کلتوورێ قەبوول کرنا خیانەتێ، دەردەکی ب ئێشتر ژ خیانەتێ ب خوە

کلتوورێ قەبوول کرنا خیانەتێ، دەردەکی ب ئێشتر ژ خیانەتێ ب خوە

رێبوار کەرکووکی

ب هەلکەفتا 16ێ ئۆکتۆبەرێ، هەلکەفتا ب ئێشترین و کارەساتبارترین خیانەت د دیرۆکا گەلێ کورد دا من ب فەر زانی ژ لایەکێ دی ڤە ل ڤێ کارەساتا نەتەوەیی کو داگیرکاران و خیانەتکاران ب سەر دۆزا نەتەوەیا کورد ئینای بنێرم. دخوازم بزانم ئایا ئەگەر لاوازیا خوەناسکرنا نەتەوی نەبایە، گرووپەکێ بچووک و بێ شییان و کالفام دشییان وێ کارەسەتا نەتەوی ب سەرێ کوردان بینن و نیڤا ئاخا باشوورێ کوردستانێ بدەنە دەست دوژمنێن کوردان؟

گومان د ڤێ یەکی دا نینە کو د قۆناغا رزگاریا نەتەوی  یا هەموو نەتەوەیەکێ دا گرووپەک هەبوویە کو ژ بەر بەرژەوەندیێن شەخسی و گرووپی یێن خوە ملێ خوە دایە د گەل داگیرکاران و خیانەت ل نەتەوەیا خوە کریە. “ئابراهام لینکۆلن” سەرۆکێ ئەمریکایێ د ڤێ دەربارێ دا دبێژیت: “د شۆرەشا هەموو نەتەوەیەکێ دا، گەل ب سەر 3 دەستەیان دابەش دبیت. دەستەیا یەکەم کەمینەیەکن کو خەباتێ دکەن و ژ بۆ رزگارکرنا نەتەوەیا خوە خوهێ درێژن و خوینێ ددەن. دەستەیا دویەمین ژی کەمینەیەکن کو ژ بەر بەرژەوەندیێن بەرتەنگێن خوە یێن شەخسی و گروپی پشت دکەنە نەتەوەیا خوە و د سەنگەرێن داگیرکەران دا جیهـ دگرن و ل دژی شۆرەشگێرێن نەتەوەیا خوە شەری دکەن. گرووپا سێیەمین پرانیا جڤاکی نە کو د جاڤەرێبوونێ دانە بزانن کیژان لایەن دێ ب سەر کەڤیت و ل دووڤ لایەنێ سەرکەفتی دکەڤن”.

ئانکو ئەم دشێین ببێژین کو خیانەت کرن ل خەباتا رزگاریخوازانە یا نەتەوەیی دا تشتەکە غەریب نینە و هەرچەند کو تراژیدی و نە لۆژیکی یە هندەک کەس ل دژی نەتەوەیا خوە شەری بکەن، لێ بەلێ وەکو کەتوار بەردەوام د دیرۆکێ دا هەبوویە. د دیرۆکا خەباتا نەتەوەیی یا گەلێ کورد دا ژی جیهێ داخێ یە خیانەت بەشەکێ نەڤەقەتیایی یە ژ دیرۆکا وێ خەباتێ و ب دەهان جاران کورد ژ گۆپیتکا ئازادبوونێ بەر ب خوارێ گرێل کرینە. لێ بەلێ یاکو دناڤا کوردان دا ب ئاشکەرا دهێتە دیتن و د کێم بزاڤێن نەتەوی یێن دی دا هەست پێ دهێتە کرن، “کلتوورێ قەبوول کرنا خیانەتێ یە”. د هەموو نەتەوەیەکێ دا خیانەتکار ل جەم هەموو تەخ و چینێن نەتەوەیێ ڤە قرێژن و وەکە قرێژترین مرۆڤ لێ دهێتە نێرین، لێ جیهێ داخێ یە د ناڤا مە کوردان دا هێشتا هندەک کەس هەنە کو گەلەک ب لەز خیانەتا خیانەتکاران ژ بیر دکەن، چەپلەیان ژ بۆ لێددەن و ل دووڤ وان دکەڤن.

