دوژمنێن گەلێ کورد د رابووری دا و د نها دا بەردەوام هەول ددەن ناکۆکییێ دناڤبەرا کوردان دا دروست بکەن و کوردان ب دەستێن کوردان بدەنە کوشتن، ئەڤە بوویەرەکا نوو نینە بەلکو ب درێژاهییا دیرۆکێ هەبوویە و بەردەوام بوویە. دوژمن دخوازن براتی و یەکیتییا کوردان تێک بدەن، وان هەردەم کار ل سەر ڤێ چەندێ کرییە و جیهێ داخێ یە کو هندەک جاران ژی د ڤێ خواستەکا خوە دا سەرکەفتن ئیانییە، لێ بەلێ یا جیهێ دلخوەشیێ ژ دەما کو مەسعوود بارزانی، سەرۆکێ پارتیا دیمۆکراتا کوردستانێ شەرێ براکوژی حەرام کری، هەرچەند کو گەلەک جاران ئالۆزی ژی دروست بوون لێ بەلێ ب چ رەنگا شەر نەقەومی و بارزانی ب خوە رێگرێ سەرەکی بوو ژ روونەدانا شەری، دبیت بوویەرێن 16 ئۆکتۆبەرا 2017ان باشترین میناک بن، دەما کو هندەک کالفامێن د ناڤا ئێکەتیا نیشتیمانی یا کوردستانێ دا خیانەت کری و کەرکووکا دلێ کوردستانێ رادەستی دوژمنێن گەلێ کورد کری و پشت را خواستی شەرەکێ براکوژی یێ مەزن دروست بکەن، لێ ژیری، هوشیاری، کوردایەتی، نەتەوایەتی و رێبەراتییا مەسعوود بارزانی رێ ب ڤێ چيندێ نەدا و رێگری کر.
پشتی کو بارزانی شەرێ کوردان ل دژی کوردان حەرام کری پارتیێن سیاسی یێن کو دخواست ڤێ چەندێ ژ بۆ بەرژەوەندیێن خوە یێن حیزبی بکاربینن و مفای ژ ڤێ ئاخافتنا بارزانی وەرگرن کێم نەبوون، وان گەلەک جاران خواست ل سەر ڤێ ئەساسێ ئالۆزی و پەڤچوونان دروست بکەن ژبەرکو باش دزانی بارزانی ئەو کەس نینە کو ژ ئاخافتنا خوە پاشگەز ببیت. ژ بەر ڤێ چەندێ دەست ب پلانێن خوە و کارێن ئیستیفزازی و دروستکرنا رەوشا فەوزاوی کرن، پارتیا پێتر ژ هەر پارتیەکا دی ئەڤ کارە کری پەکەکە بوو.
هەر کەس دزانیت پشتی کو بارزانی شەرێ براکوژی حەرام کری، پەکەکێ پێترترین کارێن ئیستیفزازی ل دژی حکوومەتا هەرێما کوردستانێ و پارتییا دیمۆکراتا کوردستانێ ئەنجام دایینە، ژ بێرێزیکرن ب پیرۆزیێن ڤێ پارتیێ هەیا دگەهە دەست دانینە سەر گوند و باژارۆکێن هەرێمێ و رێگریکرن ل پێشمەرگەیێن کوردستانێ و شەرێ مەدیایی ل دژی سازیێن حکوومی یێن هەرێما کوردستانێ.
دیارە پارتیێن سیاسی یێن وەکو پەکەکێ ب شاشێ د ئاخافتنا بارزانی یا حەرامکرنا شەرێ برا کوژی گەهشتینە
پاش کو پەکەکێ هەر تشت تاقی کری و شەر روو نەدای، دەست ب کارێن گەلەک قرێژی کرن، جار ب کوشتنا سەرکۆنسۆلێ ترکیێ ل هەولێڕێ، جار ب رێگریکرن ل پێشمەرگەیێن کوردستانێ ل زینێ وەرتێ، پاشان ئالۆزکرنا رەوشا شنگالێ و دژاتیکرنا رێکەفتنا حکوومەتا هەرێمێ دگەل حکوومەتا ئیراقێ، جار ژی ب شەرێ میدیایی ل دژی حکوومەتا هەرێما کوردستانێ و تەقەکرن ل پێشمەرگەیان ل دینارتێ حەتا کو گەهشتی کوشتنا غازی سالح ئالیخان یێ بەرپرسێ ئاساییشا دەریێ سینۆری یێ سەر زێرێ و تەقاندنا بۆریا نەفتا هەرێما کوردستانێ، پەکەکێ خوە ل هیچ کارەکێ نەدا پاش لێ دیسا شەر نەقەومی، خوە ب داخوەیانیێن دوژمنانە و دور ژ ئەقلی یێن رایەدارێن پەکەکێ یێن وەکو “موراد قەرەیلان، جەمیل بایک، مستەفا قاراسو و بەسێ هوزاتا گەنی” کو شەرێ دژی باشوورێ کوردستانێ ب شەرێ کوردان نەدا زانین و راگەهاندی پێشمەرگە نە برایێن پەکەکێ نە!
