ل دێرسمێ دەست ب سەر پێداویستێن ژیانێ یێن پەکەکێ ھاتە گرتن

ل دێرسما باکورێ کوردستانێ جەندرمەیێن دەولەتا ترکیێ دەست ب سەر گەلەک پێداویستییێن ژیانێ یێن گەریلایێن پەکەکێ دا گرت.

د داخویانیا پاریزگەها دێرسمێ دا ھاتە دیارکرن کو جەندرمەیێن فەرمانداریا جەندرمەیان یا باژێرێ دێرسمی ل چۆلوارێ ناڤچەیا پولومورێ ئۆپەراسیۆن ئەنجام دا و د ڤێ ئۆپەراسیۆنێ دا، جەندرمەیان دەست ب سەر هەژمارەک زێدە ژ پۆێداویستیێن ژیانا رۆژانە یێن گەریلایێن پەکەکێ دا گرت.

د داخویانیێ دا ھاتە راگھاندن کو د ئۆپەراسیۆنێ دا ل ناڤچەیێن ھاتیە تەسبیتکرن کو پەکەکە ب کار دئینیت دا 700 کیلۆگراما ئار، 100 کیلۆگرام شەکر، 150 کیلۆگرام برنج، 200 کیلۆگرام ساڤار، 400 پاکیت رژدە، 70 کیلۆگرام چای، 150 کیلۆگرام خوێ، 50 کیلۆگرام تووتن، 50 کیلۆگرام پەنێر، 30 کیلۆگرام مەعجینا تەماتێ، 25 کیلۆگرام زەیت، 60 کیلۆگرام نیسک، 25 کیلۆگرام نۆک، 25 کیلۆگرام فاسوولی، 3 جۆت پێلاڤێن مەکاپ، 200 میتر نایلۆن، 200 میتر وەریس و 140 باتری ھاتنە بدەستخستن.