دەستەیا دەستپاکی یا ئیراقێ راگەھاند بریارا قەدەغەکرنا گەشتکرنێ بۆ پارێزگارێ سەپاندییێ کەرکووکێ راکان جبووری “ب تۆھمەتا ب هەدەردانا چاڤکانیێن گشتی” دەرکەتیە.
دەستەیا دەستپاکی یا ئیراقێ ئەڤرۆ رۆژا سێشەمبی ١٥ێ ئیلۆنا ٢٠٢٠ێ داخویانیەک بەلاڤ کر و تێدا راگەهاند: “دادگەھا لێکۆلینێ یا تایبەت ژ بەر ب هەدەردانا چاڤکانیێن گشتی یێن پرۆژەیا ئاڤاکرنا قۆتابخانەیێن ئامادەیی ئەڤ فەرمانە دایە، کو ژ بۆ پرۆژەیێ زێدەتری ٥٧ ملیار دینار (نێزیکی ٤٩ ملیۆن دۆلار) ب کۆمپانیەکا بیانی ھاتیە دان.”
دادگەھێ ئەڤ بریار ل گۆر مادەیا ٣٢٠یا یاسایا سزادانا ئیراقێ دایە. ھەروھا دادگەھێ فەرمانا دەستەسەرکرن و رێگرتنا ل گەشتا ٢٣ کارمەندێن پارێزگەھێ و رێڤەبەریا گشتی یا پەروەردەیا کەرکووکێ دایە، کو یەک ژ وان رێڤەبەرێ بەرێیە.
ل دوماهیا مەھا دەرباسبوویی پرۆژەیا چێکرنا ٢٥ ئاڤاھیێن قۆتابخانەیێن ئامادەیی ل کەرکووکێ ھاتبوو راگھاندن.
ئەڤ بریارا دادگەھێ د دەمەکێ دایە کو د ڤان دەمێن دوماهیێ دا ب دەھان بەرپرس و کارمەندێن رێڤەبەریێن نێزیکی پارێزگارێ سەپاندییێ کەرکووکێ، فەرمانا دەستەسەرکرن و قەدەخەیا گەشتکرنێ دەربارێ وان دا ھاتنە دان.
