زڕته‌كییا په‌كه‌كێ ل شه‌نگالێ د سه‌كه‌راتێ دا یه
پشتی رێككه‌فتنا د ناڤبەرا حکوومەتا باشوورێ کوردستانێ و حکوومەتا ئیراقێ دا ل سەر شه‌نگالێ، پەکەکێ وەک هەرجار د سۆشیال مەدیا و چاپەمەنییا خوە دا، ئێریشی حکوومەتا باشوور کر و نەرازیبوونا خوە ل سەر ڤێ رێككه‌فتنێ نیشان دا، ئه‌و رێككه‌فتنا ژ بۆ ئاسایی کرنا رەوشا شەنگالێ هاتییە ئەنجامدان.
ل شه‌نگالێ پەکەکێ ئالیگرێن خوە ل دژی هەرێما باشوورێ کوردستانێ دان مەشاندن
سیاسه‌تا سه‌ره‌كی یا پارتییا کارکەرێن کوردستانێ، دژایەتیکرنا هه‌ر كاره‌كێ حکوومەتا هەرێما کوردستانێ یە، ئەڤجا ئەو کارێ حکوومەتا کوردستانێ چەند كاره‌كێ باش ژی بیت و د بەرژەوەندییا گەلێ کوردستانێ ژی دا بیت، لێ بەلێ پەکەکە هەر دژایەتیێ دكه‌ت، ئه‌ڤرۆ ژی وێ ئالیگرێن خوە کو هەژمارا وان ژ چەند سەد کەسان پتر نەبوو ئێخستنە ناڤا جادەیێن شه‌نگالێ و خوه‌پێشاندانه‌ك ب ناڤێ پێکهاتەیێن شه‌نگالێ پێ دا كرن، تشتێ گه‌له‌ك سەیر ئەڤەیه کو داخوازێن «پێکهاتەیێن شه‌نگالێ» وەک پەکەکە دبێژیت، هەر هەمی ل دژی حکوومەتا هەرێما کوردستانێ نە.
ئەڤ یەک دیار دکەت کو هەر جهێ پەکەکە لێ بالا دەست بیت، هەر جهه‌كێ پەکەکێ هەبوونا خوە لێ هه‌بیت، هەر جهه‌كێ بێهنا پەکەکێ ژی لێ بهێت، کوردایەتی، نشتیمانپەروەری، ئالا و ناڤێ کوردستانێ کو ژ پیرۆزیێن کوردستانییانە دبنه تشتەکێ پاشکەفتی و کرێت و کەس نه‌شێت به‌حس لێ بكه‌ت، ل وی جهی هەر جوره به‌حس کرنەکا ل سه‌ر ئالا، خاک، پێشمەرگە و حکوومەتا هەرێمێ، د نه‌رینا په‌كه‌كێ دا دبیته خیانەت و پاشڤەروویی.
ئه‌رێ ما ئیرادەیا گەلێ شه‌نگالێ خواستەک و سیاسەتێن شاش یێن پەکەکێ و دژایه‌تیکرنا حکوومەتا باشوورێ کوردستانێ یە؟
هەرچەنده کو پەکەکێ خرڤەبوونا ئالیگرێن خوە وەک خرڤه‌بوونا گەل دده‌ته ناساندن، لێ بەلێ ب تنێ ب ئانالیزەکرنا خواستەک و لێنێرینا وان پانکارتێن كو د وێ خوه‌پێشاندانێ دا هاتینه بلند كرن پێک ئانییه، مرۆڤ دشێت بزانیت كو ئه‌ڤ كه‌سێن خرڤه‌بوویی ب تەنێ ئالیگرێن پەکەکێ نە و چ پێوەندییا وان ب پێکهاتە و داخوازیێن گەلێ شه‌نگالێ ڤه نینە.
