نەسرەت حاجی
هەڤال، ئەوێ تە کوشتی کوردپەروەر، وەلاتپارێز و دەولەتخواز بوو، ھەڤال ئەوێ تە کوشتی ھەتا دوھی د چەپەرێن دژی تەرۆریستێن داعشێ دا شەرەف و کەرامەتا کوردان دپاراست. ئەوێ تە کوشتی حەتا دوھی د سەنگەرێن بەرخوەدانێ دا ل دژی حەشدا شەعبی، پاسدارێن ئیرانێ کیان و ستاتویا شەرعی یا باشوورێ کوردستانێ دپاراست، لێ مخابن ئیرۆ، ھەڤال، تە ژ پشت ڤە خەنجەرا خیانەتێ ل پشتا وی کوردێ ب غیرەت و ب شەرەف دا و تە خێزان و زارۆکێن وی هێتیم و سێوی د مال دا ھێلان.
ھەڤال، ئەوێ تە کوشتی ل مالا خوە بوو، ل سەر ملک و ئاخا خوە بوو، چ گونەھا وی نەبوو، ب تەنێ کورد و پێشمەرگە بوو، ڤایە ھەڤال تە ئەو کورد و پێشمەرگە د مالا وی دا، ل سەر ملک و وارێ وی دا ب خیانەتێ کوشت.
ھەڤال، ئەوێ تە کوشتی، نەھاتبوو مێردین و دیاربەکر یان وان و جزیرێ، ئەو ژ بۆ کوشتنا برایێن خوە نەھاتبوو باکورێ کوردستانێ، بزانە ھەڤال ئەوێ تە کوشتی نەھاتبوو باکور خوە بکەتە ئەلتەرناتیڤێ تە، ئەو ل باشورێ کوردستانێ بوو ب بریار و یاسایێن حکوومەتا شەرعی یا ھەرێما کوردستانێ دگەریا و دلڤی، لێ بەلێ تە، ھەڤال، ب خەنجەرا خیانەتێ ب خەنجەرا براکوژیێ ئەو یاسا و شەرعیەت کوشتن، بنپێکرن و چ رێز و حورمەت ژێ را نەگرتن.
ئێدی بەسە ھەڤال، حتا ڤێرێ و ئێدی بەسە، ببە خوەدی ئیرادەیا خوە، ڤەگەرە سەر خەتا نەتەوەیی و ببە کوردپەروەر، ببە وەلاتپارێز، نەبە دار و ئالەتێ دەستێ دژمن و دەولەتێن داگیرکەر دا. بەسە ھەڤال، وەختە ڤەگەری مەیدانا خەباتا خوە یا راستەقینەیا ل باکورێ کوردستانێ و ل وێرێ ببە چقلێ ناڤ چاڤێن جەندرمەیێن ب پۆستالێن خوە ئاخا پیرۆزا باب و کالێن تە داگیرکری. بەسە ھەڤال، ئێدی بەسە، ڤەگەرە، ڤەگەرە سەر رێیا راست، وار و ملک و ئاخا باکور ل بەندا تەیە، جودی و ئاگری و بینگۆل و ئارارات بیریا تە کریە. ڤەگەرە ھەڤال، گازی و ھەوار و قیرینا جزیرێ، وان، ھەکاری، دیاربەکر، باتمانێ هتد، دگەھیتە ئەسمانێ حەفتێ و ل بەندا تە نە تو ڤەگەری و وان ژ وێ بندەستیێ ژ وێ زیندانێ ژ بن وێ زولم و زۆرداریێ رزگار بکی، ڤەگەرە وەخت ھاتیە تو ڤەگەری.
ئێدی بەسە ھەڤال، چما ب ڤان کریارێن خوەیێن قرێژ تو دلێ داگیرکەران خوەش دکی و کەزەبا کوردپەروەر و وەلاتپارێزان دشەوتینی. وەرە ھەڤال، ب ھەڤرا، د گەل وی ئەوێ دوھی ل چەپەرێن بەرخوەدانێ بوو و ئیرۆ تە ژ پشت ڤە ب خەنجەرا خیانەتێ کوشتی دەستێن خوە بدنە ھەڤ، ب یەکرێزی و ھەڤگرتنێ دلێ داگیرکەران، کەزەبا دژمن و نەیاران بشەوتینین و وەلاتێ خوە رزگار بکن.
