دەما نێرەک بهێتە خەساندن!

  • نڤیسكار: بووبێ ئه‌سه‌ر

ھندەک ژ کەسێن دلسۆزێن گەلێ خوە هەر گازندان دکەن و دبێژن، ”بۆچی رەوشەنبیرێن مە ل ھەمبەر بوویەر و کریارێن پەکەکێ یێن نە د بەرژەوەندیا کوردان دا دکەن، بێ دەنگن.”

ل گۆر من نھا ب ناڤێ رەوشەبیریێ ل باکورێ کوردستانێ کەس نەهێلایە، ھەما ھەما بێژن نەما نە. پرانیا وان پەکەکێ خەساندنن لۆما بێ دەنگن. بۆچی؟؟؟

ژ بەر کو پرانیا وەشانخانێن ل باکورێ کوردستانێ گرێدایی پەکەکێ نە. ئەو نڤیسکارێ وەکو من، بەحسا پەکەکێ بکەت ئانکو وان ژ بەر کریار و بوویەرێن وان یێن نە د بەرژەوەندیا گەل دا بن رەخنە بکەت، پرتووکێن وان ناهێن چاپکرن و وەشاندن.

ھەگەر تە پەکەکە رەخنە کربیت دێ وەشانخانە بێژنە تە، ”مامۆستا ژ بەر نڤیسێن تە یێن توند ئەم نەشیین پەرتووکا تە بوەشینن.” دەما ل وەلاتەکی وەشانخانە و میدیا د بن کۆنترۆل ئانکو باندۆرا پارتیەکێ دا بیت و تو وان رەخنە بکەی مالک ل تە خەراب دبیت. ئێدی پەرتووکێن تە ل باکورێ کوردستانێ ناهێن وەشاندن.

لەوما نھا پرانیا وەشانخانەیان ژ ناڤەرۆکا پرتووکان پێتر،  ل ناڤی و نڤیسێن نڤیسکاری دنێرن و ل گۆر پەکەکێ بریارا وەشاندن ئان نەوەشاندنا وێ ددەن. ژ بەر ڤێ سەدەمێ یە کو چ نڤیسکار ریسکێ ناکەن و بێ دەنگی ژ بۆ وی/ێ باشترە. ژ بۆ کو پرتووکێن وی/ێ بێنە چاپکرن ئەو ژی خوە بێ دەنگێ دکەت و چاڤێن خوە دگریت کو تشتەکێ نەبینیت.

خوە کەڕ دکەت کو تشتەکی نەبھیزە دا کو دەنگ نەکەت. ژ بەر کو گەلەک جاران دەنگێ ژ بۆ بەرژەوەندیا گەلێ وی نەرێ، گوھێن خوە دگریت. ھەگەر دەنگێ ئێشا گەلێ خوە ببھیزیت دکاریت ل خوە ڤەگەریت و دەما ل خوە ژی ڤەگەریا دڤیت بێژیت یان بنڤیسیت. گەر گۆت و نڤیسی ژی ئێدی پەرتووکێن وی/ێ ژی ناهێنە چاپکرن.

ژ خوە پەرتووک ھەما پیچەکێ ژی ل دژ ھەلویست و بریارێن پەکەکێ بیت، مالک ل وی/ێ نڤیسکاری خەراب دبیت. وەشانخانێن گرێدایی پەکەکێ دبێژن: ”ئەم نەشێین ڤێ بوەشینین و ناوەشینین ژ بەر کو نڤیسێن تە گەلەک زڤر ئان توندن”.

وەشانخانێن دی ژی ب هەجەتا، ” مە پارە نینە ئەم نەشێین ڤی بەرھەمی بوەشینین”. خوە ژ وەشاندنا بەرھمەکێ کو نە ل گۆر دلێ پەکەکێ بیت رزگار دکەن. د ئەسلێ خوە دا ئەو ژی ڤێ ژ ترسا پەکەکێ ناوەشینن.

ئیجار نھا ل باکورێ کوردستانێ رەوش ئەڤەیە. ھەگەر تە ل سەر ھەلوەستا پەکەکێ یا نە د بەرژەوەندیا گەل دا نڤیسی: وێ دەمێ پرتووکێن تە ناهێنە وەشاندن.

ھندەک ژ نڤیسکارێن مەیێن کو دچنە ترکیێ و باکورێ کوردستانێ ژ بۆ کو خوە پیچەکێ دیار بکەت و چەند سمینەران ب سایا ھەڤالبەندێن پەکەکێ، بدەن دێ چاوا پەکەکێ رەخنە کەن؟ ھەگەر کرن ژی ئێدی نەشێن سمینەران بدەن. لەوما ئەو ژی ھەر چاڤێن خوە ژ ھەمی کریار و بوویەرێن پەکەکێ یێن نە د بەرژەوەندیا گەل دا بن، دگرن.

 ژ بەر ڤێیە ئەو کەسێن رەوشەنبیر ئانکو نڤیسکارن دێ چاوا ژبەر بەرژەوندیا خوە بەحسا شاشتیێن پەکەکێ بکەن؟؟؟

ئەڤرۆ ھەر تشت بوویە بەرژەوەندی. لەوما ھەر کەس پێش خوە هزردکەت و بەرژەوەندیا خوە ل سەر یا گەلێ خوە ددانیت. د رەوشێن وەھا دا ژی ئێدی ھەر تشت دبیت ژ بۆنا کارێن شەخسی. مخابن ژ بەر ڤێ یە کو ئەڤرۆ پرانیا نڤیسکار و رەوشەنبیران بێ دەنگن.

ژ بەر ڤێ یە دڤێت ئێدی ئەم لۆمان نەکەین. ل ترکییێ و ل باکورێ کوردستانێ ھەر تشت چریایە و دریایە. پیڤان نەهێلان. وەلاتپارێز بێدەنگ کرن.

ژ بۆ کو نڤیسکار بشێت بەرھەمێن خوە بوەشینن بێدەنگن. ژ بەر کو پرانیا وەشانخانێن ل باکورێ کوردستانێ گرێدایی پەکەکێ نە. خوەدیێ گەلەکان بەرێ ژی ئەو بوون. دەما تو ئەو بی، تو نەشێی ببیە ئەڤە. لەوما پەکەکێ وەھا کرییە کو ب نە وەشاندنا بەرھەمێن نڤیسکاران، وان دتریسینیت کو بێدەنگ بن.

گۆتنا کورت و کورمانجی ئەڤەیە. ئێدی د ناڤا ڤێ تەڤلھەڤیێ دا ب دەستێ پەکەکێ رەوشا باکورێ کوردستانێ تێک بریە. نڤیسکار و رەوشەنبیر خەساندینە. پرانیا وەشانخانان کڕینە ئان کرنە یێن خوە. لەوما بێ وان کەس نەشیت ب ئازادی بەرھەما ئەو دخوازن بوەشینیت.

 ئەڤە مژارەکا گەلەک تەڤلیھەڤ و نە زەلالە. ھێڤیدارم من ب ڤێ نڤیسێ ئەڤ رەوش پیچەکێ زەلال کربیت کو بۆچی رەوشەنبیر و نڤیسکار بێدەنگن.

پوستێن ھەمان بەش