گوهۆرینێن پهكهكێ و پرسیار ل سهر (خوینێ و ناسنامەیێ و بەرپرسیاریێ)
بهشێ دووێ: کى خودانێ واتا خوینێ یە؟
ژ مێرخاسیێ بۆ نێرینا بەرپرسیارییا سەرکردایەتیێ
شكهستنا بزاڤەکێ د شەرەکی دا یان گۆهۆرینا ستراتیجییا وێ نە دلگرانییهكا مەزنە، چونکی دیرۆک چ جار رێکەکا راست و بساناهى نادەتە گەلان دا بگەهنە ئازادیێ.
دلگرانییا ههره مهزن ئەوە کو واتا قوربانیدانـێ پشتی رویدانا وان بهێتە گۆهۆرین و ژ قوربانیدهرا بهێتە خواستن کو پێشوەخت ئارمانجەکا جودا قەبوول بکهن ژ وێ ئەوا وان ژ بۆ گیانێ خۆ دایی.
د کۆمبوونێ دا دگەل سەرکردایەتییا قەندیل، عەبدوللا ئۆجالان یەک ژ گرنگرتین بهرپهرێن ههستیار د دیرۆکا پهكهكێ دا ڤەدکەت.
ئەو رەخنێ ل شێوازێ دەستپێکرنا 15ی تەباخێ دگریت، کارێن دژى سڤیلان شەرمەزار دکەت و بەحسێ نەبوونا ستراتیجییەکا سەربازی یا دروست دكهت و خەلەتهەلسەنگاندنا بەرسڤا دەولەتێ و دوبارەبوونا زیانان بێی دەستکەفتێن سیاسی دکەت. هەر وەسا سالا 1993ێ وەک دەرفەتەکا دیرۆکی یا ژدهستداى دبینیت و رەخنێ ل بکارئینانا چەمکێن مێرخاسی جانگوریبوونێ دگریت ژ بۆ ڤەشارتنا خەلەتیێن سەرکردایەتیێ (بۆ زانین ب سهدان گرته ڤیدویێن ئۆجالانى ههنه كو ئهڤ ئیدیهمێن ئهو بهحس دكهت و ب سهدان ئیدیهمێن دى ژ چێكرنا وى بخۆ بوون) .
گرنگییا ڤێ ئاخڤتنێ د هندێ دایه کو ژ دامەزرێنەر و سەرۆکێ پارتیێ ب خۆ دهركهتیه، نە ژ دژمنەکێ دەرەکی. لێ نابیت ئەڤ ئاخڤتنە بتنێ وەک رەخنەیەک بهێتە دیتن بەرەڤ دووران كالكان یان فەرماندەیێن مەیدانی بتنێ بهیته چهسپاندن! ئەگەر شەرى رێکا خۆ گوهۆریبیت، رهخنه نە بتنێ ل سەر کەسێ جێبەجێکارە بەلکو ل سەر وێ ئایدۆلۆژی و پێکهاتهیا سەرکردایەتیێ یە ئەوا ئەو كادر ل سەر پەروەردە کرین و رەوایەتی داییێ.
پارتیا پهكهكێ ل دۆر سەنتەرییا ئۆجالانی هاتبوو ئاڤاکرن وەک خودانێ تیۆر، ستراتیجی و بریارا دیرۆکی. سەرکەفتن بۆ دیتنا وی دهاتنە پالدان، هەلوەست ب پێگیرییا ب رێبازا وی دهاتنە پێڤان، و وێنەیێ وی سەنتەرێ ژیانا رێکخستنێ و فکری داگیر کربوو. لهوما چێنابیت دەمێ بەحسێ دەستکەفتان بهێتە کرن سەرکردایەتی یا وی بت، و دەمێ دەمێ لێپرسینێ دهێت خەلەتی بکەڤنە سەر ملێن قەندیل!
ئۆجالان دبێژیت کو گەلەک ژ کریارێن چەکداری دەرڤەی حەزا وی رووداینە، و زێدە دکەت کو ئەڤە ب تەمامی وی ژ بەرپرسیاریێ پاقژ ناکەت. بەلێ دانپێدانەکا نیڤەک بەرسڤا پرسیارا سەرەکی نادەت: چاوا بزاڤەکا زۆر سەنتەری، کو رەوایەتیا وێ ل سەر گۆهداریکرنا ئێک سەرکردە راوەستیا بیت، شیا شەرەکێ دههان سالان ب رێڤە ببهت ب شێوازەکێ کو ئهڤرۆ سەرکردە ب خۆ دبێژیت ئەڤە نە شێوازێ وی بوو؟
ل ڤێرێ ئەم بەحسێ خەلەتییەکا سەربازی یا تاکەکەسی ناکەین، بەلکو بەحسێ سیستەمەکێ تەمام دکەین ئەوا مێرخاسی چێکری بەری سیاسەتێ چێکەت. مرن د هندەک قۆناغێن ڤێ ئەزموونێ دا ببوو بەلگێ راستگۆیا شەرڤانی، د دەمەکێ دا پرسیارکرن ل سەر ئەنجامان وەک لاوازی یان پاشەکشە دهاتە ههژمارتن. دەمێ شەهیدینی ژ قوربانیدانەکا نەچارى د رێکا ئازادیێ دا بگۆهۆرێت بۆ پێڤەرەکێ بەردەوام ژبۆ رەوایەتیێ، سەرکردایەتی دشێت ب مێرخاسییا جحێلێن خۆ بێتواناییا خۆ یا سیاسی ڤەشێریت.
