ب ئه‌گه‌را په‌كه‌كێ گونده‌كێ كرستیانان ل دهۆكێ هات بۆردۆمانكرن

ب ئه‌گه‌را په‌كه‌كێ گونده‌كێ كرستیانان ل دهۆك هات بۆردۆمان كرن

باله‌فرێن ده‌وله‌تا تركیێ ئیرۆ گونده‌كێ كرستیانان ل سینۆرێ پارێزگه‌ها دهۆكێ بۆردۆمان كر، زیانێن مه‌زن ب گوندی كه‌تنه‌، ئه‌ڤ هێرشه‌ ل ده‌مه‌كی چێبوویه‌ كو چه‌كدارێن په‌كه‌كێ د ناڤا گوندی دا بوون.

چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره‌ كر، ئه‌ڤرۆ رۆژا سێشه‌مبیێ 13/10/2020ێ، باله‌فرێن ده‌وله‌تا تركیێ حه‌ره‌كه‌تێن په‌كه‌كێ ل گوندێ «مێركاجیا» یێ بنارا چیایێ مه‌تینی بۆردۆمان كر، زیانێن مه‌زن گه‌هاندنه‌ گوندی.

ده‌ست نیشان كر، باله‌فران ل ده‌مژمێر 1:00 پاش نیڤرۆژێ، مووشه‌ك ل بیرا گوندێ « مێركاجیا» دانه‌ و زیانێن مه‌زن گه‌هاندینێ، ئاڤ ژ گوندی هاتییه‌ برین.

گوندێ «مێركاجیا» گونده‌كێ كرستیانانه‌ و دكه‌ڤیته‌ ده‌ڤه‌را به‌رواریا ل بنارا چیایێ مه‌تینی، ده‌مێ چه‌ند رۆژان بوو چه‌كدارێن په‌كه‌كێ ل دۆربه‌را گوندی هاتنوچوون دكر، هه‌روه‌ها خاله‌كا خۆ ل ژۆرا كۆنترۆلێ یا بیرا گوندی دانابوو، ئه‌ڤرۆ باله‌فران ئه‌و ژوورا ل ته‌نشت بیرێ بۆردۆمان كر.

هه‌ر چه‌نده‌ كو زیانێن گیانی یێن په‌كه‌كێ نه‌هاتینه‌ زانین، لێ به‌لێ زیان ب بیرا ئێرتیوازی یا گوندی كه‌تییه‌ و ئاڤ ل سه‌ر گوندی هاتییه‌ برین.

پارتییا كاركه‌رێن كوردستانێ، پاش ده‌ست پێ كرنا هێرشا تركیێ ل سه‌ر باشوورێ كوردستانێ، ب ئاوایه‌كی سیستماتیك حه‌ره‌كه‌تا گه‌ریلایێن خوه‌ ئێخستییه‌ ناڤ گوند و دۆربه‌را باژارۆكان، ب وێ ئارمانجێ ئه‌ڤ گونده‌ ببنه‌ مه‌یدانا شه‌ری و ژ وه‌لاتییان بهێنه‌ ڤالا كرن، وه‌لاتیێن گوندان پر ژ ڤی كارێ په‌كه‌كێ دلگرانن و ئه‌و دخوازن چه‌كدارێن په‌كه‌كێ دووری گوندێن وان بن ژ بۆ كو نه‌كه‌ڤنه‌ به‌ر هێرشان.

پوستێن ھەمان بەش