده‌مێ ڤه ب ده‌هان گوندێن باشوور ب تایبه‌ت ل سینۆرێ پارێزگه‌ها دهۆكێ هاتنه ڤالا كرن، خه‌لكێ وان گوندان ژی گازنده ژ په‌كه‌كێ هه‌نه و ئه‌و دخوازن په‌كه‌كه خوه نێزی گوندێن وان نه‌كه‌ت ژ بۆ كو نه‌كه‌ڤن به‌ر ئێریشان.
