سپایێ پاسداران ناڤچه‌یا برادۆستی تۆپباران كر

سپایێ پاسداران ناڤچه‌یا برادۆستی تۆپباران كر

 سپایێ پاسدارا یێ ره‌ژیما ئیسلامی یا ئیرانێ، ئیرۆ ناڤچه‌یا برادۆستێ یا هه‌رێما باشوورێ كوردستانێ تۆپباران كر و زرار ب ره‌ز و باخێن شێنییان كه‌تنه‌.

چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره‌ كر، ئیرۆ رۆژا پێنجشه‌می 29/10/2020ان، سپایێ پاسداران یێ ره‌ژیما ئیرانێ ژ ئالیێ سینۆر ڤه‌، هه‌ژماره‌كه‌ گوندێن گرێدای ناڤچه‌یا سیده‌كان تۆپباران كرن.

 ده‌ست نیشان كر، ئه‌ڤ ئێریش ل ده‌مژمێر 11:38 خوله‌كێ به‌ریا نیڤرۆژێ پێكهاتییه‌ و هه‌ر یێك ژ گوندێن کەتینە، بەربزین و بنپەرێز یێن ناڤچه‌یا سیده‌كان كه‌تنه‌ به‌ر مووشه‌كان.

كۆمارا ئیسلامییا ئیرانێ ئه‌ڤ ده‌ما چه‌ندین سالانه‌ ب هێنجه‌تا هه‌بوونا پێشمه‌رگه‌یێن حزبا دیمۆكرات، ناڤچه‌یێن سینۆری یێن نێڤبه‌را باشوور و رۆژهلاتا كوردستانێ ب تایبه‌ت ناڤچه‌یێ بالكایه‌تی و برادۆستێ تۆپباران دكه‌ت.