په‌كه‌كه و هه‌ولێن تێكدانا جڤاكا ئێزدی ل شنگالێ
هه‌ر تشتی ل سه‌ر مه‌ژیێ تاكێ ئێزدی دكه‌ت
گه‌لێ ئێزدی، ژ گه‌لێن ره‌سن یێن كوردستانێ نه، هه‌رچه‌ند كو ب ده‌هان فه‌رمان ب سه‌رێ وان هاتینه، لێ به‌لێ وان قه‌د ده‌ست ژ نه‌ته‌وه، ئۆل و نه‌ریتێن خۆ به‌رنه‌دایه، وان قوربانیێن هه‌ره مه‌زن ژ بۆ مانا خوه داینه، وان ل همبه‌ری پتری 70 فه‌رمانان ل به‌ر خۆ دایه، ل به‌ر هه‌ولێن قڕكرنێ راوه‌ستان، لێ به‌لێ په‌كه‌كه ژ نوو هاتییه هه‌ولا تێكدانا ڤێ جڤاكا ره‌سن دده‌ت، دخوازیت ڤێ جڤاكی ته‌مام بێخیته ل ژێر خزمه‌تا رێكخستنا خۆ، ئۆلا وان بگوهه‌رینیت، شیرازا خێزانێ نه‌هێلیت، ب كورتاسی گه‌لێ ئێزدی، خاكا وان و سامانێ وان بكه‌ته سۆته‌مه‌نییا ته‌ڤگه‌را خوه یا نه‌نه‌ته‌وی.
پێگه‌ها «داركا مازی» ئاگاهیێن كو بۆ جارا یه‌كێ یه دهێن بهیستن ل ده‌ربارا هه‌ولێن په‌كه‌كێ یێن ژناڤ برنا جڤاكا ئێزدی ب ده‌ست خۆ ئێخستن، ئه‌م دێ به‌شه‌ك ژێ د ڤێ نڤیسێ دا باس بكین.
پاش فه‌رمانا 2014ان یا شنگالێ هه‌تا پاش رزگار كرنێ، په‌كه‌كه ب ئاوایه‌كێ سیستماتیك كه‌تییه د ناڤا هه‌ولێن تێكدانا شیرازا جڤاكی یا گه‌لێ ئێزدی دا، دخوازهیت ب ئایدۆلۆژییا خۆ هه‌ر تشتی ب گوهه‌ریت وه‌ك نه‌ریت، ئۆل و باوه‌رداری، ژێیاتییا نه‌ته‌وه و كوردبوونێ، ب كورتی ل سه‌ر مه‌ژیكێ وان هه‌ر تشتی دكه‌ت، دخوازیت ته‌رزێ ژیانا ڤێ جڤاكا ره‌سن ژ نوو ڤه ل گۆر ئایدۆلۆژی و به‌رژه‌وه‌ندییا رێكخستنا خۆ ئاڤا بكهت.
پێگه‌ها داركا مازی دێ د زنجیره‌یه‌كه نڤیسان دا، باس ل جڤاكا ئێزدی و په‌كه‌كێ ژ ڤان روویان ڤه بكهت:
په‌كه‌كه جڤاك و ئۆلا ئێزدییان
ئابوورییا ئێزدییان ل گه‌ل په‌كه‌كێ
رێكخستنێن ئێزدییان یێن په‌كه‌كێ
تێكدانا تۆبۆگرافییا ناڤچه‌یێن ئێزدییان
پاش رزگار كرنا شنگالێ ژ بال پێشمه‌رگه‌یێن باشوورێ ولات ڤه و دوورئێخستنا ته‌رۆرا داعشێ، په‌كه‌كه یا كو یه‌ك گوللـه د جه‌نگا رزگار كرنا شنگالێ دا نه‌ته‌قاندی، كه‌ت د ناڤا باژارێ شنگالێ دا، هه‌ر زوو باره‌گه‌هێن خوه ل وێرێ ب جهـ كرن و ده‌ست ب مه‌شاندنا سیاسه‌تا خۆ كر.
چ یه‌ك ژ ئارمانجێن په‌كه‌كێ ل شنگالێ خزمه‌تا ئێزدییان ناكه‌ن
نه زارۆ، نه ژن، نه ژی كچ و جوان و هه‌تا كابانیێن مالێ ژ شووشتنا مه‌ژیكی رزگار نه‌بووینه
په‌كه‌كێ گه‌له‌ك ئارمانج و مه‌به‌ست ژ چوونا ناڤا شنگالێ دا هه‌بوون، لێ به‌لێ چ یه‌ك ژ وان ئارمانجان ژ بۆ خزمه‌ت كرنا ئێزدییان نه‌بووینه، به‌لكو تنێ خزمه‌تا رێكخستنا په‌كه‌كێ بوویه، ژ بوونا سه‌لماندنا ڤێ ئاخافتنێ، ئه‌م دێ هنده‌ك زه‌لالییان ئێخینه سه‌ر هه‌نگاڤێن په‌كه‌كێ كانێ ڤێ رێكخستنێ ژ سالا 2014ێ ڤه ل شنگالێ ب چ ئاوا ته‌ڤ گه‌ریاییه و ته‌كۆشینا وێ خزمه‌ت ب گه‌لێ ئێزدی كرییه، یان ژی گه‌لێ ئێزدی به‌ر ب نه‌مانێ ڤه برییه.