پەکەکێ دیسان وەک هەرجار ب سلۆگان و بلندکرنا پانکارتێن ب زمانێ ئەرەبی، دژاتییا خوە ژ بۆ حکوومەتا هەرێما کوردستانێ نیشان دا، دیسان ئیسبات کر کو کارێ وێ ب تەنێ نه‌هێلانا دەستهلات و ستاتۆیا هەرێما باشوورێ کوردستانێ و نەشرینکرنا وێ یە ل ده‌ڤ گەلێ ده‌ڤه‌رێ ب گشتی و کوردێن شه‌نگالێ ب تایبەتی، ئەڤ یەکه ژی ب روهنی د وان نڤیسینێن ل سەر پانکارێن کەسێن خرڤەبوویی دا دیارە، دەما ل سەر وان پانکارتان نڤیسای: «ئەم چ بریارێن ل دەرڤەیی ئیرادەیا گەلێ شه‌نگالێ قەبوول ناکه‌ین» ل ڤێرێ پرسا سەرهلددەت ئەڤەیه، گه‌لۆ ما قەی ئیرادەیا گەلێ شه‌نگالێ خواستەک و سیاسەتێن شاش یێن پەکەکێ و دژایه‌تیکرنا حکوومەتا باشوورێ کوردستانێ یە؟! ما قەی ئیرادەیا ئالیگرێن پەکەکێ تەمسیلا ئیرادەیا هەموو شه‌نگالییان دکەت؟!.
په‌كه‌كه ڤێ گۆتنێ ب زۆری ب گه‌لێ شه‌نگالێ دده‌ته گۆتن:
«ئەم دەستهلاتدارییا هەرێما کوردستانێ ل سەر شه‌نگالێ قەبوول ناکه‌ین»
ل سەر هندەک پانکارتێن دی مەرەما سەرەکی یا پەکەکێ ب زەلالی دیار دبیت دەما ل سەر نڤیساندی: «ئەم دەستهلاتدارییا هەرێما کوردستانێ ل سەر شه‌نگالێ قەبوول ناکه‌ین»، گەلۆ ئەڤه چ لۆژیکە پەکەکێ بۆ ئالیگرێن خوە چێکری کو بشێن داخوازییه‌کا ب ڤی ئاوایی نەشرین بکه‌ن؟ گەلۆ بۆچی پەکەکە و ئالیگرێن وێ ب دەستهلاتدارییا ترکیێ، ئیرانێ، سووریێ و ئیراقێ رازی دبن، لێ بەلێ ب دەستهلاتدارییا حکوومەتا هه‌رێما كوردستانێ رازی نابن؟! ب راستی ئەڤه پرسەکە کو پێدڤییه پەکەکە و ئالیگرێن وێ بەرسڤێ ل سەر بده‌ن!
پەکەکە تشتێ کو پتر ژ هەر تشتی به‌حس دکەت پێڤاژۆیا «براتییا گەلانە» لێ هەتا نها پەکەکە نه‌شییا براتییا د ناڤبەرا کوردان دا بپارێزیت، هه‌تا نها نه‌شیایه کوردان وەک برا قەبوول بکەت، ل هەر جهێ کو پەکەکە تێدایە براتی و هەڤدو قەبوول کرنێ هەبوونا خوە لێ نینە، پارتییەک کو نه‌شێت براتییا دگەل هەڤ نڤشێن خوە بپارێزیت، پارتییا كو نه‌شێت ژ بلی ئایدۆلۆژی، سەرۆک و پارتییا خوە کەسەک یان پارتییەک یان سەرۆکەک دی قەبوول بکەت، دێ چەوا شێت براتییا د ناڤبەرا گەلان دا دروست بكه‌ت؟!! ئەڤ چه‌نده وێ دیار دکەت کو «براتییا گەلان» ئه‌وا پەکەکە پرۆپاگاندایێ بۆ دکەت و وەک ستراتیژییا خوە نها کاری ل سەر دکەت ژبلی کۆلە کرنا کوردان و بندەستکرنا وان یا دوبارە تشته‌كێ دی نینه.
جینایه‌تێن په‌كه‌كێ ل شه‌نگالێ
تێ زانین پارتییا كاركه‌رێن كوردستانێ، پاش رزگار كرنا شه‌نگالێ ژ بال پێشمه‌رگه‌یێن باشوورێ ولات ڤه، كه‌تنه ناڤا باژار و ده‌ردوورا وێ دا، ب تایبه‌ت پاش بوویه‌رێن 16 ئۆكتۆبه‌را 2017ێ كو وان ملێ خوه خستییه بال حه‌شدا شه‌عبی و باره‌گه‌هێن خوه ل وێرێ چێكرنه.
