یێن  دژی کوردستانێ ھەموو ئێرشی بارزانی دکەن

یێن  دژی کوردستانێ ھەموو ئێرشی بارزانی دکەن

 ئەو داخویانییا مەسعوود بارزانی  د 2/11/2020ێ بۆ رایا گشتییا کوردستانێ بەلاڤکری خوەدان گرنگیەک دیرۆکی بوو. د ڤێ پەیامێ دا، بارزانی گۆت “من شەرێ ناڤبەرا کوردان حەرام کر، لێ پێویستە ھەلوەستا من نەهێتە خراب کرن.” پەیڤێن بارزانی ب هشیاری ھاتبوونە ھەلبژارتن. وی ئارمانج و پلانا پەکەکێ یا دەست ب سەرداگرتنا ئەردێن نوو رەخنە کر، لێ دیسا ژی دیار کر کو ئەو ل دژی شەرەکی ناڤخۆ یە. داخویانیا بارزانی گۆتنا ھەری مەعقوول و ئاڤاکەر بوو کو مە د ڤان مەھێن داویێ دا د ئالۆزیا ناڤبەرا کوردان دا بھیستیە.

لێ پشتی داخویانیا بارزانی، شەرێ مەدیایی یێ کو پەکەکێ د بھارێ دا ل دژی حکوومەتا ھەرێما کوردستانێ دایە دەستپێکرن هێشتا دژوارتر بوو. ژ رێڤەبەرێن پەکەکێ جەمیل بایک بگرە حەتا نووچەگەھانێن پەکەکێ ھەر کەسی ئیدیعا کر کو بارزانی بانگا شەرێ ناڤخۆ  دکەت. د ھەمان دەم دا وان ئێریشی ھێزێن پێشمەرگە یێن ل ناڤچەیا چەمانکێ کرن. پەکەکێ ب ڤی رەنگی، خوەست ب بێژن بارزانی  بانگا شەری کر و پێشمەرگە ئێریشی مە کرن. پەکەکێ نەخشەیا سەناریۆیێ ل سەر چاپەمەنییا خوە تەمام کر.

لێ بەلێ ، بارزانی چ گۆتبا ژی، دا پەکەکە ڤان ئێریشان کەت. ژ بەر کو پەکەکێ ب داخویانییا کۆنسەیا رێڤەبرا کەجەکێ کو د 25ێ تەباخێ دا ھاتیە وەشاندن بریارا شەرێ خوە راگەھاندبوو.

ھەر کەسێ کو دوژمناتیا کوردستانێ دکەت ئێریشی بارزانی دکەت

گەلەک ھێز ھەنە کو ژ ھەبوونا حکوومەتا ھەرێما کوردستانێ  عاجزن. ڤان هێزان ژ مێژە یە پرۆژەیەک هەیە کو ئێرشی حکوومەتا ھەرێما کوردستانێ بکەن و دخوازن وێ ھەلوەشینن. پەکەکە ژی د ڤێ پرۆژەیێ دایە. ب گۆتنەکا دی، پەکەکە ئەندامەکی ڤێ میحوەرێ یە کو دخوازیت حکوومەتا ھەرێما کوردستانێ ھەلوەشینیت.

پەکەکە ب راستی دژایەتیا خوەیا کوردستانێ د بن ناڤێ دژایەتی یا پارتی دا ڤەدشێریت. لێ سەدەمەک ھەیە کو ئەو دوژمناھیا پارتی ژی بکەت. ژ بەر کو پارتی، وەکی حیزب، یەک ژ دامەزرینەرێن سەرەکی یێن دامەزراندنا حکوومەتا ھەرێما کوردستانێ یە. پارتی خوەدان دیرۆکەکا تێکۆشینێ، سیاسەت و دیپلۆماسیێ یا سەدسالا یە. پارتی د سەدسالا بیستێ دا ل چار پارچێن کوردستانێ فکرا ئازادیێ ھەمبێز کر و باندۆرەک مەزن ل سەر بدەستخستنا تێکۆشینەک ھەمدەم یا نەتەوەیی یا کوردستانێ دکەت. بێ گومان، گەلەک حیزب ھەنە، لێ پارتی ژ مهابادێ هێڤە یەکەمین حیزب بوو کو د راستییا کوردا دا ئەرکا خوە برێڤە برنێ ئاڤا کری،  فکر و رامانێن دەولەت بونێ شینکری ئەم دکارین ببێژین وەکو بشکووژا دەسپێکێ بوو ل کوردستانێ. وێ بشکووژێ چیلدا و ئیرۆ بوویە دارەکا مەزن. ھەموو کورد دشێن ل بن سیبەرا وێ دارێ بجڤن. دبیت کو کێماسی یان خەلەتی ھەبن. لێ ئەڤە وێ راستیێ ناگوھەریت کو پارتی ھێزا ھەری بنگەھینە ژ شێخ سەعید، شێخ عوبەیدوڵاھێ نەھری و میراتا سەرھلدێرێن چیایێ ئاگری، قازی موحەمەد و حەتا دگەهیتە سمکۆیێ شکاک… پارتی ئەو دەستکەفت ژ سەدسالا 20ێ دەرباسی سەدسالا 21 کرینە.

