په‌كه‌كێ‌ سه‌لماند ئه‌و پتری داگیركه‌ران ل دژی كوردستانێ یه‌

PKK-HPG-Kurdistan oil

پارتییا كاركه‌رێن كوردستانێ كو ژ ده‌ستپێكا دامه‌زراندنا خۆ هه‌ر تشت بۆ دژاتییا باشوورێ وه‌لات كرییه‌ و ل سه‌ر ڤێ سیاسه‌تا خۆ هه‌تا رۆژا مه‌ یا ئیرۆ به‌رده‌وامه‌، داوی گاڤا وێرانه‌كه‌ر یا ڤێ رێخستنێ به‌رییا دوو رۆژان هات ئه‌نجامدان وه‌ختا كو بۆریا په‌ترۆلێ ته‌قاندنی، ئه‌ڤ یه‌ك ژی دبیته‌ ئارمانج كرنا راسته‌ راست یا قووتێ خه‌لكی، ب ڤێ كریارا ته‌رۆریستی، په‌كه‌كێ ئیسبات كر كو ئه‌و چ خێره‌كێ ژ بۆ خه‌لكێ باشوور ناخوازیت، به‌لكو دخوازیت سیاسه‌تا برسیكرنا گه‌لێ باشوور ئه‌وا حكوومه‌تێن رابووری یێن ئیراقێ ده‌ست پێ كری، به‌رده‌وامیێ پێ بكه‌ت.

هێلا ڤه‌گوهاستنا په‌ترۆلا كوردستانێ كو به‌رییا چه‌ندین سالان حكوومه‌تا باشوور ژ بۆ ڤه‌گوهاستنا په‌ترۆلێ ژ بۆ به‌نده‌را جه‌یهان و ژ وێرێ ب رێیا ده‌ریا سپی ژ بۆ بازارێ جیهانێ چێكری، وه‌ك شاهـ ده‌مارا ئابوورییا هه‌رێما باشوور دهێته‌ هه‌ژمارتن، ب رێیا شاندنا په‌ترۆلێ، حكوومه‌تا باشوور شییا د چه‌ندین ره‌وشێن ب زه‌حمه‌ت دا ده‌رباس ببیت، ب تایبه‌ت ده‌ما كو حكوومه‌تێن ئیراقێ مووچه‌یێ فه‌رمانبه‌رێ هه‌رێما كوردستانێ بڕی.

په‌كه‌كه ئێدی‌ ب ته‌رزێ «داعشێ و قاعیده‌» ته‌ڤ دگه‌ریت

پارتییا كاركه‌رێن كوردستانێ به‌رییا دوو رۆژان  ب رێیا كریاره‌كا ته‌رۆریستی یا مینا رێخستنێن داعش و قاعیده‌، بۆریا په‌ترۆلا كوردستانێ ب ته‌قینه‌كێ هه‌ده‌ف كر و ئه‌ڤ یێك بوو سه‌ده‌ما راوه‌ستاندنا شاندنا په‌ترۆلا كوردستانێ.

حكوومه‌تا باشوور د به‌یانه‌كێ ده‌، ئه‌ڤ كریاره‌ ب ته‌رۆریستی ب ناڤ كر و گۆ كو ئه‌م ڤان كریاران ب چ ئاوایی قه‌بوول ناكه‌ین و رێ ناده‌ین ‌چ ئالی ده‌ستان درێژ بكه‌ته‌ قووتێ گه‌لێ باشوور، حكوومه‌تێ ئه‌شكه‌ره‌ ئه‌وێ دێ لێكۆلینێ ل سه‌ر ڤێ بوویه‌رێ ده‌ست پێ كه‌ن.

په‌كه‌كێ ب ئاوایه‌كی بێ شه‌رمانه‌ راگهاند كو وان ئه‌ڤ هێلا په‌ترۆلێ ته‌قاندییه‌ و شاندنا په‌ترۆلێ ژ بۆ ده‌وله‌تا تركیێ وه‌كه‌ جینایه‌ته‌ك دیتییه‌ و ب وێ به‌هانه‌یێ ئه‌ڤ كریاره‌كا ب ته‌رزێ ته‌رۆریستان كرییه‌.