گەر ل ڤان سێ سالێن داویێ بزڤرین ب ئاشکەرا دێ بینین ئەو خیانەتکارێن کو ل گۆر هەموو لۆژیکان و یاسایێن مرۆڤی و ئەخلاقی و نەتەوی، پێدڤی بوو هاتبان دادگەهکرن و سزادان لێ بەلێ بەرەڤاژی د بلندترین ئاستا حیزبان دا جیهـ دگرن و هێشتا ل سەر کارتێکرنێن نێگەتیڤێن خوە بۆ سەر دۆزا نەتەوی یا کوردان بەردەوامن. کارەساتا 16ێ ئۆکتۆبەرێ و ئەو خیانەتا مەزن کو گرووپا کالفامێن ناڤ ئێکەتیا نیشتیمانی یا کوردستانی ب سەرۆکاتیا لاهور و ئاراس شێخ جەنگی ئەنجام دای ب ئێش و کارەساتبار بوو. مە زێدەگاڤی نەکریە گەر ببێژین ئەو کارەسات وەکو دۆمانەکێ ل سەر هەست و نەستا هەر کوردەکێ دێ مینیت و ب ڤان نێزیکان ناهێتە ژ بیرکرن، لێ یا ژ وێ کارەساتبارتر و ب ئێشتر ئەو دیمەن بوون کو د دەما هەلبژاردنێن کۆنگرەیا ئێکەتیێ و سەرەدانا لاهۆر بۆ دەڤ بەشەکێ ژ ئەندامێن سەرکرداتیا ئێکەتیێ هاتیە دیتن. ژ 16ێ ئۆکتۆبەرێ کارەساتبار تر ئەڤە بوو کو پشتی خیانەتێ کۆمەک ژ خەلکی ل دەردۆرا لاهۆر کۆم دبوون، دەست ژ بۆ وی لێ ددان و وێنە دگەل دگرتن و دوماهیێ هەڤسەرۆکی یا ئێکەتیێ وەکو خەلاتێ خیانەتا وی پێشکێشی وی کر.

پرانیا ئەندامێن ئێکەتیێ ب بێ بەرچاڤ وەرگرتانا کارڤەدانێن نێگەتیڤ یێن خیانەتا 16ێ ئۆکتۆبەرێ، پڕانیا وان کادرێن مەزن یێن پارتیا خوە کو ژ دامەزرینەرێن ئێکەتیێ بوون و ئەو پارتی مەزن کربوو دانە لایەکی. تاکە تاوانا وان کەسان ژی ئەڤە بوو کو گۆتبوو خیانەت کرن خرابە. پرانیا ئەندامێن ئێکەتیێ ژ بەر گەف و تەماعکرنا وان ب پیدانا پارە و پلەیێن حزبی ژ لایێ لاهور و گرووپا وی ڤە کەسێن ولاتپارێز ل ناڤەندا بریاردانا ئێکەتیێ دوور کرن.

ئەو کلتوورێ کو خیانەت کرنێ قەبوول دکەت و وەکو هەلویستەک نۆرمال دبینیت مەزنترین ئاستەنگ و مەترسی یە ل سەر رێیا خەباتا رزگاریخوازانە یا گەلێ کورد دا و حەتا کو ئەڤ کلتوورە نەهێتە گوهرین، پێدڤی دکەت کوردستان بەردەوام ل بەندا خیانەتێن دن بیت. کلتوورەک کو گەر خیانەتا سالا 1966ێ قەبوول نەکربا، پشتراستم خیانەتا 16ێ ئۆکتۆبەرا سالا 2017ێ ژی ل دووڤ خوە نەدئینا.

