پەکەکە ل ئاقارێ سەرگەلێ ھات بۆمبەباران کرن

بالەفرێن جەنگ یێن ترکیێ بەریا دەمەکی لڤینێن پەکەکێ ل سینۆرێ پارێزگەھا دھۆکێ بۆمبەباران کرن.

چاڤکانیێن پێگەھا دارکا مازی ل باشوورێ کوردستانێ ئەشکەرە کرن، بالەفرێن جەنگێ یێن دەولەتا ترکیێ ئیشەڤ گەریلایێن پەکەکێ ل ئاقارێ گوندێ سەرگەلێ بۆمبەباران کرنە و زیان ب ئاقارێ گوند کەتییە.

دەست نیشان کر، بالەفران ل دەمژمێر 11:40 خولەک 3 مووشەک ل دەڤەرا ب ناڤێ بانیێ دانە ل نێزیکی رووبارێ سپنەی و ھەروھا ل پرا گوندێ مژێ.

ھەرچەند کو زیانێن پەکەکێ نەھاتنە زانین، لێ بەلێ ب ئەگەرا بۆمبەبارانێ، ئاگر ب ئاقارێ گوند کەتییە.

پارتییا کارکەرێن کوردستانێ، ژ 15 مەھا خزیرانا ئیسالێ و دەستپێکرنا ئێریشا ترکیێ ل سەر باشوورێ وەلات، رۆژ بۆ رۆژێ گەریلایێن خۆ نێزی گوند و باژارۆکان دکە ژ بۆ کو بھێنە بۆمبەباران کرن و ئەو جی ببنە مەیدانا شەر، خەلکێ گوندان ژی گازندە ژ پەکەکێ ھەنە و ئەو دخوازن گەریلا ژ گوندێن وان دوور بکەڤن.

ژ دەستپێکرنا ئێریشا ترکیێ یا مەھا خزیرانا ئیسالێ، نێزی 50 گوندێن باشوورێ کوردستانێ ب تایبەت ل سینۆرێ دھۆکێ ھاتنە ڤالا کرن، ھەژمارەکا وەلاتییان ژی ب ئێریشێن ترکیێ شەھید بوونە.