پەکەکێ ئێریشی پێشمەرگەیان کر

پەکەکێ ئێریشی پێشمەرگەیان کر

پارتییا کارکەرێن کوردستانێ “پەکەکێ” ئەڤرۆ رۆژا یەکشەمبی 25/10/2020ێ ل ناڤچەیا نەهلێ یا سەر ب باژارێ ئاکرێ ڤە ئێریشی هێزێن پشمەرگەیێن کوردستانێ کر.

چاڤکانیێن پێگەها دارکا مازی ل باشوورێ کوردستانێ ئاشکەرا کر کو ئیرۆ رۆژا یەکشەمبی ل دەمژمێر 2:30 گەریلایێن پەکەکێ تەقە ل هێزا پێشمەرگەیێن کوردستانێ ل گوندێ “شەهیێ” کرییە، و ب ئارپێجی و چەکێ بیکەیسی گوللـە بەردانە وان پێشمەرگەیێن کو دخواست ل وێ دەرێ نوقتەیەکا سەربازی ئاڤا بکەن.

هەرچەند کو گەریلایان تەقە ل پێشمەرگەیان کر، و هەرچەند هەژمارەکا زێدە یا پێشمەرگەیان ل وێ ناڤچەیێ بوون، لێ بەلێ پێشمەرگەیان ب چ رەنگا گووللـە نەبەردان وان و راگەهاند ئەو ناخوازن گوللـەیان بەردن گەریلایا و ناخوازن تەقەیێ ل برایێن خۆ بکەن، ژبەرکو شەرێ براکوژی ژ لایێ دەستهلاتدارێن باشوورێ کوردستانێ ڤە هاتیە حەرام کرن.

چاڤکانیێن پێگەها دارکا مازی هەر وەها ئاشکەرا کر، پشتی شکەستنا پەکەکێ ل حەفتەنینێ و رادەستکرنا وێ ناڤچەیا ستراتەژیک بۆ دەستێ ترکیێ، نها پەکەکە دخوازیت بارەگەهێن خۆ ل نێزیکی باژارۆکێ دینارتێ دانیت، داکو پاشان بشێت ب ڤێ بەهانەیێ ترکیێ کێشی وێ ناڤچەیێ ژی بکەت.