كۆمێن چه‌كدارێن گرێدای تركیێ 11 کەس ژ گوندێن دۆربه‌را عەفرینێ رەڤاندن و ژ بۆ سه‌ربه‌ست بەردانا وان داخوازا پەرەیان دکن، هه‌ری كێم 6 هه‌زار دۆلار ژ بۆ هه‌ر كه‌سه‌كی دخوازن.
ل گۆر رێخستنا مافێن مرۆڤان ل عەفرینێ، كۆمێن چه‌كدارێن گرێدای تركیێ كو هنده‌ك ژێ ب پۆلیسێن سه‌ربازی تێن ناڤ كرن، ژ دوهـ رۆژا یه‌كشه‌می 30/8/2020ێ 11 وه‌لاتیێن گوندێن دۆربه‌را عه‌فرینێ ل رۆژئاڤا كوردستانێ ره‌ڤاندنه، 3 ژ وان كه‌سێن ب ته‌مه‌نن.
ده‌ست نیشان كر، 6 كه‌س ژ گوندێ چۆلاقا یێ سەر ب ناڤچەیا جندرێسێ هاتنه رەڤاندن، ژ ناڤا وان 3 کەسێن تەمەن مەزن ھەنە.
ناڤێن کەسێن ھاتنە رەڤاندن وھانە: کەمال شێخۆ 80 سال، عەبدولرەحمان سیدۆ 80 سال، عەبدولرەحمان رەشۆ 75 سال، رۆستەم ریحانێ 45 سال، حه‌مزه رەشۆ 45 سال و ئەحمەد رەشۆ 40 سالی یه.
رێخستنا مافێن مرۆڤان دیار كر، كۆمێن چه‌كداران د 2 مه‌هێن رابووری دا، پێتری 15 كه‌سان ژ گوندێ چۆلاقا ره‌ڤاندبوون و ل همبه‌ر په‌ره‌یان به‌ردابوون.
هه‌ر د ڤێ ده‌ربارێ دا، رێخستنا مافێن مرۆڤان بەلاڤ کر، گرۆپەکێ چەکدار ا رۆژا 29 ی ته‌باخێ، کەسەک ب ناڤێ سەلاح بریمۆ ژ گوندێ کوورا یێ ناڤچەیا راجۆیێ رەڤاند و ھەتا نھا چارەنڤیسا وی نەدیارە.
ئاماژە ب وێ ژی دا، گرووپا عەمشات رۆژا 15ی تەباخێ 4 کەس ب ناڤێن ئەسعەد عەلۆ، مالشین عەلۆ، عەبدۆ محەمەد، محەمەد حه‌سۆ ژ گوندێ مستکا یێ ناڤچەیا شییێ رەڤاندن و پشتی ژ ھەر کەسەکی 1200 هه‌یا 2000 لیرەیێن ترکی ستاندین، بەردان.
ل گۆر ئامارێن رێخستنا مافێن مرۆڤان، د ناڤا دوو مه‌هێن ده‌رباسبوویی دا 160 وه‌لاتیێن عه‌فرینێ و ناڤچه‌یێن وێ ب ده‌ستێ كۆمێن چه‌كداران هاتنه ره‌ڤاندن.