په‌كه‌كه‌ هه‌ر ده‌ما تووشی شكه‌ستنه‌كێ دبیت، په‌نایێ ژ بۆ ده‌ستكه‌فتیێن ئالیێن دی دبه‌ت، وه‌ك چاوا ژ سالا 2017ێ پیلانان بۆ دژاتیكرنا حكوومه‌تا باشوور ددانیت، نها ئه‌ڤ پیلانێن وێ زێده‌تر ئاشكرا بووینه‌، وه‌ختا كو جه‌میل باییك و موراد كارایلان ب ئاشكرا گۆتین كو ئه‌و دێ هه‌ر تشتی كه‌نه‌ ئارمانج، یا راست ئه‌ڤ كارێ په‌كه‌كێ نه‌ ته‌نێ فرۆشتنا شه‌ره‌ ب حكوومه‌تا باشوور، لێ به‌لێ هه‌وله‌كا ئاشكرا یه‌ ژ بۆ تێكدانا ئه‌زموونا باشوور.

خۆ ده‌وله‌تێن داگیركه‌ر شه‌رم دكه‌ن كارێن قرێژ یێن وه‌ك كارێن په‌كه‌كێ ل دژی كوردستانێ بكه‌ن

په‌كه‌كێ ل گۆر كیژان تێگه‌هی و ل ژێر چ به‌هانه‌یه‌كێ بۆریا په‌ترۆلا كوردستانێ په‌قاند بیت، دكه‌ڤیته‌ د خانه‌یا كارێن قرێژ و گامار دا، ب گۆتنه‌كا دی، نها پێویسته‌ داگیركه‌رێن كوردستانێ میدالییا بێ شه‌ره‌فیێ ژ بۆ ڤێ ده‌ستكه‌فتیێ بده‌ته‌ جه‌میل باییك و موراد كارایلانی، په‌كه‌كه‌ دبێژیت كو وێ ئه‌ڤ بۆریه‌ په‌قاندییه‌ چونكه‌ په‌ترۆلێ ڤه‌دگوهێزیته‌ تركیێ، لێ یا راست ئه‌ڤ بۆرییه‌ ژێده‌را سه‌ره‌كی یا دابینكرنا قووتێ خه‌لكێ نه‌دارێ كوردستانێ یه‌.

هه‌گه‌ر په‌كه‌كه‌ شاندنا په‌ترۆلێ بۆ تركیێ ب جینایه‌ت دبینیت، پرس ل ڤێرێ ئه‌وه‌:

  • ئه‌رێ په‌كه‌كێ و گرۆپا ئه‌نقه‌رێ، یه‌كه‌م گۆتنێن سه‌رۆكێ خۆ ئاپۆی ژبیر كرن ده‌ما كو تركیێ ده‌سته‌سه‌ر كری؟، ئه‌مێ بیرا هه‌وه‌ لێ بینین، ما قه‌ی ئاپۆ هێژا د باله‌فرێ دا و به‌را كو چ زه‌خته‌ك لێ بهێته‌ كرن، نه‌گۆت: «بهێلن ئه‌ز خزمه‌تا ده‌وله‌تا تركیێ بكه‌م».

  • ما قه‌ی رێڤه‌به‌رییا قه‌ندیلێ یه‌كه‌م گۆتنا ئاپۆی د دادگه‌هێ ڤه‌ ژبیر كر؟، ما ئاپێ وان نه‌گۆتبوو: «دایكا من ژی تركه‌، ئه‌ز ژ بۆ خزمه‌تا ده‌وله‌تێ ئاماده‌مه‌».

  • ما ئۆجالان داخوازا لێبۆرینێ ژ دایكێن كوشتیێن عه‌سكه‌رێن ترك ل دادگه‌هێ نه‌كر؟، ما ئه‌ڤ نه‌ بێ رێزی بوو ب خوینا هزاره‌هان جوانێن كورد یێن به‌را گرتنا «كوڕێ وێ دایكا ترك» دگه‌ل په‌كه‌كێ جانێ خوه‌ فیدایی عه‌شقا كوردستانێ كرین؟.

