پسپۆرەکێ سەربازی: پەکەکە ل ھەمو جها ل دژی دەستکەفتێن کوردان خەباتێ دکەت

پسپۆرەکێ سەربازی: پەکەکە ل ھەمو جها ل دژی دەستکەفتێن کوردان خەباتێ دکەت

پسپۆرەکێ سەربازی دبێژیت، پەکەکە بوویە سیخور و داردەستێ دژمنان و ل ھەر چار پارچێن کوردستانێ ل دژی دەستکەفتێن کوردا خەباتێ دکەت.

پسپۆرێ سەربازی، محەمەد ھەمەوەندی ژ بۆ باس نیۆزێ ئاخفت و گۆت، پەکەکە تووشی کریزەکا ئابۆری و جۆگرافی یا مەزن بوویە. ژ بەر کو بەشەک مەزن ژ وان دەڤەرێن کو ل باکوور و دەڤەرێن دی د بن کۆنترۆلا وێ دا بوون، ژ دەست دایە. نھا پەکەکێ پێگەھا خوە ل باکوور و باشوور ژی ژ دەست دایە.

محەمەد ھەمەوەندی ھەر وەھا گۆت، پەکەکە ھەرێما کوردستانێ وەکە دژمنێ خوە دبینیت ژ بەر وێ ژی دخوازیت ئاریشەیان ژ بۆ حکوومەت و خەلکێ ھەرێما کوردستانێ دروست بکەت. دخوازیت ستاتوویا ھەرێما کوردستانێ لاواز بکەت و زیانێ بگەھینیتە ئاسایش، ئابۆری و جڤاکا ھەرێما کوردستانێ. ئارمانجا وێ ژی ئەوە ب هاریکاریا چەند کۆمێن دی، جھێ خوە قاھیم بکەت. چمکی پەکەکە ئێدی نەشێت ل باکوورێ کوردستانێ خوە بگریت و راستی شکەستنەکا مەزن ھاتیە.

وی پسپۆرێ سەربازی د بەشەکا دی یا گۆتنێن خوە دا گۆت، ئەگەر ل دیرۆکا ئاڤابوونا پەکەکێ بنێرن، ئەم دبینن کو ئەو گرووپ، ژ لایێ چەند دەولەتان ڤە ھاتیە چێکرن و هیچ خێرەکا وێ بۆ گەلێ کورد نینە. ھەبوونا پەکەکێ ل سووریێ باهرا پتر بۆ پاراستنا حکوومەتا حافز ئەسەد بوو. ژ بەر وێ ژی پەکەکە داردەستێ دژمنانە و خەباتا وێ د مفایێ نەیارێن کوردان و گەلێ کوردستانێ یە.

محەمەد ھەمەوەندی دا زانین ژی، پەکەکە بوویە رێخستنەکا سیخوریێ و ل ھەر چار پارچەیێن کوردستانێ ل دژی خەبات و دەستکەفتێن گەلێ کورد کار دکەت. ژ بەر وێ ژی پەکەکە ھەمی گاڤان، سەرئێشی بوویە بۆ گەلێ کورد و بوویە سەبەبا ئالۆزی و خرابکاریێ ل باشوورێ کوردستنانێ.