دوران کالکان د ھەڤپەیڤینا خۆ یا شەڤا 24ێ تەباخێ دا ل سەر مهزوپۆتامیا TV، کو یەک ژ وان سازیێن مەدیایا پهكهكێ یە، د ئاخافتنا خۆ دا ل دژی پێشمەرگەی پەیڤ و تاوانباریێن بالکێش کرن.
دوران کالکان ئەڤه گۆت: «مه دڤێت ھەموو ھێزێن کوردی ل دهوربهرێن خۆ ببینین، گەریلایان دڤێت ل گەل پێشمەرگەی مل ب ملێ ههڤ ل دژی داگیرکەران شەری بکهن، لێ دیاردە دەستنیشان دکهن کو پێشمەرگە ل ئالیێ سوپایێ ترکیێ رادوهستیت، ئهوێن کو ل ترکیێ پشتگرییا ئاکهپێ و مهههپێ دكهن فاشێستن، ئهوێن ل کوردستانێ ژی پشتگریێ لێ دکەن خائینن».
رێڤەبهرییا پهكهكێ وەک كاراكتهرێن سۆشیال میدیایێ كار دكهت
پهكهكێ د دەمێن دوماهیێ دا ستێرن ل سەر شەر ل دژی باشوورێ کوردستانێ شکاندییە، ھەموو رێڤەبەر و سازی ل دووڤ ههڤ ل TV یێ د ئاخڤن، گۆتاران دنڤیسن و ئاگاھیێن دوور ژ راستیێ بهلاڤ دكهن، ئەو پهكهكە یا کو خۆ گهلهك مەزن دبینیت وەکە وان كاراكتهرێن گهنج ل سەر میدیایا جڤاکی نووچەیێن دەرەو بەلاڤ دكهت، ئهو ڤێ چهندێ ژ بۆ چێكرنا ئۆپهراسیۆنهكا تێگههی دكهن.
پهكهكێ بریار دا کو ل دژی پێشمەرگەی شەری بکەت و ئەو بۆ ڤێ یەکێ زهمینهیا پێدڤی ئامادە دکهن، پهكهكێ ئەڤ ههوه ژ مەھا نیسانێ ل زینی وەرتێ دا دەست پێ کرن و هێشتا بهردهوامیێ ددهتێ، ئاخفتنا دوران کالکان ژی بەردەوامییا ڤێ بریارداریێ یە و ڤێ جارێ نا بێژیت پارتی، ئەو ڤەکری دبێژیت پێشمەرگە، لێ چهند تشت ههنه كو پێدڤییه دوران کالکان بزانیت.
یا ئێكێ: دوران کالکان د ئاخفتنا خۆ دا جارەکێ ژی بەحسێ دەولەتا ترکیێ و ههتا بهحسا سوپایێ ترکیێ ژی نەکر و نهشێت بکەت ژی، ژ بەر کو پهكهكە ھەڤکارییا ئاکهپێ – مهھپێ بۆ خۆ وەک پرسگرێکهكێ دبینیت نە دەولەتا داگیرکەر یا ترک، ئەو دبێژیت مه نهڤێت دەولەتا ترکیێ ھهلوەشینین، مه ئاخ نهڤێت، پهكهكێ نهڤێت کریارێن کو 98 ساله دەولەتا ترک ل سەر گەلێ کورد دكهت ببینیت، ئانکو قەتلعامێن ل سەر کوردان، پهكهكە وێ ددەته نیشاندان کو دەولەتا ترک گهلهك یا باشە لێ رێڤەبەرییا ئاکهپێ بتنێ خرابە، دڤێت دوران کالکان و پارتییا وی بەری ھەر تشتهكی بشێت بێژیته تركیێ تو دەولەتەکا داگیرکەری، کێشهیا نەتەوهیا کورد د ئەساس دا ل گەل دەولەتا ترکیێ یە نە ب تنێ د گەل حکوومەتێن دەمکی یە، پهكهكە کێشەیێ بەرۆڤاژی دکەت.
عهبدوللا ئۆجالان و میساقا مللی
یا دووێ: دوران کالکان دبێژیت «پێشمەرگە پشتهڤانیێ ل فاشیزما ئاکهپێ – مهههپێ دكهت، ئەڤه خیانەتە»، ھەکە ئەم راست ببێژین، ئێك ژ ھێزێن پێشەنگێن ل رۆژھلاتا ناڤین کو ل 20 سالێن دوماهیێ پشتهڤانییا دهولهتا تركیێ و حكوومهتا ئاكهپێ كری پهكهكه و رێبەرێ پهكهكێ عهبدوللا ئۆجالانە، ههگەر دوران کالکانی دڤێت خائینێن پشتهڤانییا ترکیێ دکهن ببینیت، ل بهراهیێ بلا وی كهسێ كو پرۆژەیێ ترکییەبوونێ ئاڤاکری، ناسنامەیا ژۆرین یا ترکیێ و ئەوێ میساقا مللی کرییه د رۆژەڤا کوردان دا و مهشرۆع كری ب خائین ناڤ بكهت، ئانکو یێ ئەڤ ھەموویه كری عهبدوللا ئۆجالانە، بلا وی وەک خائین ببینیت.
