ئیرۆ 51 سال ل سه‌ر كۆمكوژییا گوندێ صۆریا ده‌رباز دبن، ئه‌و كۆمكوژییا کو رژێما به‌عسا عیراقێ د راستا كریستیانێن باشوورێ كوردستانێ دا ئه‌نجام دای، هه‌ر چه‌ند كو ئەڤرۆ 51 سال ل سه‌ر ڤێ تاوانێ ده‌رباز دبن، لێ به‌لێ هێشتا ب خاله‌كا ره‌ش ب ناڤ چاڤێن داگیركارێن كوردستانێ ڤه دهێتە حه‌ساب كرن.
صۆرییا گونده‌كێ باشوورێ كوردستانێ یه، دكه‌ڤیته سنۆرێ پارێزگه‌ها دهۆكێ ل باشوورێ ده‌شتا سلێڤانه‌ییا و گرێدای باژارێ زاخۆ یه، پرانییا خەلکێ وێ كریستیانێن كلدانی نه و موسلمان ژی لێ دژین.
د رۆژه‌كا وه‌كو ئەڤرۆ دا ل سالا 1969ێ ، ئه‌ڤ گوندە ژ لایێ رژێما بەعس ڤە راستی كۆمكوژییه‌كا هۆڤ هات، دەما كو 38 هه‌موەلاتیێن گوندی ب ده‌ستێ سه‌ربازێن ر‌ژییما به‌عس ب كۆم هاتیه قه‌تل كرن و بن ئاخ كرن.
ل سپێده‌هییا رۆژا 19 ئیلۆنا سالا 1969ێ ده‌ما كو ئه‌فسه‌ره‌كێ ره‌ژیما به‌عس ب ناڤێ عه‌بدولكه‌ریم جحێشی كو ئه‌ندامه‌كێ حزبا به‌عس بوو ل گه‌ل گرووپەکێ پشكنین و لێگه‌رینێ د گوندێ صوریا را ده‌رباس دبوون، مایینه‌ك ل نێزی وان د ته‌قیت، ل وی ده‌می ڤی ئه‌فسه‌ری ل گه‌ل سه‌ربازێن ل گه‌ل دا ب سه‌ر گوندێ صوریا دا گرتن و هه‌موەلاتیێن وێ ب ته‌قاندنا وێ مایینێ سووچبار كرن.
ڤی ئه‌فسه‌ری و سه‌ربازێن ل گه‌ل دا، هه‌موەلاتیێن گوندی برنه د كۆتانه‌كێ دا و گوللـه به‌ردانێ، د ئه‌نجامێ دا 38 هه‌موەلاتی شه‌هید كه‌تن و 22 هه‌موەلاتیێن دن بریندار بوون، گه‌له‌ك ژێ زارۆك بوون و هه‌ر هه‌موو پێكڤه د گۆره‌كێ ب كۆم دا هاتنه بن ئاخ كرن، پاشان سه‌ربازان گوند شه‌وتاندن.
كۆمكوژییا گوندێ صوریا ئێک ژ وان هه‌زاران تاوانانه كو ر‌ژێمێن به‌غدایێ یێن ئێک ل دووڤ ئێک ل دژی گه‌لێ كورد یێن باشوورێ كوردستانێ ئه‌نجام داین، لێ به‌لێ هه‌یا نها حكوومه‌تێن به‌غدایێ نه ئاماده‌نه داخوازا لێبۆرینێ ژ گه‌لێ كورد بكەن یان ژی قەرەبوویێ بدنە مالباتێن به‌ر ڤان تاوانان كه‌تین.
