رەوش ل باکورێ کوردستانێ

رەوش ل باکورێ کوردستانێ

ئەز شاش و حەیری دمینم کو ئەڤە زێدەتری ٤٠ سالانە، پەکەکە داکو ئێکەتییا کوردان چێ نەبیت هەر ب ناڤێن جوودا ب یێن پارتی و رێخستنێن ب وێ ڤە گرێدایی ئێکەتییان چێ دکەت. ئەڤە ھەقێ وانە. لێ شاش دمینم کو ھندەک ژ گر گرێن کوردێن سیاسی ژی ھەر ڤێ پەسەند دکەن. نەشێن فەهم بکەن کو ئەڤە زێدەتری ٣٠ سالانە کو ھەر ئەڤ یاریە، ئەڤ سیناریۆیە، ئەڤ فێلبازیە دهێتە ئەنجامدان.

فەهم ناکەن، ئارمانج و ھەدەفا پەکەکێ نە ئێکەتییا گەلێ کوردە. بەرەڤاژی وێ پارچەکرنا مەژیێ کوردان، وێرانکرنا وەلاتێ وانە. داکو د ڤێ رێیێ دا ب سەرکەڤن ھەر تشتەکی دکەن.

ئەو دکەن، دبیت حەق و مافێ وان بیت. لێ ئەڤە زێدەتری ٢٠ سالانە کو ھندەک ھەر ڤێ پەسەند دکەن و نەشێن ببینن کو ئەڤ یاریە دهێتە کرن داکو کورد نەبن ئێک.

کەسێن ڤێ پەسەند دکەن ھەما ئێک جار ژی نەشێن ل خوە ڤارقلێن و ببینن کو د ڤان دەمێن درێژ دا پەکەکێ هندە ئێکەتی و ھەڤکاری پێک ئیناینە. لێ ئەنجام.

ئاھا ئەم کورد وەھا بووینە کو نەشییاینە راستیێ ببینین. ئەڤە ژی ژ بەر بەرژەوەندیێن شەخسی پێک دهێت. ڤان بەرژەوەندیێن شەخسی، چاڤێن هندەکا کۆر، گوھێ وان کەڕ و زمانێ وان یا ژێ بوویە یان ژی لال بوونە.

ب سالانە کو پەکەکە ئەو داخوازا داگیرکەران پێک ئینایە و تینیت. داگیرکەر چ ژێ دخوازیت ئەو ژی وێ دکەن. ئەڤە نە تنێ ل پارچەیەکێ ل ھەر چار پارچەیان ڤێ ھەلویستا داگیرکەران تێخن ژیانێ یان دخوازن بێخن ژیانێ.

داکو بگەهن ڤێ ئارمانجا خوە ژی د خەباتا خوەیا زێدەیی ٤٠ سالان دا، ئێک مفایێ وان ژ بۆ کوردان چێ نەبوویە. زمان دایە ژ بیر کرن. وەلات وێران کرن. باوەریا نەتەوەیی ژ سەرێ کوردان دەرخست و ھێڤی بۆ وان نەهێلان.

ئەز ب خوە، ل بەر ڤێ ناکەڤم، ژ بەر کو ئەو کارێ خوە دکەن. ئەرکێ پێ هاتیە راسپاردن ب جھ دئینیت. ئەو د رێیا خوە دا، د ھەلویستێن خوەیێن سیاسی کو ب دەستێ داگیرکەران ڤە دهێنە مەشاندنێ، ب حەقن.

لێ ئەز ب ڤێ چەندێ دئێشم کو چاوا بەرژەوەندیێن شەخسی چاڤێن ھندەک کەسان کو بێژنە خوە؛ ئەم سیاسی نە کۆرە کرینە. ئێدی ژ بۆ کەسێن وەھا تنێ بەرژەوەندییە و پەکەکە ژی ڤێ گەلەک تازە، ب ئاسانی و ب دەلالی ب کار دئینە.

ب کار دئینە ژ بەرکو ڤێ دەما ئەم نھا تێدا دژین، ھەر تشت بوویە پارە. دەما پارێن تە هەبن، تو ب رحەتی دشێی کەسان، پارتی و شەخسیەتان بکری و وان ژ بۆنا بەرژەوەنیێن خوە ب کار بینی.

نھا رەوشا ئەم تێدا دژین ئەڤەیە. قۆناخا ئەم گەھشتینێ ئەڤەیە. پێویستە ئەم چ بکەین؟؟؟

ژ خوە مەسەلە و پرس ئەڤەیە کو پیویستە ئەم چ بکەین؟ ئەم ھەمی دزانین کو دڤێت ئەم چ بکەین لێ وێ یەکێ ناکەین.

سەدەما ڤێ، یەک ژێ ھندەک پارتیێن دبێژنە خوە ئەم کورد و کوردستانی نە و ناڤێ کوردستانێ ژی ل خوە کرینە. لێ ژ بلی وی ناڤێ پیرۆز چ مفایێ وان ژ بۆ کورد و کوردستانێ نینە.

سەدەمەکێ دی لاوازبوونا تەڤگارا کوردستانیانە. دەما مرۆڤ لاواز بوو، بێ تاقات بوو، ھندەک ب ئاسانی دشێن ب سایا خورتبوون و پەرێن خوە وێ لاوازبوونێ ژ بۆ خوە ب کار بینن و نھا یا پەکەکە دکە ژی ئەڤەیە.

پێویستە ئەم چ بکەین؟؟؟

نە جارا ئێکێ یە کو ڤێ دپرسم. ھوون باوەر بکەن ھەرکەس ژ من باشتر دزانیت کو پێویستە چ بکەین. لێ ناکەن. بۆچی؟

ھندەک ژ بەر لاوازبوونا خوە، ھندەک ژ بەر بێ دەرفەتیێن ئابۆری و ھندەک ژی ژ بەر بەرژەوەندیێن خوە ڤێ ناکەن.

نەشێین ببینن کو ب تەڤگەرەکا خورت، ب ھێزەکا نەتەوەیی، ب باوەریەکا کوردستانی ئەم دەست بدەینە ھەڤ ئەم دێ سەرکەڤین. ژ بۆ ڤێ ژی پێویستە ئێدی ئەم تنێ ڤێ بکەین. لێ ڤێ ناکەین و حەتا کو ئەندام و رێڤەبرێن ھندەک ژ ڤان مرید بن، نەکەن ژی…

بالا خوە بدەنێ و ببینن چ فەرق و ناکۆکیێن نەتەوەیی د ناڤبەرا PAK، HAK-PAR و PSKێ ھەیە. ل گۆر من نینە و ژ ھەڤ دووربوونا وان، ل سەر ئەساسێ ھەڤدو نەقەبوولکرن و مەسەلەیێن شەخسییە. دەستوور و بەرنامەیێن وان بخوینن ھوون دێ ببینن ھەما ھەما وەکھەڤن. لێ نابنە ئێک یان د بن سەیوانەکێ دا نەشێن پێکڤە کار بکەن.

د رەوشا ئەڤرۆ دا ئەڤ ھەرسێ پارتی د دەستێ مە دا مانە. لۆما دڤێت ئەو ژی کێماسیێن خوە تەمام بکەن دا کو ببنە ئەلتەرناتیفەک ل باکورێ کوردستانێ. ئەڤ ھم د مفایێ وان و ھم ژی د مفایێ گەلێ مە دایە. ئەو ژی ڤێ دزانن لێ پێک نائینن.