بایرام ئایاز
* رێزێ ل سەروەریا باشورێ کوردستانێ بگرن، تیرۆرێ نەکەن!
* رێزێ ل ”رێکەفتنا شەنگالێ” بگرن و هاریکار بن ئەڤ رێکەفتنە جێبەجێ ببیت کو ب بەشداریا نوونەرێ یۆئێنێ ل ئیراقێ هاتیە کرن.
دەستێ خوە ژ باشورێ کوردستانێ و شەنگالا پیرۆز بکێشن، بھێلن دەستکەفتێن وێ دەرێ ژ ھێریشێن تورکیێ بهێنە پاراستن و ب هاریکارییا ھەڤپەیمانیا ناڤنەتەوەیی ژ لایێ لەشکەری، ئەمنی و ئاسایشێ ڤە بگەهیتە ئیستیقرارێ و ب پشتەڤانیا ھێزێن ناڤدەولەتی یێن دیمۆکرات ل موزاکەرەیێن جنێفێ د ئاستەکا دەستووری دا بگەهیتە ستاتوویەکا رەوا و یاسایی.
بھێلن بلا بێھنا کورد بهێت، ل سەر ئەردێ خوە ببن خوەدی سەروەری و خوەرێڤەبریەکا دەستووری.
بھێلن، بھێلن، بھێلن!
ب رێکەفتنا دگەل رژێما ئایەتوڵاھان ژی، ب رێکەفتنا دگەل ترکان ژی کورد ناگەهنە هیچ مافەکێ! رێکەفتن و پەیوەندیێن دگەل ڤان ھەردو رژێمان داوییا وێ مالکمباخییە، تێکچوونە!
سیاسەتا وەیا خەندەق و باریکاتان مال ل باکورێ کوردستانێ شەوتاند !
سیاسەتا وەیا تەک ئالی کو وە نەهێلا د دەمێ وێ دا یەک ھەلوەستی و یەکرێزیا ھێزێن کوردی پێکبێت و ھوون ژێ را بوونە ئاستەنگ، رێ ل بەر تورکیێ خوەش کر کو عەفرینێ، گرێ سپی، سەرێ کانیێ داگیر بکەت. ل ڤان جهان رەوش چیە، چاوایە ل بەر چاڤانە!
نوھا ژی ھوون ھەول ددەن دیالۆگا ”کورد و کورد” ل رۆژئاڤایێ کوردستانێ تێک بدەن! ژ پێسیرا رۆژئاڤایێ کوردستانێ بکەڤن، وان رحەت بھێلن، ئەو دێ بریارا ھەری راست ل سەر پاشەرۆژێ خوە دەن.
ئەڤ نێزیکێ دو مەھانە ھوون گەفان ل باشورێ کوردستانێ دخوون و ھێریشان دکەن!
وە خێرە؟
ھوون دخوازن ل پارچەیەکا ئازاد یا کوردستانێ تەڤلھەڤیێ دروست بکەن، شەرێ ناڤخوە دروست بکەن، بێ ئیستیقراریێ چێکەن؟
وە خێرە؟
ما ھوون نابینن ئەڤ کارێن شاش و چەوت پارچەیەک ژ ستراتەژیا رەژیما ئایەتوڵاھانە و تورکیا ژی پێ گەڵەکی کەیفخوەشە کو ھوون ھێریشێ وێ دەرێ بکەن و خوینا کورد ب دەستێ کورد بێتە رژاندن!
نەکەن، نەکەن، نەکەن!
ھوونێ ببن سەدەما کوشتنا ب سەدان کوردێن کو ب بیر و باوەر و ئارمانجا دۆزا کورد و کوردستانێ دەرکەتنە سەرێ چیا و ھاتنە بەر وە. ئەو نەھاتنە وێ دەرێ شەرێ پێشمەرگە بکەن، بچن بەرپرسیارێ ئاسایشا دەریێ گومرکا کوردستانێ بکوژن، بۆریا پەترۆلا کوردستانێ بتەقینن! ئەو دخوازن ژ بۆ دۆزا ئازادیا گەلێ کورد و رزگاریا کوردستانێ شەری بکەن، جانێ خوە ببەخشینن!
نەکەن، نەکەن، نەکەن!
گۆتنا منا داوی:
بلا ئەو دەستێ کو کەتیە و بکەڤیتە خوینا کورد بشکێت!
بلا بەلایا ھەری مەزن بهێتە سەرێ وی/وێ بەرپرسیاری/ێ کو بریارا ھێریشێن تیرۆری ل باشورێ کوردستانێ بدەت و ئالۆزیان بۆ رۆژئاڤایێ کوردستانێ چێکەت.
کوردونۆ، کوردستانینۆ!
نەھێلن، خێرنەخواز ل وەلاتێ مە ئالۆزیان چێکەن، دەستکەڤتیێن مە یێن دیرۆکی بێخنە بەر تەھلووکێ.
ئەگەر وسا بیت، ئەمێ د چەرخێ ٢١ێ دا ژی بمین بندەست و کۆلە!
باشور و رۆژئاڤایێ کوردستانێ تێک بچیت، ئەم دێ ل ئاخا خوە ب چرایان ل ئازادیێ بگەرین!
نەکەن، نەکەن، نەکەن !
ریا چارەسەریێ دیالۆگا کورد و کوردە، رێکەفتنا کورد و کوردە، ملدانا کورد ب کوردە!
