په‌كه‌كه‌ و هه‌ولێن تێكدانا جڤاكا ئێزدی ل شنگالێ

په‌كه‌كه‌ و هه‌ولێن تێكدانا جڤاكا ئێزدی ل شنگالێ
  • به‌شا دووێ

په‌كه‌كه‌ ل سه‌ر ئێش و ئازارێن ئێزدییان به‌رژه‌وه‌ندیێن حیزبی ب ده‌ست دئێخیت

په‌كه‌كه‌ كو بوویه‌ ده‌رده‌ك و كه‌تییه‌ جه‌سه‌دێ گه‌لێ كورد و ئێزدی، هه‌ر تشتی ژ بۆ به‌رژه‌وه‌ندییا رێكخستنا خۆ‌ دكه‌ت، وه‌ك‌ چاوا د به‌شا ئێكێ دا مه‌ باس ل كارتێكرنا خه‌راب یا وێ ل سه‌ر جڤاكا ئێزدی كر و كانێ ب چ ئاوایی بێریزی و حه‌نه‌كان ب ئۆلا كوردێن ره‌سه‌ن دكه‌ت‌، د ڤێ به‌شێ دا‌ ئه‌م دێ هنده‌ك ئاگاهیێن دی ل ده‌ربارا ره‌فتارا چه‌كدارێن دۆزا «براتییا گه‌لان» ل گه‌ل گه‌لێ شنگالێ بكه‌ین و كانێ ب چ ئاوایی په‌كه‌كێ ئێزدی ب هنده‌ك سلۆگانان خاپاندینه‌ و ب چ ئاوا ل سه‌ر مه‌ژیكێ وان د كار دكه‌ت.

نووچه‌گه‌هانێ پێگه‌ها داركا مازی ل باشوورێ كوردستانێ كاری ده‌رباسی شنگالێ بیت و ئاگاهی ل ده‌ربارا ڤێ سیاسه‌تا په‌كه‌كێ ژ وه‌لاتیێن شنگالێ، ئۆلدار و كه‌ساتیێن ناڤچه‌یێ وه‌رگرتینه‌.

په‌كه‌كێ قه‌د باوه‌ری ب كادرێن ئێزدی نینه‌

ژ داگیركرنا شنگالێ ل سالا 2014ێ، په‌كه‌كێ باز دا ده‌وربه‌رێن باژێری، ئه‌ڤ بازدانه‌ نه‌ژبۆ پاراستنا كچ، گه‌نج و دایكێن ئێزدی بوو، وان ئه‌ڤ فه‌رمانا كو ب سه‌رێ گه‌لێ ئێزدی دا‌ هاتی وه‌ك ده‌رفته‌ته‌كێ ژ بۆ رێكخستنا خۆ‌ ددیت، وان خواست هه‌ر د زوو دا‌ جهه‌كی بۆ خۆ‌ ل شنگالێ بگرن، شنگال ژ بۆ په‌كه‌كێ خه‌تا هه‌ره‌ گرنگ و ستراتیجی یه‌، ته‌علیماتێن قه‌ندیلی یێن ژ ئیران و تركیێ دهێن، ئه‌ڤ چه‌نده‌ ژ په‌كه‌كێ خواستبوو.

ل ژێر ناڤێ شه‌رێ تیرۆرێ، پاراستنا ئێزدییان، پاراستنا شنگالێ و خوه‌سه‌رییا شنگالێ و چه‌ندین سلۆگانێن دی كو په‌كه‌كێ ل سه‌ر گه‌لێ ئێزدی د مه‌شاندن، هنده‌ك كۆمێن چه‌كداران رێكخستن، لێ یا راست كۆمێن چه‌كداران نه‌ ژ بۆ پاراستنا شنگالێ و ئێزدییان بوون، به‌لكو په‌كه‌كێ جڤاكا ئێزدی وه‌ك‌ ژێده‌ره‌كا ساناهی ژ بۆ چێكرنا شه‌رڤانان ددیت، ب گۆتنه‌كا‌ دی په‌كه‌كێ ل ژێر ناڤێ «پاراستنا ئێزدییان» شه‌رڤان ژ بۆ دۆزا خۆ ئا قرێژ په‌روه‌رده‌ دكرن، وان ل ژێر ناڤێ «پاراستنا رومه‌تا ئێزدییان» كچ و گه‌نج خاپاندن.

