بەلگە فیلما بازێ مالا ئالیخان، عەگیدێ رۆژێن دژوار

ئیرۆ 40 رۆژ ب سەر شەهیدکرنا بازێ مالا ئالیخان، ئانکو غازی سالح ئالیخان، بەرپرسێ ئاساییشا گومرکا سەرزێری، ئێک ژ وان روویێن جوان یێن عەشیرەتا بەرواریا کو د ٨ێ چرییێ دا ژ لایێ پەکەکێ ڤە هاتە شەهید کرن دەرباس دبن.

 غازی سالح ئالیخان ل 8ی چریێ ژبەرکو رۆژا بێهنڤەدانێ بوو چوو گوندێ خوە، بێھنڤەدانێ. ئەوی باخچەیەکێ بچووک یێ بابکی ھەبوو. ئەو گوللـەیا ل بەر چاڤێن زارۆکێن وی ل بەدەنێ وی کەتی لاشێ وی پارچەکر. کچا وی یا بچووک سەرین ب چاڤێن ماتمایی ل بابێ خوەیێ کو ل سەر ئەردی بریندار رازای، دنێری. ئالیخان سەرەرایی ھەموو ھەولدانان نەھاتە رزگارکرن. وی پشت خوە پێنج زارۆک و ژنەکا چاڤبارین هێلا.

شەھید کرنا ئالیخان نە بریار و پلانا یەکینەیێن پەکەکێ یێن ل وێ دەڤەرێ  بوو. ئەو ب بریارەکا ناڤەندی یا پەکەکێ – کەجەکێ ھاتە تیرۆرکرن. داخویانیێن کو ل سەر ناڤێ ھەڤسەرۆکاتیا کۆنسەیا رێڤەبەرا کەجەکێ دهاتنە دان، ددەتە خویاکرن کو بریارەک هەڤبەش ژ بۆ ئەنجامدانا جینایەتان ل باشوورێ کوردستانێ ھاتیە دان. د ڤی واری دا، ئیحالە ب موراد قەرەیلان ھاتە دایین، ژبەرکو سەرۆکێ ھێزێن چەکدارە. ژ خوە د تەباخێ دا، ھەڤسەرۆکا کەجەکێ بەسێ ھۆزاتێ د ھەڤپەیڤینەکێ دا گۆت کو کوشتنا لایەنگرێن پارتییا دیمۆکراتا کوردستانێ رەوایە، و هەر شەرەکێ دگەل پارتییا دیمۆکراتا کوردستانێ ب براکوژی ناهێتە حساب کرن.

ب کورتی، کوژەرێن غازی سالح ئالیخان ئەڤ سێ کەسەنە: جەمیل بایک، بەسێ ھۆزات و موراد قەرەیلان. دانا داخویانیەکا فەرمی یا پەکەکێ – کەجەکێ د دەربارێ شەهیدبوونا غازی دا و حاساکرن ژ ئەنجام دایینا ڤێ تەرۆرێ، ڤێ راستیێ ناگوهرە کو غازی سالحئالیخان ژ هێلا پەکەکێ و ب بریارا رێڤەبەرێن وێ پارتیێ ڤە هاتیە تەرۆرکرن.

 غازی سالح ئالیخان کو ل رۆژا 8ی چریێ ب دەستێن قرێژی یێن پەکەکێ ھاتە تیرۆر کرن، د ڤێ بەلگە فیلمێ دا کو ل سالا 2017ێ دا ھاتییە چێکرن، باس ل خەبات و تەکۆشینا رۆژێن سەخت یێن بزاڤا رزگاریخوازی یا گەلێ کورد دکەت، غازی چیرۆکا دەرباسبوونا خوە و گرووپەک ژ جانفیدایێن کوردستانێ ژ بۆ پارچەیێن دی یێن کوردستانێ دکەت، چ ھاتە رێکا وان، چ ئەرک بوو سەرۆک بارزانی پێ سپارتی و چاوا ڤەگەرین، ب کورتاھی غازی وەکو عەگید ژیا و ل سەر رێیا ولاتپارێزیێ جان فیدا کر.

غازی سالح د ڤێ بەلگە فلمێ دا چیرۆک و سەرپێھاتی یا ھەژمارەک جانفیدایێن کوردستانێ ڤەدگێریت، ب تنێ دیتنا ڤێ بەلگە فلمێ بەسە ژ بۆ کو مرۆڤ بزانیت کی ژ لایێ پەکەکێ ڤە دهێتە ئارمانج کرن، ئەڤ بەلگە فیلمە دیار دکەت ھەر کەسێ ولاتپارێز بیت، ھەر کەسێ ژ بۆ ڤی وەلاتی کار بکەت و خەبات کربیت، کەسێ کو چ جاران رازی نە بووی بکەڤیتە بن کارتێکرنا دوژمنان، دبتە ئارمانجا پەکەکێ.

شەھید غازی ل ڤێرە باس ل ھندەک سەرپێھاتیێن خوە دگەل کۆمەک ژ پێشمەرگەیان دکەت، ئەو باس ل دەرباسبوونا گرووپەک ژ پێشمەرگەیان ژ رۆژھلاتێ کوردستانێ بەر ب باکور و ل وێرێ بەر ب باشوور دکەت، پێنگاڤ ب پێنگاڤ، دەم ب دەم ھەر تشتی ب دیکۆمێنت باس دکەت.

 

• غازی سالح دگەل ھەڤالرێیێن خوە دا ل سالا 1990ێ ب بریارا مەسعوود بارزانی، ب چ رەنگ گەھیشتن باشوورێ کوردستانێ؟

• دەما چووین باکورێ کوردستانێ لەشکەرێن ترکیێ چ ژ ڤێ گرووپا پێشمەرگەیان خواست و پێشمەرگەیان چ بەرسڤا لەشکەرێن ترکیێ دا؟

• وان ب چ رەنگ دەبارا ژیانا خوە دکر؟

• پێشمەرگەیێن بریندار چاوا ھاتنە دەرمانکرن؟

• گەلێ کورد ل باکورێ کوردستانێ ب چ رەنگ سەرەدەری دگەل وان دکر؟

• خارنا وان د دەما پێشمەرگاتیێ دا چ بوو؟

• ژیێ غازی چەند بوو دەما بوویە پێشمەرگە؟

• دەما خاترخواستنێ ل باژارێ شنوویێ بارزانی چ گۆتە غازی؟

• کێ بۆ فەرماندارێ ڤێ گرووپا پێشمەرگەیان؟

بەرسڤا ڤان پرسیاران و ب دەهان پرسیارێن دی د ڤێ بەلگە فیلمێ دا ببینن.