پرسگرێکا کوردستانێ دا رۆلا بارزانی یا دیارکەر و ستراتەژیک بوویە سەدەم کو ھەمو دوژمنێن کوردستانێ ھەمان دەم ببن دوژمنێ بارزانی ژی

ب راستی پارتییا دیمۆکراتا کوردستانێ، میراتگرا شێوازێ سییاسەتا بارزانی یە. مەسعوود بارزانی رێبەری یا ڤێ کەڤنەشۆپیا دیرۆکی، یا ڤان 50 سالێن داوییێ دکەت. بارزانی پشتی 1990ێ د بدەستخستنا ستاتۆیا ناڤنەتەوەیی ژ بۆ کوردان رۆلەکێ مەزن گێرا. گەر ل سەر ناڤێ پارچەیەک ئاخێ کو جیھان ئیرۆ ب فەرمی قەبوول دکەت کوردستان ھەبیت، ئەگەر ئالایەک ھەبیت کو د قادا ناڤنەتەوەیی دا وەکی ئالا کوردستانێ ھاتییە پەسەندکرن، د ڤێ دەستکەفتێ دا پشکەکا مەزن یا مەسعوود بارزانی ھەیە. بارزانی  ل جەم ئەمریکی و ئەورۆپییا ھێزا دیپلۆماسی و سیاسی یا کوردانە. ھەولدانا ژناڤبرنا بارزانی دهێتە واتەیا ھەولدانا ژناڤبرنا ھێزا دیپلۆماتیکا کوردان ل جیھانێ.

تێکۆشینا نەتەوییا کوردستانێ یا 50ی سالا، بوو سەدەم کو بارزانی و پرسگرێکا کوردستانێ وەکھەڤ بهێنە دیتن

د پرسگرێکا کوردستانێ دا رۆلا بارزانی یا دیارکەر و ستراتەژیک بوویە سەدەم کو ھەمو دوژمنێن کوردستانێ ھەمان دەم ببن دوژمنێ بارزانی ژی. ب گۆتنەکا دی، ل کو دەرێ دوژمنەکێ کوردستانێ هەبیت، ئەو دەستپێکی ئێریشی مەسعوود بارزانی  دکەت. گەر ھوون ئیرۆ ل چەپێن ترکا بنێرن، ژ راستگرێن وەلاتێ خوە پتر دوژمناھیا بارزانی دکەن. یالچن کوچوک دژمنێ بارزانی بوو، وی دگۆت؛ “ئەگەر ئەز تەنێ بمینن ژی، ئەزێ چەکی ھەلگرم و ل دژی بارزانی شەری بکەم.” ھندەک چەپگەرێن ترک کێفخوەشیەک مەزن نیشان دان دەما کو بارزانی دەست ژ سەرۆکاتیا ھەرێما کوردستانێ بەردای ل سالا 2017 دا. پشتی کو کەرکووک ژ لایێ حەشدا شەعبی ڤە ھات داگرکرن . بۆچی؟

ژ بەر کو تێکۆشینا نەتەوییا کوردستانێ یا 50ی سالا، بوو سەدەم کو بارزانی و پرسگرێکا کوردستانێ وەکھەڤ بهێنە دیتن. کەسێن کو ل دژی نەتەوەبوونا کورد و کوردستانێ دەردکەڤن ب ئاشکەرا دەما کو نەبێژن بلا دەولەتا کوردا نەبیت، بلا کورد خوە ب رێڤە نەبەن،  ژ کوردان را ستاتویا سییاسی نەھێتە دایین، شوونا ڤێ د بێژن ئەم دوژمنێ بارزانی نە. دەما کو پەکەکە ژی نەکاریت بێژیت ئەز ژ ھەبوونا سازیەک وەکوی حکوومەتا ھەرێما کوردستانێ نەرەحەتم و ئەڤ سازی ژ لایێ من ڤە ناهێتە قەبوولکرن، ئەو ڤێ جارێ دبێژیت، ئەز ل دژی بارزانی و پارتی مە.

