د ئێریشه‌كا هه‌وایی یا ده‌وله‌تا تركیێ ده ل باشوورێ كوردستانێ كو ل دژی په‌كه‌كێ هاتییه ئه‌نجام دایین، 3 گه‌ریلایێن په‌كه‌كێ جانێ خوه ژ ده‌ست دان.
وه‌زاره‌تا پاراستنا نه‌ته‌وه‌ی یا تركیێ ئیرۆ رۆژا شه‌می 26/9/2020ان، د به‌یانه‌كه نڤیسكی ده ئه‌شكه‌ره كر، باله‌فرێن جه‌نگ ستارگه‌هێن په‌كه‌كێ ل چیایێ مه‌تینی هه‌ده‌ف كرن و د ئه‌نجامێ ده، 3 گه‌ریلایێن په‌كه‌كێ كه‌تن به‌ر ئێریشان.
باله‌فرێن جه‌نگ یێن ده‌وله‌تا تركیێ دوهـ رۆژا ئینی ل دانێ سپێدێ و ئێڤارێ ئێریشێن هه‌وایی ل باشوورێ كوردستانێ پێكئانین و نوقته‌یێن په‌كه‌كێ ل ده‌ڤه‌را به‌رێ گاره و به‌رواری بالا هه‌ده‌ف كرن.
هه‌په‌گێ بالێ له‌شكری یێ په‌كه‌كێ تو ئاگاهی ل ده‌ربارا ژ ده‌ست دایینا گه‌ریلایێن خوه نه دانه.
ده‌وله‌تا تركیێ ل ناڤه‌راستا مه‌ها خزیرانا ئیسالێ، مه‌زنترین ئێریشا سه‌ر باشوورێ كوردستانێ ل دژی په‌كه‌كێ ده‌ستپێكر، ژ وێ ده‌مێ ڤه، په‌كه‌كێ حه‌ره‌كه‌تا گه‌ریلایێن خوه خستنه ناڤا گوند و دۆربه‌را باژارۆكان ژ بۆ كو ژ ئێریشان پاراستی بن، گه‌لێ ناڤچه‌یێ ژی ژ ڤێ هه‌نگاڤا په‌كه‌كێ دلگرانه و ئه‌و دخوازن په‌كه‌كه ژ ناڤچه‌یێن وان دوور به ژ بۆ كو گوندێن وان نه‌بن مه‌یدان شه‌ر.
