ئەندامێ پۆلیتبورۆیا پارتیا دیمۆکراتا پێشڤەروویا کورد ل سووریێ (پێشڤەروو) ئەحمەد سلێمان راگەهاند، ئەو ئامادە نە ب تایبەتمەندیا خوە تەڤلی لێڤەگەرا کوردی ببن.
ئەندامێ پۆلیتبورۆیا پێشڤەروو ئەحمەد سلێمان ل سەر تەڤلیبوونا پارتیا وان د ناڤا دیالۆگا کوردی – کوردی دە ژ بۆ ک٢٤ێ راگەھاند: “ژ مە نەھاتی خواستن کو تەڤلی ڤان دانووستاندنان ببین. دەستپێکێ دانووستاندن د ناڤبەرا ئەنیکیسێ و پەیەدێ دا بوو. دەما خواستن بەرفرەھ بکەن، دانووستاندن بوو د ناڤبەرا ئەنەکەسێ و پارتیێن ئێکەتیا نیشتمانی. پارتیا مە و پارتیا ئەل وەحدە نە د ناڤا وان ھەر دو چارچۆڤەیان دا نە، وان ژی لایەنێ سێیەمین د ڤان دانووستاندنان دا قەبوول نەکر.”
سلێمان دیار کر: “مە پێشنیازەک دا فەرماندارێ گشتی یێ ھەسەدێ مەزلووم عەبدی و لایەنێ ئەمریکی، پشتی پرسگرێکێن د ناڤبەرا ھەر دو لایەنان دا چارەسەر ببن، باشە کو تیمەک بهێتە ئاڤاکرن و نوونەرێن پارتیان پێکڤە کۆم ببن و ل سەر ھەر تشتەکێ رێکەفتنێ بکەن. پشتی وێ ژی کۆنگرەیەک بهێتە گرێدان. لێ ھاتە گۆتن کو ئەڤ یەک ژ ئالیێ ئەنەکەسێ ڤە ناهێتە قەبوولکرن.”
گۆت ژی: پارتیا مە بەشەکا سەرەکی یا ئەنەکەسێ بوو و رۆلەکا وێ یا مەزن د دامەزراندنا ئەنەکەسێ دا ھەبوو. پشترا ژ بەر سەدەمێن رێخستنی ئەم ژ ئەنەکەسێ دەرکەتین. لێ تێکلیێن مە دگەل ئەنەکەسێ بەردەوامن. ھەگەر بهێتە خواستن ئەم دگەل لایەنێ ئەنەکەسێ تەڤلی دانووستاندنان ببین، دڤێت دەستپێکێ ئەو سەدەمێن کو ئەم ژ بەر وێ ژ ئەنەکەسێ دەرکەتینە، بهێنە چارەسەرکرن. لێ نھا ژ بلی پرسگرێکێن بەرێ، ھندەک نەرینێن سیاسی ژی ھەنە، دڤێت ئەم گوفتووگۆیێ ل سەر بکەین.”
ئەندامێ پۆلیتبورۆیا پێشڤەروو دیار کر، شاندا پەدەکە-سێ دەما بەری دو رۆژان ساردانا وان کری، چ پێشنیاز ژ بۆ تەڤلیبوونا پێشڤەروو د ناڤا دانووستاندنان دا نەکر.
ل سەر مەرجێن پێشڤەروو یێن تەڤلیبوونا ناڤا لێڤەگەرا کوردی دا، ئەحمەد سلێمان دیار کر، وان پێشنیازێن خوە ژ بۆ تەڤلیبوونا د “لێڤەگەرا کوردی” دا دانە پەدەکە-سێ و فەرماندارێ گشتی یێ ھەسەدێ مەزلووم عەبدی و گۆت: “ئەم د بن ئیرادەیا چ لایەنەکێ دا دەرباسی ناڤا لێڤەگەرێ نابین. ئەم دخازین ب تایبەتمەندیێن خوە تەڤلی ببین.”
دا زانین ژی، “مە ژ ENKS، PYNK، مەزلووم عەبدی و لایەنێ ئەمریکا خواستیە کو رێکێ ڤەکەن. ئەم وەک پارتیا پێشڤەروو ئامادەینە تەڤلی ناڤا ڤێ پرۆسەیا سیاسی و لێڤەگەرێ ببین. ھەگەر ئەم د ناڤا ڤێ لێڤەگەرێ دا بین، دێ دەولەمەندتر بیت.”
