ل ئێڤارییا رۆژا پێنجشه‌مبێ، «غازی سالح ئالیخان» یێ رێڤه‌به‌رێ ئاساییشا ده‌ریێ سه‌رزێرێ یێ سنۆری، د مالا خۆڤه ل گوندێ بیگداودا ب ده‌ستێ چه‌كدارێن نه‌ناس كری هاته شه‌هید كرن، گوللـه‌یه‌كا نیشان شكێن دوماهی ب ژیانا «بازێ مالباتا ئالیخان» ئینا، هه‌ر چه‌نده كو لێكۆلین ل سه‌ر ڤێ كریارا تیرۆرستی ژ بال سازیێن ئه‌منی یێن باشوورێ كوردستانێ ڤه به‌رده‌وامه، لێ یا راست هه‌موو ئاماژه و به‌لگه ژ بۆ وێ یه‌كێ دچن كو «چه‌كدارێن په‌كه‌كێ» ئه‌ڤ كاره ئه‌نجام دایه.
«غازی سالح ئالیخان» رێڤه‌به‌رێ ئاساییشا خالا سه‌رزێرێ یا سنۆری ل ناڤبه‌را باشوور و باكورێ كوردستانێ دا، ل ئێڤارییا رۆژا پێنجشه‌مبێ 8/10/2020ێ و ل ده‌مێ بێهنڤه‌دانێ كو ل ناڤا مالا خۆ بوو ل گوندێ بیگداودا یێ گرێدای ناحیا كانی ماسێ، ژ لایێ چه‌كدارێن نه‌ناس كری ب نیشانشكێنێ هاته ئارمانج كرن، غازی ئالیخان، ل ده‌ما ڤه‌گوهاستنا وی ژ بۆ نه‌خۆشخانێ و ب ئه‌گه‌را خوینبه‌ربوونێ گیانێ خۆ ژ ده‌ست دا.
د ڤێ بوویه‌را تیرۆرستی دا پێدڤییه هنده‌ك خال بهێنه روهن كرن، ئه‌و ژی وه‌ك مالباتا «شه‌هید غازی» ژ بۆ مه‌دیایا باشوورێ كوردستانێ داخویانی دای، غازی چ كێشه و گرفته‌ك ل گه‌ل چ لایه‌كی نه‌بوو، وان گۆت كو چه‌كدارێن ل ده‌ڤه‌رێ ئه‌وێن كو هه‌ر كه‌س دزانیت كی نه، به‌ری نوكه گه‌ف ل غازی كرینه و چه‌ندین جاران ته‌قه ل مالا وی كرییه.
یێك ژ برایێن «شه‌هید غازی» ل سه‌ر گۆرا وی ل ده‌ما ڤه‌شارتنێ گۆت: «وان چه‌كداران دڤییا غازی بكه‌ڤیته بن ئیراده‌یا وان دا، لێ به‌لێ غازی ئه‌ڤ یه‌ك قه‌بوول نه‌كر و ژ رێیا كوردایه‌تی و وه‌لاتپارێزیێ ده‌رنه‌كه‌ت، له‌وما ژی وی گیانێ خۆ ل پێناڤێ ڤێ ئارمانجا پیرۆز فیدا كر».
په‌كه‌كێ غازی سالح ئالیخان شه‌هید كر
ئه‌نجوومه‌نا ئاساییشا هه‌رێما باشوورێ كوردستانێ، هه‌روه‌ها سه‌رۆك وه‌زیرێ باشوورێ كوردستانێ، هه‌ر د زوو دا داخۆیانیێن فه‌رمی ل دۆر ڤێ كریارا تیرۆرستی به‌لاڤ كرن، د ڤان په‌یامێن سه‌رساخیێ دا، وان ژ بۆ مالباتا «شه‌هید غازی سالح» دوپات كر كو لێكۆلینێ ده‌ست پێ كرییه و بێ شك كه‌سێن كو ئه‌ڤ تاوانه ئه‌نجام دای، دی گه‌هنه سزایێ خۆ یێ عادیلانه.
نه‌تنێ گۆتنێن مالباتا «شه‌هید غازی سالح ئالیخان» وه‌كه به‌لگه دهێن دیتن، به‌لكو ده‌ڤه‌را كو «غازی» ژی لێ هاتییه شه‌هید كرن، ژ به‌ر كو تنێ چه‌كدارێن په‌كه‌كێ ل ده‌ڤه‌را به‌رواری بالا و كانی ماسێ هه‌نه و چ چه‌كدارێن دی ل وێ ده‌ڤه‌رێ هه‌بوون نینه، هه‌روه‌ها 80% ژ گوندێن «گه‌لیكێ و بیگداودا» چه‌كدارێن په‌كه‌كێ تێدا هاتن و چوونێ دكه‌ن و په‌كه‌كه ل وێرێ زاڵه.
