وەزیرێ ناڤخوەیێ حکوومەتا ھەرێما کوردستانێ رێبەر ئەحمەد دیار کر، وان رۆناھیا پێویست ل سەر ناڤچەیێن کوردستانی دانە پەرلەمانێ کوردستانێ و پشتگریا پەرلەمانی ژ بۆ رێکەفتنا شنگالێ وەرگرتنە.
ئیرۆ وەزیرێ ناڤخوە و وەزیرێ ھەرێمێ بۆ کارووبارێن بەغدایێ لگەل کۆمیتەیا ناڤچەیێن کوردستانی یا ل سەر رەوشا ناڤچەیێن کوردستانێ یێن ل دەرڤەیی ئیدارەیا ھەرێما کوردستانێ کۆم بوون.
پشتی کۆمبوونێ ژی د کۆنفەراسەکا رۆژنامەڤانی دا، وەزیرێ ناڤخوە گۆت: “مە د کۆمبوونا خوە یا دگەل کۆمیتەیا ناڤچەیێن کوردستانی رۆناھیا پێویست دایە پەرلەمانی. ئەم ھەردو ئالی ل سەر وێ ھەڤنێرینین کو یەکرێزیا ناڤخوەیی ل سەر پرسێن گرێدایی مادەیا 140 ھەبیت. دڤێت ھەولەکا ھەڤبەش بدین دا کو کۆمیتەیەکا تایبەتی ب مادەیا 140 بهێتە پێک ئانین. مە وەکو حکوومەتا ھەرێما کوردستانێ پلانا خوە ھەیە کو داخوازێ ژ حکوومەتا ئیراقێ بکین، کۆمیتەیا مادەیا 140 دەست ب کار بکەت، دا کو ئەو مادە و برگەیێن وێ ل گۆر دەستووری بهێنە جێبەجێکرن.”
گۆت ژی: “حکوومەتا ھەرێما کوردستانێ دەربارێ پێنگاڤێن ژ بۆ رێکەفتنا ھەولێر و بەغدایێ یا ل سەر شنگالێ، رەوشا کەرکووک و دەڤەرێن دی دا ئاڤێتنە، پشتگریا پەرلەمانی وەرگرت.”