ب سه‌ده‌ما هه‌بوونا په‌كه‌كێ ل شه‌نگالێ، ئه‌ڤ ناڤچه ب به‌رده‌وامی دكه‌ڤیته به‌ر ئێریشێن ده‌وله‌تا تركیێ و زرارا ڤان ئێریشان ته‌نێ ب سڤیلێن شه‌نگالێ دكه‌ڤیت، هه‌موه‌خت په‌كه‌كه ب ره‌ڤاندنا ب سه‌دان كه‌چ و جوانێن ئێزدی یێن شه‌نگالێ سووچباره.
ئیداره‌یا شه‌نگالێ ل رۆژێن رابووری ئه‌شكه‌ره كر كو ل ڤێ داویێ ژی په‌كه‌كێ نێزی 70 جوانێن ئێزدی ره‌ڤاندنه و خستنه ناڤا زیندانێن نهێنی دا، هه‌روه‌ها ب سه‌ده‌ما چه‌كدارێن په‌كه‌كێ و حه‌شدا شه‌عبی 80% یا ئاواره‌یێن شه‌نگالێ نه‌ڤه‌گه‌رینه.
ژ بۆ ب داوی ئانینا ڤان هه‌موو كریزان و ئاسایی كرنا ره‌وشا شه‌نگالێ، حكوومه‌تێن باشوورێ كوردستانێ و ئیراقێ ب چاڤدێرییا ئامه‌ریكایێ رێككه‌فتنا شه‌نگالێ ئیمزا كرن، ئه‌ڤێ رێككه‌فتنێ خه‌باتا نه‌نه‌ته‌وه‌یی یا په‌كه‌كێ ل شه‌نگالێ ئێخستییه د سه‌كراتا مرنێ دا و ل گه‌ل بجهـ ئینانا وێ، ده‌ستهلاتا په‌كه‌كێ و میلیشیایێن وێ ب ته‌ڤاهی ل شه‌نگالێ و دۆربه‌را وێ نامینن.
رێككه‌فتنا د ناڤبەرا ھەولێر و بەغدایێ دا وه‌ھایە:
مژارا ئیداری:
دێ قائیمقامه‌كێ نوو ژ بۆ شەنگالێ هێته هه‌لبژارتن.
پشتی دەستنیشانکرنا قائیمقامه‌كێ نوو، لژنه‌یا ھەڤبەش دێ هێته پێکئینان، ژ بۆ پێداچوونێ د پێگەھێن ئیداریێن دی دا.
مژارا ئەولەھیێ:
پۆلیسێن ناڤخوه‌یی و دەزگەھێن ئاساییشا نشتیمانی و ھەوالگیری دێ بەرپرساتییا پاراستنا د ناڤا قەزایێ دا وه‌رگرن و ھەموو گرۆپێن چەکدارێن دی ژ بۆ دەرڤەیی قەزایا شنگالێ هێنه دەرخستن.
بھێزکرنا ئەولەھییا وێ قەزایێ، ب رێیا دامه‌زراندنا 2500 کەسان د ناڤا ھێزێن ئەولەھیێ ناڤخویی یا شه‌نگالێ دا.
ب دوماهی ئینانا ھەبوونا پارتییا کارکەرێن کوردستانێ په‌كه‌كێ ل شنگالێ و ل ناڤچەیێن دەردۆرا وێ، ھەروه‌ھا نابیت رۆلێ گروپێن سەر ب وێ ژی ڤه ل وێ ھەرێمێ هه‌بن.
مژارا ئاڤه‌دانكرنێ:
لژنه‌یه‌كا ھەڤبەش ژ حکوومەتا فەدەرال و حکوومەتا ھەرێما کوردستانێ ب ھەڤرێزیا ل گەل ئیدارەیا خوەجھی ل پارێزگەھا نەینەوایێ ژ بۆ دوبارە ئاڤەدانکرنا شه‌نگالێ دێ هێته پێكئینان.
ژ بۆ شۆپاندنا خالێن د تەوەرا ئیداری و ئەولەھیێ دا ھاتنە، لژنه‌یه‌كا مەیدانی یا ھەڤبەش ژ ئالیێن په‌یوه‌ندیدار یێن ھەر دو ئالییان دێ هێته پێكئینان، ژ بۆ چاڤدێرییا بجهئینانا خالێن رێکكەفتنێ.