عهبدوللا ئۆجالان ب خۆ گۆتییه وی شاندێ ههدهپێ ئهوێ ل 23 شواتا 2013ێ هاتینه سهرهدانا وی: «یێ کو ئهڤه 10 سالن ئاکپه ل سەر پێیان هێلای ئهزم، ھێزا مە ئاکپە دەرێخستە مهیدانێ»، ئهوێن کو ئاکپە هێلایه ل سهر پێیان داكو ئاكهپه دهستێ خۆ دانیته سهر دهولهتێ ئهمین، ژ بەر کو دەما ئاکپه دکەفتتە ل بن گڤاشتنان ئاپۆی ژ بۆ ھاریکارییا ئاکهپێ نامە دنڤیسان، بانگاوازییا ئاگربەستێ دکر و گهلهك پەسنا سەرۆکێ میتێ ھاکان فیدانی دكر، عهبدوللا ئۆجالان ب خۆ بۆ ھەردهم د ھاوارا ئاکهپێ د چوو.
ئەڤه 30 سالە ههوه نهھێلایە پێشمەرگە بچیته حهفتهنینێ
یا سێیێ: دوران کالکان دبێژیت کو وی دڤێت پێشمەرگەی و گەریلایان مل ب ملێ ھەڤ ببینیت، ئەو دبێژیت، بلا پێشمەرگە بهێنه حهفتهنینێ و دگهل مە شهری بکهن، دوران کالکان و تەڤگەرا وی پهكهكە ژ سالا 1990ێ نههێلایه ئێك پێشمەرگە بچیته وان دەڤەرێن کو ل بن کۆنترۆلا وان دا نە، ژ سالێن 90ان، ئێك پێشمەرگە نە شیایه بچیته حهفتهنینێ و بسهركهڤیته سەرێ چیایێ خانتووری، پهكهكێ نههێلا ھێزەک ب تنێ یا پێشمەرگەی بچیته گەلیێ زاپێ، خواکورکێ، دوران کالکان دبێژیت وەرن ئەم پێكڤه ڤێ ئاخێ بپارێزین، لێ ئەڤه 30 سالە تە و پارتییا تە نههێلایه ئێك پێشمەرگە بچیته وێ ئاخێ، «دەمێ پالی گههشتییه كوریێ» ژ نوو پێشمەرگە هاته بیرا وە، وی دەمی ههوه دەست ب شەری کر، ههوه شێوهرمهندی ب ھکوومەتا کوردستانێ کر، ما ههوه بۆچوونا پێشمەرگەیان ل بهر چاڤ گرت؟ نهخێر.
ما نە ئەو ھەڤالێ وە یێ کو ھوون ئهڤه 50 سالە پێكڤهنه، ئانکو جەمیل باییك داكو پێشمەرگەی رەش بکەت داخویانی د دا چاپەمەنییا ئەورۆپا و ترکیێ و دگۆت ھاریکارییان نەدهنه پێشمەرگەی ئەو نهشێن شەری بکهن ب خرابی ل سهر ھێزا پێشمەرگەی لۆبی دكر، ئەو کی بوو؟ بێ گۆمان ئەو جەمیل باییک بوو، مستەفا کاراسوو بوو و ئەو كاراكتهرێن سوپایێ ههوه یێ مهدیایێ بوون.
گورگێ كهڤلێ میهێ ل خۆ کری
ب سالانه، پهكهكە پێشمەرگەی وەک نەتەوپەروەرێ پاشڤەروو و دهرهبهگێن پاشکەفتی نیشا جهماوهرێ خۆ ددا، دژمناھییا پهكهكێ د گەل پارتی ب وێ رامانێ بوو ئێدی کورد د ئاخا خۆ دا پارچە ببنڤە، پهكهكه یا کو خهباتێ دكهت كوردێن باكور دگهل دهولهتا تركیێ ببنه ئێك، پارچە بوون و جودا بوونێ د ناڤ مالا کوردان ئاڤا دکەت، وێ جوداھییا نەرینێن د ناڤ کوردان دا وەک مژارەک تایبهت ب ژیان و مرنێ بکار دئینیت و کوردان وەک دژمنێ ھەڤدوو دەست نیشان دکەت.
ئەڤرۆ پهكهكێ د ناڤ جهماوهرێ خۆ دا رەوشەکا وهها ئاڤا کرییە کو پێشمەرگێن باشوورێ کوردستانێ و پارتی پتری دەولەتا ترک و سوپایێ تركیێ ب دژمن دھنە دیتن، پهكهكێ کوردەکێ وەها چێکر کو بۆ ئالایێ ترکیێ ھەماھەنگ بیت، لێ ئالایێ پیرۆزێ کوردستانێ وەک سەمبۆلا دهرهبهگاتیێ ببینیت و نەفرەتان لێ بكهت.
ئەڤرۆ دوران کالکان وەک گورگهکێ كهڤلێ میهێ ل خۆ كری وهسا ددەته نیشاندان ههر وهك نەئەون کو ئەڤه 30 ساله گوندێن باشوورێ کوردستانێ داگیر کرین و ناھێلن گوندی و پێشمەرگە بچنه ڤان دەڤەران، پاشی بێ شەرم پێشمهرگهی داخواز دكهت و دبێژیت وەرن ئەم ب پێكڤه شەری بکهین، ئارمانجا دوران کالکانێ ترک ئەوە کو سوبە بێژیت ههگهر تو نه دگەل منی وی دەمی تو دژمنی، ب ڤێ بههانێ دڤێت هێرشێن خۆ رهوا بکەت.