كادر‌كێ یه‌به‌شێ كو نه‌هشت ناڤێ وی بهێته‌ ئه‌شكه‌ره‌ كرن، ژ نووچه‌گه‌هانێ مه‌ را گۆت: «په‌كه‌كێ هیچ باوه‌رییه‌ك ب ئێزدییان نینه‌، ئه‌و ب چاڤی سیخۆر و پا‌رە پەریس ل ئیزدییان دنێرن، چ کادره‌کێ په‌كه‌كێ جهێ خۆ نيشا ئيزديیان ناده‌ن‌، ژ خۆ ئاگاهییا كادرێن حیزبی و عه‌سكه‌ری یێن ئێزدی یێن گرێدای په‌كه‌كێ ژی ژ جهـ و باره‌گه‌ه‌هێن په‌كه‌كێ نینه‌، وه‌ختا كادرێن به‌رز یێن په‌كه‌كێ بخوازن بەرپرسێن ئێزدی ببینن، ل دەرڤەی باره‌گه‌هێن خۆ دبینن، یان چاڤێن وان گریددەن و دبەنە جهێ كۆمبوونێ، ئاستا باوه‌رییا په‌كه‌كێ ب كادرێن ئێزدی ل وی ئاستی یه‌ كو جاران د ناڤبەرا خۆ دا ب ترکی د په‌یڤن ژ بۆ كو كادرێن ئێزدی فێم نه‌كه‌ن كانێ نیقاشا وان ل سه‌ر چ مه‌سه‌له‌كێ یه‌.

عه‌ره‌ب ل ده‌ڤ په‌كه‌كی پله‌ ئێك و ئێزدی پله‌ دوونه‌

ئه‌ڤ كادرێ یه‌به‌شێ دبێژیت: په‌كه‌كه‌ زیدەتر باوەریێ ددەته‌ عەرەبان وان نێزی 2000 كه‌سێن عه‌ره‌ب كێشی رێزێن خوه‌ كرینه‌ و هه‌ری كێم 200 ژێ تیرورستێن داعشێ بوون و مالین ئێزدییان تالان کرینە و کچ و ژنێن وان رەڤاندینە.

 نوکە په‌كه‌كه‌ كچێن ئێزدی چەکدار دکەت و مل ب ملێ ڤان تیر‌ۆرستێن عەرەب یێن كو به‌رێ دگه‌ل رێكخستنێن داعشێ وقاعیده‌ شه‌ر كربوون، ب شەڤ و رۆژ ب هەڤرا د ئەرک دا نه.

ژ خۆ كارێ په‌كه‌كه‌ ل شنگالێ دكه‌ت‌، د نه‌رینا ئێزدییان دا به‌رده‌وامییا فه‌رمانێ یه‌

ژ ده‌ما كو په‌كه‌كه‌ كه‌تییه‌ د شنگالێ دا‌، بێ ناڤبر كچ و خۆرت ژێ ره‌ڤاندینه‌ و به‌رێ وان داینه‌ چیا، ئه‌ڤ كارێ په‌كه‌كێ هێژان به‌رده‌وامه‌‌ و گه‌هشتییه‌‌ ئاسته‌كێ وه‌ها كو هنده‌ك مایه‌ ئێزدی ناڤێ فه‌رمانا 74ێ لێ بكه‌ن.

پەکەکە ل سالێن دوماهیێ وه‌ك‌ چاوا ناسنامه‌یا کوردی بێ واتە کرییە و ناسناما نەتەوی ب پاشڤەرویی دبینیت، نها هه‌مان سیاسه‌تێ ل سه‌ر گه‌لێ ئێزدی د مه‌شینیت، دخوازیت‌ ناسنامه‌یا ئێزدییان وه‌ك نه‌ته‌وه‌یه‌ك ره‌سن یا كورد ئاسمیله‌ بكه‌ت‌، پەکەکە ل سەر ئێش و ئازارێن ئێزدییان  بەرژەوەندیێن حزبی ب دەست دئێخیت و دپارێزیت، فه‌رمانا 73ێ كو ئێزدییان ل سه‌ر ده‌ستێ تیرۆرا داعشێ ژیان كرن، نها فه‌رمانا 74ێ ل سه‌ر ده‌ستێ په‌كه‌كێ و ئایدۆلۆژییا وێ یا گه‌مار ژیان دكه‌ن.