ناسنامه نه ناڤهكێ ڕویته مرۆڤ ل سهر ناسنامهیا خۆ بنڤێسیت، نه ژی كۆمهكا پهیڤانه ههردهمێ هێز كهفته دهستێ ئێكێ دی ئهم ژێوهرگرین و گوهۆڕین.
ناسنامه بیرهاتنا كۆمهكێ یه يا جڤاكهكێ یه، جهێ مرۆڤی د ناڤ دیرۆكێ دا دیار دكهت و بوونا وى ب چارهنڤیسهكێ بهرفرههتر ڤه گرێددهت. ژ بهر هندێ مهزنترین کارهسات كو بگههیته سهرێ نهتهوهیهكێ نه داگیركرنا ئاخا وێ یه، بهلكو قهناعهتپێكرنا كۆڕ و كچێن وێ یه كو ڕزگاربوونا وان د جهێ هێلانا وێ ئاخێ دا یه.
پشتی مه چیروكا شرۆڤهركرنا ڕزگاركهر و پشتگوێكهرى بهرچاڤكرى و لێكدانهڤا ب كارهێنانا برینا ئێزدییان بۆ چێكرنا كهسایهتیهكا سیاسی يا جودا، پرسیارا بنهرهتى يا واتهیێ ددهته ڤێ زنجیرێ ئهڤه یه: ئهم چهوا دێ ئێزدییان پارێزین ب بێی كو تایبهتمهندییا وان د ناڤ ههمیێ دا ببهین و چهوا دێ كوردینییا وان پارێزین ب بێی كو ببیته وهسایهتهكا حزبی؟
ئێزدیاتی نه ڕهخهكێ ئۆلى یه د ناڤ جڤاكێ كوردى دا، بهلكو ئێك ژ چینێن وێ یێن كویر یێن ڕوحی و دیرۆكی یه. دانپێدانا كوردبوونا ئێزدییان ببڕیارهكا حزبی يا سهرپێكی نهبوو، بهلكو دیتنا ههرچی دیرۆكناس، بیرمهند و سیاستمهدارێن كورد بوو كو ئێزدی ئهو جڤاكن ئهوێن كهلهپوور، زمان و بیرهاتنا زهنگینا ڕوحی یا كوردى ل سهر ڕههێن وێ یێن كهڤنار پاراستین.
ئێزدییان ل بهر فهرمانان و ههلمهتێن تهكفیرێ خۆ ڕاگرت، چونكی وان دهست ب سێینهیا بوونا خۆ ڤه گرتبوو: عهقیده، ئاخ و قوولاتییا نهتهوهیی. وان ئۆلا خۆ د ناڤ ژینگهها خۆ يا كوردى دا پاراست و ل ههمبهر هندێ بوونا وان زهنگینیهكا ڕوحی دا نهتهوهیا كوردى. چ لایهن ل سهر بارێ لایهنێ دی نهبوو، بهلكو مانهڤا وان پهیوهندییهكا پاراستنا دولایهنی بوو د ناڤبهرا چهقى و دارێ دا.
برینا ئێزدییان ژ قوولاتییا وان يا كوردى نه بهخشینا ناسنامهیهكا نوو یه، بهلكو ڕویتكرنا وانه ژ مۆرا وان يا پاراستنا دیرۆكی. سهربهخۆییا كو كۆمهڵهیهكێ ژ پشت و پهناها وێ ببڕیت دبیته گۆشهگیری و گۆشهگیری ژی د ژینگهههكا ئاڵۆز دا نه ئازادی یه بهلكو ناڤهكێ جوانه بۆ بێپشتوانی و بێهێزیێ.
مهترسیا گوتارێن موراد ئیسماعیل نه د شانازیكرنا وى دا یه ب ئێزدیاتیێ چونكی ئهڤه مافهكێ ڕهسهنه، بهلكو مهترسی د ڤهگوهاستنا جوداهییا ئۆلی دا یه ژ بازنهیێ تایبهتمهندیێ بۆ بازنهیێ ڤهقهتاندنا نهتهوهیی و پاشان چێكرنا نوێنهرایهتیهكا سیاسی، جوگرافیا خهیالی و مهرجهعیهتهكا كو كێشێ ل سهر كوردستانیبوونا شنگالێ دروست دكهت.
ههر ناسنامهیهكا سیاسی يا نوو ل ئاخهكێ دگهڕیت دا حوكمی ل سهر بكهت و دهستههڵاتهكێ دا ب ناڤێ وێ بئاخڤیت و سنۆرهكێ دهروونی دا وێ ژ یێن دی جودا بكهت.
دێمێ كۆترێ كارێ مرۆڤایهتی بوو و ڕیڤی دهستبهركرنا چێرۆكا ڕزگاربوونێ بوو و پیاده ب كارهێنانا ناسنامهیێ بوو و گۆڕگ ئهو پروژه بوو ئهوێ ڤیای ئاخێ ژ جهوهرێ وێ جودا بكهت.
بهلێ بڕیار و بڕیاردان نه ب گۆڕگهكێ دی یه، بهلكو ب هۆشیاریهكا نهتهوهیی يا دیمۆكراتی یه كو دانپێدانێ ب شاشیێ بكهت، جوداهیێ بپارێزیت و متمانهیێ ئاڤا بكهتهڤه.
ئهو كوردستانا جهێ ئێزدییان تێدا نهبیت، ژ لایێ ئهخلاقی و دیرۆكی ڤه يا كێمه و ئهو ئێزدیاتییا دهێته ب كارهێنان بۆ ئینكاركرنا كوردینیێ، ب هۆشیارى ئان ب بێ هۆشیارى، دبیته ئامرازهك بۆ ڕاكرنا ئێك ژ ڕههێن كوردستانێ.
