داخویانیا 21 پارتی و رێخستنان ل قامشلۆ قێرینا بنکەتنا پەکەکێ یە
سیاسەتا کو ئیرۆ ل رۆژئاڤایێ کوردستانێ و باکور و رۆژھلاتێ سووریەیێ ژ ئالیێ (پەکەکێ) و پارتیێن د بن سیا وێ دە تێ مەشاندن، ئێدی نە تەنێ ژ ئالیێ مووخالفێن وان یێن کلاسیک ڤە، لێ بەلێ ژ ئالیێ ھەڤالبەند و ھیمێن ھەری بنگەھین یێن “رێڤەبەریا خوەسەر” بخوە ڤە ژی رووبروویی شکەستنەکە مەزن یا پۆلیتیک و ئیدەۆلۆژیک بوویە. کۆنفەرانسا رۆژنامەڤانیێ یا 21 پارتی و تەڤگەرێن سیاسی ل قامشلۆ، کو پرانیا وان بخوە ئەندام یان پشتگرێن پەرگالا ھەیی نە، بەلگەیا ھەری ئەشکەرەیا بنکەتنا ڤێ خەتێیە ل سەر ئاستا سووریەیێ.
ئەڤ داخویانیا ھەڤپار پێناسەیا بنکەتنەکە ستراتەژیکە کو مرۆڤ دکارە د چەند خالێن بنگەھین دە وەکی رووخاندنا سیاسەتا رۆژئاڤا و بنکەتنا سیاسەتا تەسلیمیەت و ئیخانەتا پەکەکێ شیرۆڤە بکە:
1. شکەستنا تەئۆریا “نەتەوەیا دەمۆکراتیک” و خیالێن ھەڤبەش
ب سالانە پەکەکە و باسکێن وێ یێن ل رۆژئاڤا (وەکی پەیەدە و تەڤ-دەم) جڤاکا کورد ب درووشمەیا “نەتەوەیا دەمۆکراتیک” و براتیا گەلان مژوول دکن. وان ژ بۆ خاترێ پێکڤەژیانا ب رەژیم و ئالیێن دن رە، داخوازێن نەتەوەیی یێن کوردان (وەکی مافێ چارەنڤیسێ، سیستەما فەدەرالا پێناسەکری و پاراستنا ناسنامەیا کوردستانی) پاشگوھ کرن. لێ بەلێ، دانانا ئەندامێن “جڤاتا گەل” (پارلامەنتۆیا سووریەیێ) ژ ئالیێ شامێ ڤە و بێدەنگیا ل ھەمبەری وێ، نیشان دا کو شام ب ھوورکەکی ژی گوھ نادە ڤان تەئۆریان و ھین ژی ب ھشمەندیا ناڤەندی یا شۆفینست تەڤدگەرە. ئەڤ داخویانیا 21 پارتیان، دانپێدانەکا دەرەنگکەتییە کو سیاسەتا پەکەکێ یا تاویزدایینێ تەنێ خزمەتا بھێزکرنا دەستێ داگیرکەرێن کوردستانێ کریە و دەربەیەکە مەزن ل کوردان دایە.
2. سیاسەتا تەفریقێ و لاوازکرنا ئەنیا ناڤخوەیی
بنکەتنا ھەری مەزنا ڤێ خەتێ ل رۆژئاڤا ئەوە کو نەکاری پلاتفۆرمەکی نەتەوەیی و یەکگرتی یا کوردستانی ئاڤا بکە. ب دارێ زۆرێ و ب رێنیشاندانێن ئایدۆلۆژیک، قادا سیاسی تەنێ ژ بۆ ئالیگرێن خوە ھشتن، ئۆپۆزیسیۆنا کوردی (وەکی ئەنەکەسە) چەوساندن و جڤاک دابەش کرن. ئیرۆ دەما کو سیستەما ناڤەندی یا سووریەیێ پۆلیتیکایێن ئاسیمیلاسیۆنێ دمەشینە، چ ئەنیەکە بھێز و یەکگرتی یا کوردی تونەیە کو ل ھەمبەری شامێ راوەستە. تەڤگەرێن کو ئیرۆ ل قامشلۆ داخویانیێ ددن، بخوە قوربانیێن ڤێ بێ-ستراتەژیێ نە کو ئێدی دبینن دەنگێ وان ناگھیژە چ دەری.