بەلێ شۆرەشگێرێ راستەقینە، وەکی ئۆجالان د پرۆتۆکۆلێ دا دبێژیت، راستگۆیا خەباتێ ب هژمارا کوشتییان ناپیڤیت، بەلکو ب شیانا وێ ل سەر پاراستنا جڤاکی و دەستڤەئینانا دەستکەفتان دپیڤیت. ئەگەر ئەڤ پێڤەرە ئیرۆ راست بت، دڤێت ل سەر هەمی دیرۆکا بزاڤێ بهێتە بکارئینان: هەر قۆناغەکێ چ ب دەستڤە ئینایە؟ جڤاکی چ زیان کری؟ و کێ بریارا بەردەوامکرنێ دا دەمێ تێچوونا شەری ژ ئەنجامێن وێ مەزنتر بوی؟
ئەڤە وێ واتایێ نادەت کو خوینا شەرڤانان ب بێواتا چوویە؛ بەرخۆدانا وان هاریکار بوو د شکاندنا ئینکارکرنێ دا و سەلماند کو گەلێ کورد ناهێتە سرین. بەلێ دانپێدان ب چاڤنەترسییا شەرڤانی بەهانهیا پاقژکرنا سەرکردایەتیێ نینە، و رێزگرتن ژ شەهیدان ژی ئانکو پیرۆزکرنا هەر بریار و ستراتیجیەکێ نینە. چونکی دبیت شەرڤان د قوربانیدانا خۆ دا یێ راستگۆ بیت، د دەمەکێ دا سەرکردایەتی د هەژمارێن خۆ دا یا خەلەت بت.
تشتێ زۆر ب ئێش ئەوە کو ئەرێ ئەو کەسێن ژبۆ ئارمانجا ئازادکرنا کوردستانێ کەفتینە سەر چیا، ئهڤرۆ چاوا دێ ژ بیرهاتنا وان هەمیێ هێتە خواستن کو خۆ بگونجینن دگەل پرۆژەیێ «تێکەلبوونا دیمۆکراتی» د ناڤ کۆمارا تورکیا دا؟ دەربازبوون بۆ ئاشتیێ ماف و پێدڤییەکە دەمێ شەر نەشێت جڤاکی بپارێزیت، بەلێ سەرنوو پێناسەکرنا ئارمانجا کەڤن بابەتەکێ دی یە. سەرکردە خودانێ وێ مافێ نینە شەرڤانان د قۆناغەکێ دا بکەتە شەهیدێن سەربەخۆیێ، و پاشان د قۆناغەکا دی دا بکەتە شەهیدێن تێکەلبوونێ!
ئاشتی سڤکاتیێ ب خوینا قوربانییان ناکەت، بەلکۆ دبیت ژ ئاقلترێن شێوازێن وەفاداریێ بیت ژ بۆ وان، ب مەرجەکێ نەبیتە پەردەیەک کو سەرکردایەتیێ ژ لێپرسینێ ببەخشیت. ئەوا پێدڤی، نە زێدەکرنا مرنا نوو یە بۆ سەر یا بەری نوکە، بەلکو رزگارکرنا بیرهاتنێ یە ژ قۆرخکاریێ: دانپێدان ب خەلەتیان، دیارکرنا بەرپرسیاریان، و رۆنکرنا ئەگەرێن ڤێ گۆرینێ بۆ گەلێ کورد.
خوینا کوردان نە مولکێ چ پارتیانە، و واتا وێ ژی نە یا چ سەرکردەیانە. ئەڤە ئەمانەتەکا نەتەوەیی یە؛ ناهێتە بکارئینان ژ بۆ پیرۆزکرنا شەری، و نە ژی ژبۆ بەخشینا پیرۆزیێ بۆ رێککەفتنێ. دەمێ سەرکردایەتی سەرنوو د دیرۆکا خۆ دا دزڤریت، تێرا ناکەت بتنێ پرسیارێ ژ شەرڤانان بکەت کا بۆچی مرن؛ بەلکو بەری هەمی تشتان دڤێت بەرسڤێ بدهەت: بۆچی مە ئەو هنارتنە د ناڤ مرنێ دا، و مە چ ب دەستڤە ئینا بۆ نەتەوا خۆ ژ قوربانیدانێن وان؟
