“گەنجێن بەھدینان ژ بەر زەختان کۆچی ئەورۆپا دکن” ئەڤە مانشێتا نووچەیەکێ یە کو د مالپەرا “رۆژ نیۆز” یا سەر ب پارتیا کارکەرێن کوردستانێ “پەکەکێ” ڤە هاتیە بەلاڤکرن، مانشێت ب خوە نڤیسینەک خەلەت نینە و ب راستی ژی گەنج ل باشوورێ وەلات ژبەر زەختان کۆچی ئەورۆپایێ دکەن، لێ بەلێ ناڤەرۆکا نڤیسینێ ب گشتی خەلەتە و پەکەکێ هەر تشتەک وەکوبەرێ سەروبن کریە.
پەکەکێ هەموو چاپەمەنیا خوە د خزمەتا داگیرکاران و رەش کرن و نەشرینکرنا دەستهلاتا باشوورێ کوردستانێ، بێ ئۆمێدکرنا گەنجان، بێ باوەرکرنا خەلکی ب دەستهلاتێ، چەواشەکرنا خەلکی و بەرەڤاژی کرنا هەموو راستیان دایە کارکرن، د ڤی نووچەیێ ل سەر گەنجان ژی کو کۆچی ئەورۆپایێ دکەن، مەدیایا پەکەکێ دیسان دەست ب چێکرنا درەوان و سەروبنکرنا راستییا کریە.
وەکو کارێ خوە یێ هەردەم پەکەکە د ڤی نووچە دا کو د مالپەرا فەرمی یا خوە دە بەلڤاکریە دەست ب چێکرنا درەوان کریە و دبێژیت: “ھاتە راگەھاندن کو گەنجێن دھۆک، زاخۆ و ب تایبەت ژی یێن شێلادزێ ژ بەر گرتن، بنچاڤکرن و زەختێن پەدەکێ وەلاتی بجی دهێلن و بەرێ خوە ددەنە وەلاتێن ئەورۆپایێ. ل گۆری ئاگاھیان د ناڤا مەھەکی دە ٤٥ جوان ژ شێلادزێ دەرکەفتنە سەر رێیا پەنابەریێ”، لێ ب راستی ژی سەدەما کۆچا گەنجان ژ بۆ ئەورۆپایێ پەدەکەیە یان ژی پەکەکە، کو بوویە پرا دەرباسڤوونا ترکیێ ژ بۆ ڤان ناڤچەیان و ژناڤبرنا ئارامیێ و نەهێلانا دەلیڤەیێن کارکرنێ ژ بۆ ڤان گەنجان و گرتن و تەهدید کرنا وان گەنجێن نە دگەل هزرا پەکەکێ؟! بەرسڤا ڤێ پرسیارێ گەلەک ئاسانە و هەرکەس باش دزانتکو گەنج ژ بەر زەختێن پەکەکێ و شەرێ ل ناڤچەیێ دقەومیت کو چ پەیوەندییا وی شەری ب وان ناڤچەیان ڤە نینە کۆچی ئەورۆپایێ دکەن.
پەکەکە دبێژیت “ل ھەرێما بەھدینان پشتی نەرازیبوونێن دژی داگیرکەریا دەولەتا ترک و رەخنەکرنا دەستھلاتا پەدەکی، زەختێن ل سەر وەلاتیان و ب تایبەت ژی گەنجان زێدەتر بوونە. د خوەپێشاندان و نەرازیبوونێن کو د مەھا تەباخێ دا ل زاخۆ، دوھۆک و شێلادزێ چێبوون دا نێزیکی ١٠٠ کەسان ھاتنە گرتن و پرانیا وان هێشتا گرتی نە”، ئەڤە ژی درەوەکا دی یە کو ژ مەکینەیێن چێکرنا درەوان یێن پەکەکێ دەرکەتیە گەر نە هیچ گەنجەک ل بادینان ژ بەر رەخنەکرنا پەدەکێ و نەرازیبوونا ل دژی داگیرکاریا ترکیێ نەهاتیە دەستەسەرکرن، ب تنێ هەژامەرەک کێم ژ جوانان کو ناگهن 10 کەسان ژ بەر پرسگرێکێن ئەولەهیێ ب بریارا دادگەهێ هاتینە بنچاڤکرن، یا راست هەژمارا وان گەنجان کو پەکەکێ بنچاڤکرینە ب بەهانەیا دزینا کەلوپەلێن پەکەکێ و رەخنەکرنا پەکەکێ د میدیایا جڤاکی دا گەلەک پترن و دبیت ئەو هەژمارا وان باس لێ کری کو 100 کەسن، ئەو بن یێن ژ لایێ پەکەکێ ڤە هاتیە بنچاڤکرن و بێ رۆمەتکرن و ب زۆرێ دانپیدان لێ هاتیە وەرگرتن.