پرسگرێکا پەکەکێ دگەل ھەمی کوردانە

ب راستی د ھەلوەستا پەکەکێ یا دژی بارزانی دا ئارمانجێن ب ڤی رەنگی ھەنە. دژبەریا پەکەکێ یا ل گەل بارزانی نە ل گۆری بوویەرێن راستینە. دژبەریا پەکەکێ یا ل دژی کوردستانێ خوە وەکی دژایەتیا بارزانی نیشان ددەت. یا راست ئەڤەیە کو کێشەیا پەکەکێ نە دگەل پارتی یە، د راستی دا پەکەکێ کێشە دگەل ھەموو کوردستانییان، گەلێ کورد، دەولەتخواز و نژادپەرەستێن  کورد دا ھەیە.

پەکەکە ژ سالا 1977ێ و هێڤە ل دژی دەھان رێخستنێن کورد د ناڤا پەڤچوونێ دایە. پەکەکێ د چالاکیا کو دامەزراندنا پارتییا خوە رابگەهینیت ئانکو گوللـە یا یەکەم ژی نە بەردایە داگیرکەران، ئەو گوللـە بەردا کوردان. پشترا، پەکەکێ ل دژی DDKD “کۆمەلا کورد یا دەمۆکراتیک یا شۆرەشگێر”، حیزبا Kawa، رێخستنا KUK ئانکو “رزگاریخوازێن نەتەوی یێن کوردستانێ ” دەست ب شەری کر. پەکەکێ ژ دەستپێکا 1980ێ ڤە ل رۆژئاڤا ل دژی رێخستنێن وەکی  “پارتیا دیمۆکرات یا کوردستانێ-سووریێ” PDK-S دەست ب بکارئانینا چەکان کر، و د سالا 1990ێ دا دژوارییا خوە زێدە کر.  پەکەکێ ل دژی رێخستنێن رۆژھەلاتێ کوردستانێ ژی شەر کرییە، د گولانا 2015ێ دا، پەکەکێ 2 پێشمەرگەیێن پارتییا دیمۆکراتا کوردستانێ-ئیرانێ PDK-Î کو دخواستن بچن سینۆرێ رۆژھەلاتێ کوردستانێ  شەھید کرن. پەکەکە رێخستنەکە کو ل چار پارچەیێن کوردستانێ ل دژی کوردان شەر کریە. ئەو رێخستنەکە کو نە تەنێ ل دژی رێخستنان د ھەمان دەمێ دا ل دژی کەسێن کو پەکەکە رەخنە کری ژی شەر کریە و ب بەردەوامی ژی ڤی شەری دکەت.

شەرێ چاپەمەنیێ یێ کو پەکەکە ل زینێ وەرتێ دایە دەستپێکرن ل چەمانکێ ڤەگوھەستە شەرەکێ چەکداری

 پەکەکە حیزبەکە کو د ناڤ حیزبێن کوردان دا، پتر ژ هەموویان ل دژی کوردان شەر کریە. گەر ئەم بێژن کویێ دەمەک ھەری درێژ ل دژی کوردان شەر کری کی بوو، بەرسڤ بێ گوومان پەکەکە یە. گەر ئەم بێژین کیژان حیزب پتر دوژمناتیا حیزبێن کوردستانی دکەت، بەرسڤ دیسا پەکەکە یە. ئەڤە نە پرۆپاگاندایە، ئەڤ چەندە ل گۆری بەلگە و ئاگاھییێن دیرۆکی ھاتییە ئیسبات کرن. ھەر چەند پەکەکە د شەرێ ناڤبەرا کوردان دا بخوازیت رۆلەکێ بێگونەھییێ بگێریت ژی، ھەر کوردێ ئاقلمەند دزانیت کو راستی نە ووسایە.

شەرێ چاپەمەنیێ یێ کو پەکەکە ل زینێ وەرتێ دا دایە دەستپێکرن ل چەمانکێ ڤەگوھەستە شەرەکێ چەکداری. کەسێن کو دخوازن شەر راوەستیت، دڤێت سێ تشتان بزانن. یێ کو ئەڤ شەرە دایە دەسپێکرن پەکەکە یە، سەدەما شەری ئەجیندایێن پەکەکێ یێن ڤەشارتی و قرێژن، ھەولدانا لاوازکرنا حکوومەتا ھەرێما کوردستانێ خیانەتەکا نەتەوەیی یە.