پەکەکێ خوە رەحم ب خەلکێ وان گوندان ژی نەکر یێن کو ل جیهێن خوە مای، ئەو ب زۆری ناچار کرن باجێ بدەنە پەکەکێ!
دیارە پارتیێن سیاسی یێن وەکو پەکەکێ ب شاشێ د ئاخافتنا بارزانی یا حەرامکرنا شەرێ برا کوژی گەهشتینە، گەر نە ب چ رەنگا کارێن هندە ئیستیفزازی ل دژی هەرێما باشوورێ کوردستانێ ئەنجام نەددان، پەکەکێ ئاخافتنا بارزانی ژ بۆ خوە دەلیڤە دیت و بوو مەترسییەکا مەزن ل سەر ئەولەهی و سازیێن قانوونی یێن هەرێما کوردستانێ، پەکەکە ل ژێر سێبەرا ڤێ ئاخافتنا بارزانی بوو سەدەما تێکدانا ئاساییش و ئارامیا گوند و باژارێن کوردستانێ و وەلاتیێن باشوور ناچارکرن گوند و وارێن خوە بجیهـ بهێلن، ب ڤێ یەکێ هەم خەلک ئاوارە کر هەم ژی بۆ سەدەمەک ژ بۆ دروست بوونا بێکاریێ ل جەم گەنجێن باشوور، د ڤێ چەندێ دا ژی پەکەکە سوودمەندا سەرەکە بوو ژبەرکو پەکەکە بۆ پرا دەرباسبوونا ڤان جوانان ژ بۆ ئەورۆپایێ و ب ڤێ چەندێ ئەڤ گەنجە هەم وەکو مژارەک میدیایی ل دژی حکوومەتا باشوورێ کوردستانێ بکار ئانین هەم ژی ب وەرگرتنا پارەیان ژ بۆ دەرباسکرنا وان ب قاچاغی ژ بۆ ترکیێ و ل وێرێ بەر ب ئەورۆپایێ سوود وەرگرت، پەکەکێ خوە رەحم ب خەلکێ وان گوندان ژی نەکر یێن کو ل جیهێن خوە مای، ئەو ب زۆری ناچار کرن باجێ بدەنە پەکەکێ!
بەردەوام بوونا کارێن پەکەکێ یێن قرێژ ل دژی هەرێما کوردستانێ بوو سەدەم کو بارزانی ل رۆژا دوشەمی 2/11/2020ان دا داخویانیەکا نڤیسکی بەلاڤ بکەت و ب ئاشکەرا ژ وان و هەر هێزەکا سیاسی یا دی را ببێژیت نابیت کەس ب شاشی ڤێ ئاخافتنا مە شرۆڤە بکەت و ببیتە سەدەما مەترسییێ ل سەر سازیێن فەرمی یێن هەرێما کوردستانێ، ئەڤە ژی هوشیاریەک ئاشکەرا یە کو ل ڤێرە پێڤە رێ ب هیچ کەس و لایەنەکێ ناهێتە دایین ببنە مەترسی ل سەر ستاتۆیا هەرێما کوردستانێ، ب تایبەتی ئەو لایەنێن سیاسی یێن ل سەر خێر و بێرێن باشوور و گەلێ وێ دژین و خوە ب برایێن وان نزانن.
گەنجێن باشوور روویێ وە یێ راست و بێ ماسک ژ مێژە یە ناس کری
پەکەکە پێویستە حەدێ خوە بزانیت و ل ڤێرە بسەکنیت، ئەم دبێژینە پەکەکێ، هوون نە ئەو هێزن کو بکارن پیلانێن خوە یێن قرێژی ل دژی هەرێما باشوورێ کوردستانێ ب تەمامی جێبەجێ بکەن، ل جیهێ خوە راوەستن و ئێدی بەسە، ئەم دبێژین “کەسێ کو شەرێ براکوژی حەرام کری، دکاریت جارەکا دی ڤی شەری حەلال بکەت، ب تایبەتی د دەمەکێ دا کو هوون ب خوە، خوە ب برایێن باشوور نزانن و دبێژن “گەریلا و پێشمەرگە نە خوشک و برایێن یەکن، گەر شەر روو بدەت دێ دوماهیا وە و پلانێن وە بیت. هوون گەلەک شاشن گەر دلێ خوە ب گەنجێن باشوور خوەش بکەن کو هاریکارییا وە بکەن، گەنجێن باشوور روویێ وە یێ راست و بێ ماسک ژ مێژە یە ناس کری.
یا راست تشتا کو پەکەکێ ب کوردستانێ ڤە گرێ ددەت د نها دا ب تەنێ جلکێن گەریلایان و مەژیکێ بەرپرسێن ڤێ پارتیێ یە، لێ بەلێ نە مەژیکێ کوردی، بەلکو مەژیکێ وان وەکو کەڤرن کوردستانێ رەقە!
