ENKS: ھندەک بەرپرسێن PYND دخوازن ژ ئەرکێن خۆ برەڤن

ENKS: ھندەک بەرپرسێن PYND دخوازن ژ ئەرکێن خۆ برەڤن

 ئەنجوومەنا نشتمانی یا کوردی ل سووریێ (ENKS) راگەهاند، د دەمەکێ دا کو گەلێ کورد ل هیڤییا نووچەیا ب دوماهی هاتنا رێکەفتنا یەکرێزیێنە، ھندەک بەرپرسێن لایەنێن دی (PYND) دخازن ژ ئەرکێن خۆ برەڤن.

نڤیسگەھا راگھاندنێ یا ئەنەکەسێ ئەڤرۆ داخویانیەک دەربارێ دیالۆگا کوردی – کوردی دا بەلاڤ کر و تێدا تەکەز کر، ژ بۆ دەستڤەئینانا مافێن گەلێ کورد ل سووریێ، یەکرێزیا ھەلویستا کوردی یەک ژ ئارمانجێن سەرەکی یێن ئەنەکەسێ یە.

ئەنەکەسێ د داخویانیا خۆ دا راگەھاند، ئەنەکەسێ ژ رێکەفتنا ھەولێرێ تا رێکەفتنا دوھۆکێ ب دلسۆزی کار ژ بۆ یەکرێزیا کوردی کر. ب ئەرێنی ژی بەرسڤا دەستپێشخەریێن یەکرێزیێ دا. د دەستپێشخەریا داویێ دا یاکو ب سەرپەرشتیا ئامەریکا ئەنجام دابوو، ئەنەکەسێ ژ بۆ سەرخستنا وێ، گەلەک ھێسانکاری د دانووستاندنان دا پێشکێش کرن و گاڤێن باش ژی تێدا ھاتن ئاڤێتن.

ئەنەکەسە دبێژیت: د دەما کو گەلێ مە ل بەندا نووچەیا ب دوماهی هاتنا رێکەفتنێ بوو، گەلەک داخویانی ژ لایێ بەرپرسێن لایەنێ دی دەرکەتن. ئارمانجا ژ وان داخویانیان ئەوە، ژ ئەرکێن کو ژ وان تێن خاستن برەڤن و گومانێ بخن راستیا پرۆسەیا دانووستاندنان دا.

ئەنەکەسێ تەکەز کر ژی، ئەو پابەندن ب پرۆسەیا دانووستاندنانێ یا دهێتە کرن و گەلێ کورد بەرژەوەندیا خۆ دزانیت، ب تۆمەتان و یاریکرن ب ھەستان ناهێتە خاپاندن.

ئەڤ داخویانیا نڤیسگەھا راگھاندنێ یا ئەنەکەسێ د دەمەکێ دایە، ئەندامێ دەستەیا سەرۆکاتیا پەیەدێ ئالدار خەلیل ژ بۆ مەدیا پارتیا خۆ راگەھاندبوو، دیالۆگا د ناڤبەرا پەیەنەکێ و ئەنەکەسێ گەھشتنە رێیەکا گرتی و راوەستیا نە.