ژ لایه‌كێ دی، هێشتا شوینوارێن گوللـه‌یێن كو به‌ری نوكه ل سه‌ر دیوارێن مالا «شه‌هید غازی سالح ئالیخان» ماینه، ده‌ما كو په‌كه‌كێ د به‌رێ دا گه‌ف لێ كرین و ته‌قه ل مالا وی كری.
ئه‌ڤه هه‌موو نه‌تنێ ئاماژه‌یه، به‌لكو به‌لگه‌یه كو «غازی سالح ئالیخان» ب ده‌ستێ چه‌كدارێن په‌كه‌كێ هاتییه شه‌هید كرن.
ئاساییشا هه‌ولێرێ: په‌كه‌كێ غازی ئالیخان تیرۆر كرییه و ئه‌ڤ چه‌نده بێ به‌رسڤ نابیت
پاش ده‌رباسبوونا دوو رۆژا ژ بوویه‌را تیرۆر كرنا رێڤه‌به‌رێ ئاساییشا ده‌ریێ سه‌رزێرێ یێ سنۆری، ئه‌ڤرۆ رۆژا شه‌مبیێ رێڤه‌به‌رییا گشتی یا ئاساییشا هه‌ولێر د به‌یانه‌كا نڤیسكی دا ئاشكرا كر كو غازی ئالیخان ب ده‌ستێ چه‌كدارێن په‌كه‌كێ هاتییه تیرۆر كرن.
ئاساییشا هه‌ولێرێ د داخۆیانییا خۆ دا ده‌ست نیشان كر كو پاش لێكۆلینا هویر ل سه‌ر بوویه‌را تیرۆر كرنێ، ئاشكرا بوو كو چه‌كدارێن په‌كه‌كێ غازی سالح ئالیخان ل گوندێ بیگداودا هاتییه تیرۆر كرن و دوپات كر كو ئه‌ڤ چه‌نده یا بێ به‌رسڤ نابیت.
رێڤه‌به‌رییا ئاساییشا هه‌ولێرێ ل دوماهییا داخویانییا خۆ داخواز ژ گه‌لێ دلسۆزێ باشوورێ كوردستانێ كرییه كو ل به‌رانبه‌ر ڤی كارێ تیرۆرستی هه‌لویست هه‌بیت.
په‌كه‌كه ل سه‌ر شێواندنا راستیێ به‌رده‌وامه
سۆشیال مه‌دیا سیبه‌ر یا په‌كه‌كێ ئاشكرا گۆتییه چه‌كدارێن په‌كه‌كێ رێڤه‌به‌رێ ئاساییشێ كوشتییه
تشتێ دی یێ كو د سه‌لمینیت په‌كه‌كه د كه‌یسا تیرۆر كرنا «غازی سالح ئالیخان» دا بێ گونه‌هـ نینه، سوشیال میدیا سیبه‌ر یا په‌كه‌كێ یه و هه‌روه‌ها كادر و شه‌یدایێن په‌كه‌كێ نه ل باشوورێ كوردستانێ كو هه‌موویان بزاڤ كرییه ب «یێك پۆست و یێك چاڤكانییا زانیارییان»، راستییا كه‌یسێ ب گوهۆرن، ب گۆتنه‌كا دی، هه‌موو بزاڤێن وان بۆ هندێ نه كو راستیێ ل به‌ر خه‌لكی ڤه‌شێرن و به‌هانه‌یه‌كێ ژ بۆ ڤی كارێ خۆ یێ قرێژ ببینن.
په‌یجێن سیبه‌ر وه‌ها به‌لاڤ كرییه كو شه‌هید سالح غازی جهێ گه‌ریلایێن په‌كه‌كێ ئاشكرا كرینه و ده‌ما كو وی GPS ژ بۆ ڤێ مه‌ره‌مێ د دانان، چه‌كدارێن په‌كه‌كێ هه‌ده‌ف كرییه، لێ به‌لێ یا راست «غازی سالح» د مالا خۆ دا و ل پیش چاڤێن زارۆكێن خۆ هاتییه ئارمانج كرن.
ژ بلی ڤێ په‌كه‌كه باش دزانیت كو ته‌كنه‌لۆژییا شه‌ر یا ده‌وله‌تا تركیێ د ڤی سه‌رده‌می دا هنده پێشكه‌تییه كو باله‌فرێن وان یێن درۆن دشێن پشیكێ ل ئه‌ردی كه‌شف بكه‌ن، ئه‌ڤجا ژ بۆ وان باله‌فران ترومبێله‌كا چه‌كدارێن په‌كه‌كێ تێدا كاره‌كێ ب زه‌حمه‌ت نابیت.