د ده‌ربارێ جڤاكا ئێزدی و شیرازا تاك، خێزان و كۆمه‌لگه‌هێ دا، په‌كه‌كێ د سالێن رابووری دا كه‌تییه ناڤا بزاڤێن مه‌زن دا ژ بۆ چاندنا ئایدۆلۆژییا رێكخستنا خۆ د مه‌ژیكێ ئێزدییان دا، نه زارۆ، نه ژن، نه كچ و جوان و هه‌تا كابانیێن مالێ ژ پێڤاژۆیێن شووشتنا مه‌ژیكی رزگار نه‌بووینه.
نووچه‌گهانێ پێگه‌ها داركا مازی ده‌رباسی شنگالێ بوو و ئاگاهی ل ده‌ربارا ڤێ سیاسه‌تا په‌كه‌كێ وه‌رگرتنه.
په‌كه‌كه ژنا ئیزدی پالددەت كو گوهدارییا زه‌لامێ خۆ نەکەت
ئۆلدار و كه‌سێن كو ب نووچه‌گهانێ مه ئاگاهی دان، باس ل سته‌ما په‌كه‌كێ ژ هه‌ر ئالی كرن و گۆتن كو په‌كه‌كه ژنا ئیزدی پالددەت كو گوهدارییا زه‌لامێ خوه نەکەت و ژن وەک کابانییا مالێ ب ئەرکێن خوه نه‌رابیت.
په‌كه‌كه هه‌ول دده‌ت كابانییا مالێ ل شنگالێ وه‌ها په‌ره‌رده بكهت كو كارێ وێ نه برێڤه‌برنا خێزانێ و مالێ یه، به‌لكو ئه‌ركێن وێ به‌شداری كرنه د جڤین و سمینارێن په‌كه‌كێ دا و ژێرا دبێژن كو بلا زه‌لام ئه‌ركێن مالێ بكهت، ئه‌ڤ یه‌ك ژی هه‌ر چه‌نده كو كاره‌كێ ب شه‌رم و نه‌شاز ژ بۆ جڤاكا ئێزدی دهێته حه‌ساب كرن، لێ به‌لێ ل هه‌مان ده‌می بوویه ئه‌گه‌را ڤه‌قه‌تیانا هه‌ژماره‌كا هه‌ره زۆر یا خێزانان.
تێزێن ئاپۆی ب گوهێ ژنا شنگالی دا بانگ دده‌ت
په‌كه‌كه هه‌ول دده‌ت ب تێزێن ئاپۆی یێن ل ده‌ربارا ژنێ كو هه‌موو ژ ئاشۆپێ نڤیساندینه، ره‌فتارێ ب ژن و كابانییا مالێ ل شنگالێ بكهت، ئه‌و تێزێن وه‌كه ئازادییا ژنێ، سه‌ربه‌ستبوونا ژنێ، رۆلا ژنێ، كو ئۆجالان هه‌موو ژ ئاشۆپێ نڤیساندینه ب گوهێ ژنا ئێزدی دا دبێژیت، دخوازیت ژنێ ژ بۆ شۆرشا خۆ یا نه‌نه‌ته‌وه‌یی بكار بینیت.
ژنا ئێزدی یاكو بوویه سه‌مبولا به‌رخودانێ ب درێژاهییا دیرۆكێ، په‌كه‌كه دخوازیت مه‌ژیكێ وێ ژ نوو ڤه ب تێزێن لینینی-ماركسی ئاڤا بكهت، په‌كه‌كه دهێت و ژ نووڤه رێكێن به‌رخوه‌دانێ نیشانێ وێ دده‌ت.
په‌كه‌كه حه‌نه‌كان ب ئۆلا ئێزدییان دكه‌ت
ب ئێزدیێن شنگالێ را دبێژیت: «تاووسێ مه‌له‌ك چ فایدێ هه‌وه ناكه‌ت»
گه‌لێ ئێزدی ژ ئه‌زه‌ل گه‌له‌كه‌كی باوه‌رداره، ئۆلا وان یه‌ك ژ كه‌ڤنترین ئۆلانه د دیرۆكا مرۆڤاتیێ دا، باوه‌ر ب خوه‌دایێ گه‌ردۆنی هه‌یه، ب ده‌هان فه‌رمان ل سه‌ر ڤێ ئۆلێ دیتینه، لێ به‌لێ وان قه‌د ده‌ڤ ژ ئۆلا خوه به‌رنه‌دانه.
په‌كه‌كێ نه‌رینه‌كا پر عه‌جێب ل سه‌ر ئۆلا ئێزدییان هه‌یه، میناك وه‌ختا كو ئێزدییه‌ك ببێژیت: «هێڤییا خوه‌دێ» یان ناڤێ «تاووسێ مه‌له‌ك» دئینیت، په‌كه‌كه تۆره دبیت و ب وان را دبێژیت: «خوه‌دێ نینه، تاووسێ مه‌له‌ك ژی چ فایدێ هه‌وه ناكه‌ت»، هه‌موه‌خت ژێرا دبێژیت په‌یوه‌ندییا خوه‌دێ و تاووسێ مه‌له‌ك ب كارێ مه ڤه نینه، هوون چه‌ند خۆ ل هێڤییا تاووسێ مه‌له‌ك ڤه بهێلن، دێ هه‌ر فه‌رمان ب سه‌ر سه‌رێ هه‌وه دا بهێن.