جیهێ داخێ یە ئەڤ کلتوورە وەختە ل جڤاکا کوردستانێ دا زێدەتر وەرارێ دکەت و گەر ل مەیدانا سیاسی یا کوردستانێ بنیرین وێ ببینین سەرکردایەتیا بەشەکێ ژ پارتیان د دەست هندەک کەسان دا یە کو کێمترین باوەریا وان ب دۆزا نەتەوی یا کوردان نینە و ب هەموو رەنگەکێ دژایەتیا وێ دکەن. کەس حاشاتیێ ژ ڤێ یەکێ ناکەت کو سیاسەتا ناڤچەیی و ناڤدەولەتی کارتێکرنا پۆزەتیڤ و نێگەتیڤ ل سەر رزگاریا نەتەوەیان و ئێک ژ وان نەتەوەیا کورد هەیە، لێ یاکو پتر ترین درب ل دۆزا نەتەوی یا کوردان دایە، نەبوونا خوەناسینا نەتەوەیی و خیانەتا هندەک کەسان بوویە کو ل بن ناڤێ کوردایەتیێ دا کوردستان و خەباتا وێ یا رەوا ژ ناڤ دبن.

گەر دەما ئێک ژ ب ناڤ سەرکردەیێن سیاسی کو ل بن ناڤێ دیانەتێ دا ئامادە نابیت ژ بۆ رێزگرتن ژ ئالایێ کوردستانێ رابیتە سەر پێیا، ژ لایێ خەلکێ ڤە هاتبا لەعنەت کرن وی دەمی چ کەسەک دی پەیدا نەدبوو ب ناڤێ دیمۆکراسیێ بزاڤەکێ دروست بکەت ژ بۆ دژایەتی کرنا ریفەراندۆم و سەرخوەبوونا کوردستانێ. گەر گەلێ کورد لەشکەرکێشی یا پاسدارێن ئیرانێ ژ بۆ سەر خەباتکارێن رۆژهلاتا کوردستانێ ل کۆیێ پرۆتەستۆ کربا و لەعنەت ل بریاردەرێن وێ کربا وی دەمی لەشکەرکێشی یا سوپایێ ئیراقێ و حەشدا شەعبی ب فەرمانداریا قاسم سولەیمانی یێ تیرۆریست ژ بۆ سەر کەرکووکێ و ناڤچەیێن ڤەقەتاندی ژ کوردستانێ پێک نەدهات.  گەر د دەما خوە دا سلۆگانا “باکور باشوور رۆژهەلات” یا ئاپۆ و حاشاکرنا وی ل رۆژئاڤا کوردستانێ پرۆتەستۆ کربا بێ گومان داگیرکرنا عەفرینێ و سەرێ کانیێ و جیهێن دی یێن رۆژئاڤا پێک نەدهات. گەر دەستوەردانێن ئیرانێ لێ سلێمانیێ ژ لایێ خەلکێ ڤە هاتبان پرۆتەستۆکرن، نها ئێدی کەسێ وێرەکی نەدکر ب ئاشکەرا باس ل لامەرکەزیێ و دابەشکرنا هەرێما باشووری کوردستانێ بکەت. هەر وەها گەر نها ژی سیاسەت و کارێن دژە نەتەوە یێن گرووپا خیانەتکارێن 16ێ ئۆکتۆبەرێ و پرۆژەیێ خەندقاندنا کوردان یێ ئاپۆ  و ئیمرالیێ پرۆتەستۆ نەکەین، بێ گومان نەشێین ل هێڤییا ڤێ چەندێ بین کو بگەهین رزگاریا ئێکجاری.

د بەشی دویێ دا دێ هەول دەین ب کورتی باس ل سەدەمێن دروستبوون وەرارا کلتوورێ “خیانەت قەبوول کرنێ” و رێیێن چارەسەریێ بکەین.

ئەڤ مژارە بەردەوامە…

پوستێن ھەمان بەش