  • هه‌گه‌ر په‌كه‌كه‌ بێژیت، مه‌ بۆریا كوردستانێ په‌قاند داكو زیان بگه‌هیته‌ تركیێ، ژخۆ تركیێ گه‌له‌ك بۆریێن دی یێن ڤه‌گوهاستنا په‌ترۆلێ هه‌نه‌ و د ئاخا باكور را ده‌رباس دبن، چما په‌كه‌كێ هێرشی وان نه‌كر؟

  • هه‌روه‌ها په‌كه‌كه‌ گه‌ر بخوازیت زیانێ بگه‌هینیته‌ ئابۆرییا تركیێ، چما هێرشی باژار و جهێن گه‌شتوگوزارێ یێن تركیێ ناكه‌ت؟، ما قه‌ی وێ ژبیر كر د شه‌رێ خه‌نده‌كان دا ل سالا 2015ێ چ گۆتبوو، ما نه‌گۆتبوو: «ئه‌مێ شه‌ری ڤه‌گوهێزین باژارێن تركیێ.

 لێ به‌لێ په‌كه‌كێ ب زانه‌بوون ئه‌ڤ كریارا خۆ یا ته‌رۆریستی ئه‌نجام دا چونكه‌ وێ باش دزانی بۆریا په‌ترۆلا كوردستانێ ب واتایا هێزا ئابووریا باشوورێ كوردستانێ دهێت، په‌كه‌كێ ب ڤێ كریارا ته‌رۆریستی خزمه‌ته‌كا مه‌زن ژ بۆ ده‌وله‌تێن داگیركه‌ر كر، ژ به‌ركو خۆ ده‌وله‌تێن داگیركه‌ر شه‌رم ژ خۆ دكرن كو كاره‌كێ وه‌ها قرێژ بكه‌ن.

په‌كه‌كه‌ باش دزانیت بارزانی «براكوژی» حه‌رام كرییه‌، هه‌گه‌ر نه‌ باییك و كارایلان وێره‌كییا وان زماندرێژییان نینه‌

په‌كه‌كه‌ كو هه‌ر تشتی ته‌نێ ژ بۆ به‌رژه‌وه‌ندییا رێخستنا خوه‌ دكه‌ت، ل ڤان رۆژێن داویێ ب چه‌ندین كارێن ئیستفزازی دخوازیت شه‌رێ براكوژیێ ل باشوور كوردستانێ بده‌ته‌ ده‌ست پێ كرن، شه‌هید كرنا غازی ئالیخان، ده‌ركه‌تنێن ئیستفزازی یێن جه‌میل باییك و زمان درێژیێن رۆژانه‌ یێن موراد كارایلان د مه‌دیایێ دا به‌لگه‌یێن حاشاهه‌لنه‌گرن ژ بۆ خواسته‌یا په‌كه‌كێ یا رویدانا ڤی شه‌ری، په‌كه‌كه‌ دخوازیت ره‌وشه‌ك وه‌ها چێبكه‌ت كو خه‌ته‌ره‌ك ل سه‌ر باشوور هه‌یه‌، لێ به‌لێ ئه‌ڤ خه‌ته‌ر هه‌ر ل سایا سه‌رێ وێ چێبوویه‌.

په‌كه‌كه‌ باش دزانیت، «مه‌سعوود بارزانی» شه‌رێ براكوژیێ حه‌رام كرییه‌، هه‌گه‌ر نه‌ ئه‌و وێره‌كی نینه خۆ گه‌فان ژی ل باشوورێ كوردستانێ بكه‌ت، كارێن وێ یێن ترسنۆك به‌لگه‌نه‌ ژ بۆ ڤێ ئاخفتنا مه‌، ئه‌گه‌ر نه‌ په‌كه‌كه‌ دزانیت گه‌ر ڤی شه‌ری ده‌ستپێكر، پێشمه‌رگه‌ دێ چ فه‌رمانه‌كێ ب سه‌رێ وێ و چه‌كدارێن وێ ئینیت.

هێرش كرنا سه‌ر بۆریا په‌ترۆلا كوردستانێ خه‌ونه‌ك بوو ده‌وله‌تێن داگیركه‌ر ب تایبه‌ت ئیراقێ دخوه‌ست بكه‌ت، لێ به‌لێ په‌كه‌كێ ئه‌ڤ خه‌ونا وان بۆ بجهئینا، له‌وما ئێدی هه‌ر تاكه‌كێ باشوور ئه‌گه‌ر دۆستێ په‌كه‌كێ بیت، ئه‌و دێ وه‌كه‌ دوژمنێ هه‌موو كوردێن ڤێ پارچه‌یا كوردستانێ و ئه‌زموونا وێ هێته‌ هه‌ژمارتن.