میرزا ئالتوون: ب تەنێ سیاسەتێن بارزانی د بەرژەوەندیا گەلێ کورد دا نە

میرزا ئالتوون: ب تەنێ سیاسەتێن بارزانی د بەرژەوەندیا گەلێ کورد دا نە

ئیرۆ رۆژا پێنجشەمبی 5/11/2020ێ بەرپرسێ رێخستنێن دووسلدوورف ئێ پارتیا دەمۆکراتا کوردستانێ “سەگڤان سالح” سەرەدانا ئاکادمییا بهێزکرنا وانەیێن ئابووری، جڤاکی، ماتماتیک و ئەلمانی ل دیسبۆرکێ کر و ژ لایێ “لووتی گۆڤەرجن” رێڤەبەرێ ئاکادمیێ و “میرزا ئالتوون”، “سراج ئۆتس” و “سەڤگی ئیسک” ڤە کو هەر هەموو کوردێن باکورێ کوردستانێ نە و پێش نها د ناڤا رێزێن پەکەکێ دە ئەندام بوون، هات پێشوازیکرن.

د ڤێ هەڤدیتنێ دە هەر دو ئالیان باس ل پاراستنا دەستکەفتیێن نەتەوی یێن هەرێما باشوورێ کوردستانێ کر و تەکەز کرن پێدڤییە ریز ل سەروەریا خاکا هەرێما باشوورێ کوردستانێ بهێتە گرتن و رێ ل پیلانگێریێن دوژمنان دەرحەق ڤێ پارچەیا ئازادا کوردستانێ بهێتە گرتن.

هەر یەک ژ لووتی گۆڤەرجن، میرزا ئالتوون، سراج ئۆتس، سەڤگی ئیسک د روونشتنێ دا دیار کرن کو ب تەنێ تەڤگەرییان ل سەر رێیا جەنەرال مستەفا بارزانی و سیاسەتێن نەتەوی یێن مەسعوود بارزانی وێ خزمەتا دۆزا رەوا یا کوردان بکە، هەر وەها راگهاند کو پێویستە کورد ب تەڤاهی ل باشوورێ کوردستانێ خوەدی دەرکەڤن و وێ ژ پیلانێن دوژمنان بپارێزن.

پشتی ئاشکەرا بوونا روویێ راست ئێ پەکەکێ ل جەم هەموو کوردان ب تایبەتی کوردێن ل ئەورۆپایێ دژین، ئێدی هێدی هێدی ریزێن پەکەکێ بجی دهێلن و د ناڤا پارتیێن نەتەوی یێن وەکو پەدەکێ دەست ب خەباتا خوە ژ بۆ رزگارییا کوردستانێ دکەن، ژبەرکو ژ بۆ وان ئاشکەرا بوویە کو پەکەکە نە ئەو هێزە کو کار ژ بۆ ئازادییا کوردستانێ بکەت، ب تایبەت پشتی دەستەسەرکرنا ئۆجەلان، رێبەرێ ڤێ پارتیێ.