گرتنا گەنجان و ئیشکەنجەدانا وان و ب زۆرێ دانپێدان ژێ وەرگرتن کارێ پەکەکێ یە ل ڤان ناڤچەیان و ئەڤەیە کو بوویە ئەگەرا کۆچا گەنجان بۆ ئەورۆپایێ، ئەگەرێن کوچا گەنجان ئەو بەرتەنگکرنا هزری یا پەکەکێ یە کو نها ل ڤان ناڤچەیا دمەشینیت و هەر کەسێ نە دگەل هزرا وێ بیت وەکە دوژمن و ئاژان و سیخورێ ترکیێ ددەتە ناساندن، سەدەما کۆچا گەنجان ئەڤەیە کو نەشێن بچن سەر گوندێن خوە و کارێ کشتۆکالیێ بکەن، سەدەم ئەڤەیە کو ژبەر “چەنگا” پەکەکێ د گەل ترکیێ ئەڤ گوندە ناهێنە ئاڤەدانکرن و بوونە وێرانە، بەلێ سەدەمێن سەرەکی ئەڤەنە نەکو بنچاڤکرنا وان ژ لایێ حکوومەتا هەرێمێ.
هەر کەس باش دزانیت هیچ حکوومەتەک ل جیهانێ بێ سیچ هیچ کەسەکی بنچاڤ ناکەت و ئەڤە تشتەک نۆرمالە و هەر گاڤێ دبیت ئەو کەس بهێتە بەردان و خوەدی مافێن خوەنە، ئەو دشێن ژ بۆ خوە پارێزەران بگرن و ل دادگەهێ دا بەرەڤانیێ ژ خوە بکەن و سەربەست بهێنە بەردان، لێ کەسێن ژ لایێ پەکەکێ ڤە دهێنە بنچاڤکرن چ ماف هەیە؟ و ب بریارا کیژان دادگەهێ پەکەک وان بنچاڤ دکەت؟! گەلۆ کەسێن ژ لایێ پەکەکێ ڤە ژی دهێنە بنچاڤکرن دشێن ژ بۆ خوە پارێزەرەکێ بگرن و د شکەفتێن تاری یێن پەکەکێ دا کو وەکی دادگەهان لێکرینە بەرەڤانیێ ژ خوە بکەن؟ یان ژی دێ پەکەکە ب ڤیدیۆیەکا چێکری ب زۆری دانپێدانێ ژ وان وەرگریت و ب سیخۆر دەتە ناساندن پاشان دێ هێتە بەرزەکرن بێ کو هیچ مافەکێ وی هەبیت بشێت بەرەڤانیێ ژ خوە بکەت؟!
پەکەکە دبێژیت: “ل پرانیا ھەرێمێ ھێزێن ئاساییش و پێشمەرگەیان ھاتنە زێدەکرن” گەر ئەڤ ئاخافتنە راستبیت ژی گەلۆ چ کێشە د ڤێ ئاخافتنێدا هەیە؟! ما قەی حکوومەت دڤێت دەستیریێ ژ پەکەکێ وەرگریت؟! زێدەکرن یان کێمکرنا پێشمەرگە و ئاساییشان ل هەر ناڤچەیەکێ مژارەکا گرێدایی حکوومەتێ یە و ل هەموو جیهانێ گەر پێویست بوو ئەڤ تشتە دهێتە ئەنجامدان.
هەر هێز، هەر ئالی و هەر کەس و پارتیەک باس ل ئازادی و دیمۆکراسی و خوەشکرنا ژیان گەل و ریزگرتنا ل رایا جیاواز بکەت ماف هەیە، لێ ب هیچ رەنگەکێ پەکەکێ ئەو ماف نینە، ژ بەرکو هیچ پارتیەک وەکو پەکەکێ بەرتەنگ و نە دیمۆکراسی نینە و هەر کەسێ نە د گەل هزر و ئایدۆلۆژیا وێ بیت، ئەو وەکە سیخۆر و کرێگرتیێ میتا ترکان ددەتە ناساندان.
دەم هاتیە کو پەکەکە دەست ژ چێکرنا دەرەوان و سەروبن کرنا راستیان و بەرتەنگکرنا ئازادیان بەردەت، گەل هوشیارە و هەموو تشتان دبینیت.
