باله‌فرێن جه‌نگ یێن ده‌وله‌تا تركیێ ئیرۆ جاره‌كه دن ل گوندێن باشوورێ كوردستانێ ئێریشی په‌كه‌كێ كر و گونده‌كێ سینۆرێ پارێزگه‌ها دهۆكێ بۆردۆمان كر.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا سێشه‌می 29/9/2020ان، باله‌فرێن جه‌نگ یێن ده‌وله‌تا تركیێ لڤ و ته‌ڤگه‌رێن په‌كه‌كێ ل بلنداهیێن چیایێ گوهه‌رزێ هه‌ده‌ف كرن و هه‌ژماره‌كا مووشه‌كان ل سه‌رێ چیایێ ناڤبووری دانه.
ده‌ست نیشان كر، باله‌فران ل ده‌مژمێر 10:00 هه‌یا 10:25 خوله‌ك یێ سپێدێ، 4 مووشه‌ك ل خالێن په‌كه‌كێ ل سه‌رێ چیایێ گوهه‌رزێ كو دكه‌ڤه باكورێ گوند دانه.
ل گۆر دیمه‌نێن ڤان ئێریشان كو ژ بۆ پێگه‌ها مه هاتنه شاندن، دۆمانه‌كه مه‌زن ل جیێ كه‌تنا مووشه‌كا ل سه‌رێ چیایێ گوهه‌رزێ خوه‌یا دبه.
تێ زانین گوندێ گوهه‌رزێ گرێدای ناڤچه‌یا دێرالۆكێ یه ل ده‌ڤه‌را نهێلێ، ب سه‌ده‌ما هه‌بوونا په‌كه‌كێ ل بلنداهیێن چیایێ گوهه‌رزێ، ئاقارێ گوند و چیایێ گوند ب به‌رده‌وامی دكه‌ڤن به‌ر ئێریشێن باله‌فرێن تركیێ.
ژ ده‌ستپێكا ئێریشێن ده‌وله‌تا تركیێ ل سه‌ر باشوورێ كوردستانێ كو ل ناڤه‌راستا مه‌ها خزیرانا ئیسالێ ده‌ست پێ كربوو، په‌كه‌كێ لڤینێن گه‌ریلایێن خوه خستنه ناڤا گوند و سینۆرێ باژارۆكان، په‌كه‌كێ یه‌ك ئامانج ژ ڤێ هه‌نگاڤێ هه‌یه، ئه‌و ژی گه‌ریلایێن خوه ژ ئێریشێن ده‌وله‌تا تركیێ بپارێزه، هه‌موه‌خت گوندێن باشوورێ كوردستانێ ببن مه‌یدانا شه‌ر و ژ هه‌مولاتییان وه‌رن ڤالا كرن.
