ژنه‌كا ته‌مه‌ن 120 سال ل شرنه‌خێ یا باكورێ كوردستانێ، پاش كه‌تنا وێ ب ڤیرۆسا كۆڤید-19، ئیرۆ نه‌خوه‌شخانه ب جی هشت و ژ ڤێ ڤیرۆسێ له‌ش ساخ بوو.
مه‌نیجه ئه‌نجو ته‌مه‌ن 120 سال كو دایكا 12 كه‌چ و كورانه و پێتر ژ 100 نه‌ڤییان هه‌نه، به‌رییا 2 حه‌فته‌یان ئه‌و ب ڤیرۆسا كۆرۆنایێ نه‌خوه‌ش كه‌تبوو و پاش كو ره‌وشا وێ هنده‌كی خه‌ته‌ر كه‌تی، ژ بۆی نه‌خوه‌شخانێ تێ ڤه‌گوهاستن.
چاڤكانیێن ته‌ندروستیێ ئه‌شكه‌ره كرن كو تیمه‌كا گه‌رۆك یا چێكرنا تێستێن كۆڤیدێ، تێست ژ بۆ دایكا مه‌نجیه كربوو.
ئیرۆ رۆژا پێنجشه‌میێ، مه‌نیجه پاش كو ژ ڤیرۆسێ له‌ش ساخ بوو، نه‌خوه‌شخانه ب جی هشت و كارمه‌ندێن نه‌خوه‌شخانێ ب ده‌ست قوتانێ پێشوازی ل ده‌ركه‌تنا وێ كر.
حه‌لیمه ئه‌نجو كو دبیته بووكا مه‌نیجه ژ بۆ مه‌دیایێ ئاخڤی و گۆت كو خه‌سووا من پێتر خوارنێن خوه‌زایی دخۆت له‌وما وێ ئه‌ڤ نه‌خوه‌شی ب هێزه‌كا مه‌زن ده‌رباس كر و ڤه‌گه‌ری مالێ.
