میرێ ئێزدییان به‌حسا خه‌ته‌رییا په‌كه‌كێ ل سه‌ر گه‌لێ ئێزدی دكه‌ت

میرێ ئێزدییان به‌حسا خه‌ته‌رییا په‌كه‌كێ ل سه‌ر گه‌لێ ئێزدی دكه‌ت

میر عسمه‌ت ته‌حسین به‌گ ئیرۆ ئه‌شكه‌ره‌ كر، گه‌لێ شه‌نگالێ ناخوازه‌ په‌كه‌كه‌ ل ناڤچه‌یێن وان بمینه‌ و گۆت كو په‌كه‌كه‌ گه‌نجێن ژێر 18 سالیێ د خاپینه‌ و مه‌شقا سه‌ربازی پێ دكه‌.

میر عسمه‌ت ته‌حسین به‌گ كو نها ل جیێ میرێ ئێزدییان میر حازم تەحسین به‌گ كاروبارێن ئێزدییان ب رێڤه‌ دبه‌، داخویانی ل ده‌ربارا ره‌وشا شه‌نگالێ و ڤه‌گه‌رینا ئاواره‌یان دا، هه‌موه‌خت مژارا هه‌بوونا چه‌كدارێن پارتییا كاركه‌رێن كوردستانێ ل ناڤچه‌یێ ئانی زمان.

میر عسمه‌ت دبێژه‌: «سه‌ده‌مێن نه‌ڤه‌گه‌رینا ئاواره‌ و په‌نابه‌رێن ئێزدی ژ بۆ دوو خالێن سه‌ره‌كه‌ ڤه‌دگه‌ره‌، یا یه‌كه‌مین ئه‌ڤه‌ كو خزمه‌تگوزاری ل ناڤچه‌یێ تونه‌نه‌ و هه‌روه‌ها خالا دوویه‌مین هه‌بوونا نه‌شه‌رعی ئا چه‌كدارانه‌ كو بوونه‌ سه‌ده‌م ل همبه‌ر ڤه‌گه‌رینا ئاواره‌یان.

ده‌ست نیشان كر، ئه‌و هایدار بوونه‌ كو ئه‌ڤ چه‌كدار سنێله‌ و جوانێن ژێر 18 سال ئێن ئێزدی د خاپینن و مه‌شقا له‌شكری پێ دكن و گۆت: «ئه‌ڤ یێك ل دژی یاسایێ یه‌ و رێك پێ ناهێت دایین».

ل ده‌ربارا ره‌وشا شه‌نگالێ میر عسمه‌ت ته‌حسین به‌گ دیاركر، ره‌وشا ئێزدییان ل ناڤچه‌یێ خه‌رابه‌  و هنه‌ك جاران ئه‌ڤ گرفتێن ژ بۆ وان چێدبن ژ كاره‌ساتا ته‌باخا 2014ان كێمتر نینه‌ و دبێژه‌:  «ئه‌ڤ 6 سال ل سه‌ر كاره‌ساتا شه‌نگالێ ده‌رباس بوون و هێژان ئاواره‌یێن ئێزدی د كامپان ده‌ ژیان دكن، ره‌وشا وان د كامپان ده‌ خه‌رابه»‌.

د مژارا هه‌بوونا چه‌كداران ده‌ ل شه‌نگالێ، میر عسمه‌ت ئه‌شكه‌ره‌ كر كو ئه‌ڤ چه‌كدار بوونه‌ سه‌ده‌ما تێكدانا ناڤچه‌یێ و خوه‌ست ئه‌و شه‌نگالێ ب جی بهێلن و شه‌نگال ژبۆ خوه‌دیێن وێ ئێن دروست بمینه‌.

تێ زانین پارتییا كاركه‌رێن كوردستانێ، پاش رزگار كرنا شه‌نگالێ ژ بال پێشمه‌رگه‌یێن باشوورێ ولات ڤه‌، كه‌تنه‌ ناڤا باژار و ده‌ردوورا وێ ده‌، ب تایبه‌ت پاش بوویه‌رێن 16 ئۆكتۆبه‌را 2017ان كو وان ملێ خوه خستییه‌ بال حه‌شدا شه‌عبی و باره‌گه‌هێن خوه‌ ل ور چێكرنه‌.

ب سه‌ده‌ما هه‌بوونا په‌كه‌كێ ل شه‌نگالێ، ئه‌ڤ ناڤچه‌ ب به‌رده‌وامی دكه‌ڤه‌ به‌ر ئێریشێن ده‌وله‌تا تركیێ و زرارا ڤان ئێریشان ته‌نێ ب سڤیلێن شه‌نگالێ دكه‌ڤه‌.

ئیداره‌یا شه‌نگالێ ل رۆژێن رابووری ئه‌شكه‌ره‌ كر كو ل ڤێ داویێ په‌كه‌كێ نێزی 70 جوانێن ئێزدی ره‌ڤاندنه‌ و خستنه‌ ناڤا زیندانێن نهێنی ده‌.