فەرماندارێ گشتی یێ ھەسەدێ جەنەرال مەزلووم کۆبانی راگەهاند، “مە رێکەفتن لگەل رووسان و ئامریکیان کرنە. ئەم ئامادەینە ھەمان رێکەفتنان لگەل ھەر لایەنەکێ بکەین کو خزمەتا گەلێ مە بکەت.”
فەرماندارێ گشتی یێ ھێزێن سووریا دیمۆکراتیک (ھەسەدێ) مەزلووم کۆبانی د نامەیەکێ دا ژ بۆ پانەلەکێ دەربارێ شەرێ تایبەت چەند پەیام دان.
فەرماندارێ گشتی یێ ھەسەدێ د وێ نامەیا خوە دا ئاشکەرا کریە، “دوژمن دخوازیت گەلێ کورد ژ ھەڤ جودا بکەت و ھێزا سەربازی و سیاسی پارچە بکەت.”
دەربارێ دانووستاندنێن لایەنێن سیاسی یێن کورد ل رۆژاڤا ژ بۆ پێکئینانا ئێکرێزیێ ژی مەزلوون کۆبانی تەکەز کر، “ئەم کار ل سەر دیالۆگا کوردی-کوردی دکەین و ئەم پێشکەفتنێ دبینین” و گۆت، “ب ڤێ یەکێ ئەم دێ تەماعییێن داگیرکەریا ترک تێک بشکێنین.”
ھەر د وێ نامەیێ دا جەنەرال مەزلووم کۆبانی ئاشکرا کر، “د ناڤا ھەردو مەھێن بهێت دا، ئەم دێ کۆنگرەیەکا دیالۆگێ بۆ ھەموو پێکھاتەیێن ھەرێما جزیرێ لدار بێخین.”
دەربارێ رێڤەبەرنا دەڤەرێن ل ژێر دەستھەلاتا ھێزێن ھەسەدێ دا ژی مەزلووم کۆبانی گۆت، “ئەم ئینکار ناکەین کو شاشیێن رێڤەبەریێ ھەنە. دڤێت گەلێ مە چاڤدێر بیت ل سەر رێڤەبەریێ، گلەیی و رەخنەیان بکەت، لێ ل دووڤ گۆتەگۆتێن خراب نەکەڤیت.”
ھەروھا د بەردەوامییا پەیامێن خوە دا فەرماندارێ گشتی یێ ھەسەدێ گۆت، “مە ھەڤدیتن لگەل کۆمپانیایێن ناڤدەولەتی کرنە ژ بۆ خزمەتا گەلێن باکور و رۆژھلاتێ سووریێ. ئەم ئامادەینە ھەڤکاریێ لگەل کۆمپانیایێن ناڤدەولەتی بکەین ژ بۆ خزمەتا گەلێ مە.”
د دوماهییا پەیاما خوە دا جەنەرال مەزلووم کۆبانی تەکەز کر، “دژمنێ مە ھەر تشتێ ژ دەست دهێت دکەت دا کو جڤاک و ئەولەھیا مە تێک بدەت. دڤێت ئەم ل دژی ڤان سیاسەتێن دوژمنانە راوەستین. داگیرکەریا ترک نھا شەرێ تایبەت ب ریا تۆرێن نۆکەران دکەت.”
تێ زانین پشتی کو رێڤەبەریا رۆژئاڤا کوردستانێ رێکەفتن لگەل هەر ئێک ژ رووسیا و ئەمریکایێ دا ئیمزا کری، دناڤبەرا رێڤەبەرییا رۆژئاڤا و ب تایبەتی مەزلووم کۆبانی و رێڤەبەرییا پەکەکێ ل قەندیلێ پرسگرێک دروست بوونە، رێڤەبەرییا پەکەکێ ل قەندیلێ ئەڤ رێکەفتنا رۆژئاڤا لگەل دەولەتێن زلهێز ب کارەکێ نە قانوونی و دوور ژ ئەخلاقی دا زانین و راگەهاند کو سامانێن سەر ئەرد و ژێر ئەردێن سووریێ مولکێ تەڤاهییا گەلێ سووریێ نە و نابیت چ لایەنەک رێ ب خوە بدەت رێکەفتنان ل سەر ڤان سامانان لگەل دەولەتێن جیهانێ دا ئیمزا بکەت، هەر وەها رێڤەبەرییا پەکەکێ تەکەز کربوو کو پێویستە هەر رێکەفتنەک سیاسی و ئابووری ب رەزامەندییا رژێما بەشار ئەسەد بهێتە ئیمزا کرن.