3. سەرساریا ل ھەمبەری گوھەرتنا دەمۆگرافیک: برینا کوورا سەرێ کانیێ
د دەقا داخویانیا پارتیان دە خالەکە پر مەترسیدار ھەیە: تایینکرنا کەسێن ژ “عەرەبێن خەمر” (عەرەبێن کو د سالێن 70یی دە ژ ئالیێ رەژیما بەعس ڤە ژ بۆ عەرەبکرنا ھەرێمێ ل سەر خاکا کوردان ھاتبوون بجھکرن) وەکی نوونەرێن ھەرێما داگیرکری یا سەرێ کانیێ. ئەڤ یەک بنکەتنا ھەری مەزنا لەشکەری و سیاسی یا قەندیلێیە. ل ئالیەکی خاکا کوردستانێ (عەفرین، سەرێ کانیێ، گرێ سپی) ژ بەر شەرێن بێپلان و داخویانیێن حەماسی رادەستی داگیرکەریێ ھات کرن، ل ئالیێ دی ژی رەژیم ب ریا پارلامەنێ رە قانونیبوونێ ددە گوھەرتنا دەمۆگرافیک. سیاسەتا پەکەکێ نەکاری نە ئاخێ بپارێزە و نە ژی د ئاستا دیپلۆماسیێ دە رێ ل بەر ونداکرنا مافێن کوردان بگرە.
4. تەشویقکرنا کۆچبەریێ و ڤالاکرنا رۆژئاڤا
بنکەتنا پۆلیتیک راستەراست باندۆرێ ل ژیانا جڤاکی دکە. نەبوونا ئاسۆیەکی زەلالێ سیاسی، نەبوونا ستاتویەکە فەرمی یا کو د قادا ناڤدەولەتی دە وەرە ناسین، و بەردەوامکرنا رەوشا “نە شەر و نە ئاشتی”یا کو رێڤەبەریا خوەسەر ھەرێم تێ دە ھشتیە، بوویە سەدەما کریزەکە کوورا ئابۆری و ئەولەھیێ. جڤاکا کوردا ل رۆژئاڤا، کو د دەستپێکا شۆرەشێ دە خوەدی ڤین و ھێڤی بوو، ئیرۆ ژ بەر ڤێ بێسەرووبەریێ بەر ب کۆچبەریێ ڤە دچە. سیاسەتا ھەیی ھەرێمێ ژ ھێزا وێیا ھەری مەزن، یانی ژ جوان و مرۆڤێن وێ، ڤالا دکە.
داخویانیا قامشلۆ فەریادا بنکەتنا پرۆژەیەکێیە کو ل سەر بنگەھا بەرژەوەندیێن دەرڤەیی سینۆرێن رۆژئاڤا ھاتبوو ئاڤاکرن. ئێدی ئەشکەرە بوویە کو سیاسەتا کو نوونەرتیا کوردان تەنێ وەکی ئاموورەکی بازارێ یێ ھەرێمی دبینە، نکارە مافێن رەوایێن گەلێ کوردستانێ ل سووریەیێ بپارێزە. ئەڤ شکەستنا توند نیشان ددە کو بێیی ڤەگەرەکە راستەقین بەر ب خەتا نەتەوەیی یا کوردستانی، بێیی قەبوولکرنا پرئالیبوونا سیاسی و بێیی دەرکەتنا ژ بن سیا بریارێن ئایدۆلۆژیک، پاشەرۆژا کوردان ل ھەرێمێ د بن مەترسیەکە مەزن یا فەنابوونێ دەیە.
